Hana trongtraina
2
1 Chun, Hana chu hieng hin a trongtrai a: “LALPA-ah ka lungril a hlim a,LALPAN ka kî a chawisang a,
Hmêlma lakah ka uong thei ta a,
A sandamnaa chun ka lawm a nih.
2 LALPA anga thienghlim an um nawh,
Nangma ang tu khom an um nawh,
Ei Pathien ang Lungpui an um nawh.
3 Uongthuong takin trong zing naw la,
Trong chaltlai hmang ta naw rawh,
Iengkim hretu chu LALPA Pathien a na,
Thilthaw iengkim aman a bûk hlak.
4 Ralhrâthai thalngul a suktliek a,
Mi hrâtnawhai a sukhrăt a,
5 Khophai chu bu zongin an inhlaw a,
Phingtrâmhai tlai takin an um a;
Nu chingin nausal sari a hring a,
Nau hau nuin a sŭn hmang zo tah.
6 LALPAN a sukhlum a, a sukhring a,
Thlănah a hnûk lŭt a, a kei tho a;
7 A sukpase a, a sukhausa bok a,
A suktlawm a, a chawisang bok a.
8 Pasie chu pilvut a’nthok la suok a,
Rethei chu êkdûr a’nthok chawisangin,
Ama chu milien lai a’n thrungtir a,
Chawimawina lalthrungpha a’n hluotir.
Leilung nghatsan chu LALPA ta a na,
A chungah khawvel hi a’n nghat a.
9 A mi thienghlimhai kè a vĕngpĕk a,
Mi rilohai chu thimah a hmet dei.
Tha hrât hi dingchangna a ni nawh,
10 LALPA dotu chu inchek vong an ta,
Van a’nthokin inrûm khum a ta,
LALPAN kawl kil chen ro rêl a tih.
A ruot lal chu sukhrât a ta,
A hriek năl kî chu chawimawi a tih”
tiin.
11 Chuongchun, Elkana chu a chĕngna khuo Rama tieng a kîr nawk a, naupang chun thiempu Eli hnuoiah LALPA rong a bawl a.
Eli nau rilohai
12 Eli naupahai chu an rilo hle a, LALPA inzăna hrim an nei nawh. 13 Mipuihai laka an lo thaw dan chu, miin hlănbiekna ran inhlăn sa an suong lai chun thiempu siehlaw chu sa thurna thirkut zum thum nei chawiin hung a ta, 14 sa suongna bêl bau lien amanih, bêl dawt nei amanih, bêl khei nei amanih le bêl ieng chi khom chu zuk sun a ta, sa a lak suok suok chu thiempu ta ding a nih. Silo-a LALPA kuoma thil inhlăna hung Israelhai po po chungah chuong ang chun an lo thaw hlak a. 15 Chu bakah, a thauhai an raw hmain thiempu siehlaw chu hlănbiek inhlăntu kuomah hungin, “Thiempu em hmin ding sa mi hung pe rawh, i sa suong hi fa naw nih, a sel chau a nih a dit” tiin a hung hril a. 16 Chun, inhlăntuin, “A thau hi hang raw phot ei ta, a dang chu i dit zât zât i lâk ding a nih” a ti pha leh siehlaw chun, “Ni lo e, i mi pêk nghal ding a nih. I mi pèk naw chun ka lâk lui tho ding a nih” a ti hlak a. 17 Hienga LALPA kuoma thilhlân inzà naw taka an lo thaw hlak lei hin tlangvalhai suolna chu LALPA mithmua chun thil theidaum tak a nih.
18 Amiruokchu, Samuel chu naupang tè khom ni sien, puon zai inhmia siem thiempu zakuo efod chu hâkin LALPA hmaah rong a bawl a. 19 Chu bâka chun a nuin zakaw fuol a thruipĕk a, kum tin pumraw thilhlân inhlăn dinga a pasal le Silo-a an fe zătin a chawipek hlak a. 20 Eli chun Elkana le a nuhmei chu mal a sawm a, “LALPA ta dinga thilhlân in inhlăn hi a’n hlăntu nuhmei thlaa inthokin LALPAN rul chêu raw se” a ta, chuongchun in tieng an kir nawk ta a. 21 LALPA chun Hana chu a kan a, nau a pâi a, naupa pathum le naunu pahni a nei a. Chun, naupang Samuel chu LALPA hmaa chun a hung seilien pei a.
22 Eli chu a hung upa ta hle a, Israel mihai po po chunga a nauhai thilthaw po po le Intuokna puon in kotkhar bula rongbawltu nuhmeihai an zălpui hlak thu dam chu a hriet a. 23 Chuongchun, an kuomah, “Ieng leia hieng ang thil hi in thaw am a na? Hieng mihai po po baua inthok hin in thil rilo thawhai ka lo hriet vong a nih. 24 Hieng ding hi a ni nawh, ka nauhai! Pathien mihai laia in chanchin an hril thang hi a thra naw tieng vong a nih. 25 Mi pakhat chungah mi dangin thil suol a thaw chun Pathienin an chungthu a rĕl thei a, amiruokchu, LALPA chungah miin thil suol a thaw ruok chun tuin am a chungthu hrilpêk ta’ng a ta?” a ta. Chuong sa khom chun a nauhai chun an pa zilhalna chu an poisa chuong nawh, LALPA chun sukhlum dingin a lo ruot tawl ta si a. 26 Naupang Samuel ruok chu a’n thrang lien deu deu a, Pathien le mihriem ditsak a hlaw a.
27 Eli kuomah Pathien mi a hung a, a kuomah, “LALPA chun hieng ang hin a tih: ‘Aigupta rama Faraw bawia in um lai khan in thlatuhai kuomah ka’n lăr hlak a ni naw am a ni? 28 In thlatu chu Israel hnam po po laia inthoka ka thlang suok, ka maichămah fe a, rimtui raw a, ka hmaah thiempu zakuo hâk a, ka thiempu ni dinga ka ruot a ni naw am a ni? In thlatuhai chu Israel mihaiin meia pumraw thilhlân an inhlăn po po kha ka pĕk a ni naw am a ni? 29 Ieng leiin am ka umnaa inhlăn dinga ka ruot ka kuoma hlănbieknahai le ka puola thilhlânhai chu chêksol a, kei neka i nauhai chawimawi lem a, nangni insukthauna dinga ka mi Israelhai hlănbiekna sa a thrá thrà in hmang am a na?
30 “Chuleiin, LALPA, Israelhai Pathien chun hieng hin a puong a nih: ‘Keiin i sunghai le i pa sunghai chu kumkhuoin ka hmaah um an tih lo ti lang khom, nangni chu um top naw ti niu. Mi chawimawitu taphot chu chawimawi ka ta, mi hmusittu taphot chu hmusit ka tih. 31 Ngai ta, i hrătna le i pa sŭnghai hrătna ka sât thlăk hun a hung tlung vak ding a na, in sungkuoa mi tar kûna dam hrim hrim um naw ti niu. 32 Hi ka chĕngna ina hin buoina tlung a ta, Israel thla danghai ruok chu malsawm ka ta, inhnarin la thlir vong vong in ta, i insunga ruok chu tar kûna dam tu khom um naw ni hai. 33 Ka maichăma inthoka ka sukbohmang nawhai chu i mitthli suktlatu le i lungril suklungngaitu ding chaua hlà ni’ng an ta, i ina inthoka pieng taphot chu an vanglai takin thi pei an tih.
34 “‘Chun, i naupahai pahnih, Hofni le Finehas hai chunga thil hung tlung ding hi i ta dingin inchikna ni’ng a tih, an pahniin ni khat sungin an thi vé vè ding a nih. 35 Ka lungril le ngaituona anga ka rongbawltu ding keiman thiempu ringum indin ka ta, a sungkuo khom indin nghet ka ta, ka hriek năl hmaa chun rong bawl zing ta’ng an tih. 36 Chun, hieng hi ni’ng a ta, i sungkuo la dam sun po po chu tangka le bei hlek hniin invâk an ta, a hmaa chun kûn an ta, ‘Fak ding ka hmu theina dingin thiempu sin ieng amani bĕk mi’n thawtir raw khai’ tiin la hnîng an tih’ a ti a nih” a ta.