4 A nuhmei an thatpek, Levi chia mi chun, “Benjamin chihai umna Gibea-ah riek dingin ka hmei leh kan va lŭt a. 5 Gibea mihai chun an mi hung bei a, zanah an mi hung inhuol a, mi that an tum a, ka hmei chu an pawngsuol hrep a, a thi ta a. 6 Ka hmei ruong chu ka hung phur a, a taksa chu ka chan nawi a, Israel thlahai ram hluo po poah ka thon dar a nih, Israel rama hin thil tirdakum le inzakum thlak tak chu an lo thaw ta si a. 7 Nangni Israel thlahai hin in rêngin ngaituo unla, in ngaidan le remti dan chu hrilin thu tlukna siem ro” a ta.

8 Mipuihai chun thukhat chelin, “Tu khom mani in tieng inlawi nawng ei ta, tu khomin mani khuo tieng kir bok nawng ei tiu. 9 Gibea-hai ei thaw dan ding chu hieng hi ning a tih: Thrum vawr ei ta, chuong ang pei chun thawng ei tih. 10 Israelhai chunga thil indik lo tak an thaw ang peia thaw ve dinga Gibea hmuna Benjaminhai ei hang beinaa mipui fak ding buoipuitu ding mi zaah sawm, mi sangah za, mi singah sang thlang suok ei tiu” an ta. 11 Chuongchun, Israel thlahai po po chu thukhat chelin khawpui bei ding chun an insèk khawm a.

12 Israel thlahai chun Benjamin hnam umna taphotah mi an tir a, “Nangni lai hieng anga tuolthatna rapthlak tak a hung um el ta hi ieng tizie am a na? 13 Gibea khuoa mi rilohai chu kan sukhlum dingin kan kutah hung pe suok unla, Israel rama inthokin chuong ang ritlona chu inthiel fai kan tih” an ta. Amiruokchu, Benjamin hnamhai chun an unau Israel thlahai thu chu an bengkhon nuom nawh.

14 Chuongchun, Benjamin thlahai chu Israel thlahai do dingin an khawpuihaia inthok chun Gibea khuoah an lŭt ta hum hum a. 15 Gibea mi huoisen thlang suok za sari bâkah an chêngna khuohaia inthokin kawlhnâm chawi ral do mi singhni le sangruk chu Benjamin thlahai chun an khawm nghal a. 16 Chuonghai lai chun voikawlong thlang suok bik ngat mi zasari an thrang a, an rêng chun saihli per thiem, sam zai tiet khom per threl lo vong an nih.

17 Israel mihai chu, Benjamin mihai tiem sa loin, kawlhnâm chawi, indo mi ngot khom nuoi li an nih. 18 Israel thlahai chu Bethel-ah an hang fe a, Benjamin thlahai chu bei dingin a tu hnam am fe hmasang an ta ti thu indonin Pathien an rawn a, LALPA chun “Judahai fe hmasa raw se” a ta. 19 A zinga chun Israel thlahai chu an tho a, Gibea bula chun an inkul a. 20 Israel thlahai chu Benjamin thlahai bei ding chun an suok a, thranghmun an khaw a. 21 Benjamin thlahai chu Gibea inthok chun an hung suok a, chu ni chun Israelhai chu mi singhni le sanghni an lo that a. 22 Sienkhom, Israel thlahai chu an infui phŭr a, an bei tran nia an beina hmuna bok chun bei dingin thrang an khaw nawk a. 23 Israel thlahai chu an hang fe a, LALPA hmaah zan tieng chen an trap a, “Kan unau Benjaminhai do dingin kan inthok dok nawk ding am a ni?” tiin an hang rawn a, LALPA chun “Hang bei nawk ro” a ta

24 A ni hnina chun Israel thlahai chun Benjamin thlahai chu an hang pan hnai a. 25 Benjamin thlahai chun bei dingin Gibea khuoa inthokin an hung suok ve a, Israel thlahai laia mi singkhat le sangriet, kawlhnâm chawi mi ngot chu, an that nawk a. 26 Chuongchun, Israel thlahai le mipui po po chu Bethelah an hang fe a, LALPA hmaah an inthrung a, an trap a, zan tieng chen bu an nghei a, LALPA kuomah pumraw thilhlân le inremna thilhlân an inhlàn a. 27 Israelhai chun LALPA an rawn a (Chuong lai chun LALPA Thuthlung Bawm chu chu hmuna chun a um a, 28 Aron naupa Eleazar, Eleazar naupa Pinehas chun rong a bawl a). Pinehas chun, “Kan unau Benjamin thlahai chu kan hang bei nawk ding am a ni? an naw leh kan tawpsan lem ding?” tiin LALPA chu a’n don a. LALPA chun, “Hang bei nawk inla, zinga chu in kutah pe ta’ng ka tih” a ta. 29 Chun, Israelhai chun Gibea khaw kawlah aruka inchàntu ding mi an sie a.

30 Israel thlahai chu Benjamin thlahai bei dingin a ni thum ni chun an inthok suok nawk a, a hma ang bokin thranghmun an hang khaw a. 31 Lo bei dingin Benjamin thlahai chu khawpuia inthokin an hung suok a, ni dang ang bokin mihai chu beiin an lo that a, Bethel khaw pan tungna le Gibea khaw panna lama phula chun mi sawmthum an that a.

32 Benjamin thlahai chun, “A hmaa ang bok khan ei intlawm nawk tah ie” an ta. Chuonga an hril lai chun Israel thlahaiin, “Intawl kir ei ta, khawpuia inthokin lamlien tieng zăwr dok ei tiu” an ta.

33 Israelhai po po chu an umna hmuna inthokin an intawl kir a, Baal Tamar-ah thrang an khaw a; chu phing leh a rûka lo inchăntuhai kha an inchănna hmun Gibea thlang tienga inthokin an hung suok a. 34 Israel thlahai laia mi huoisen thlang khawm singkhatin Gibea khawpui chu an bei thut a, an indo nasa êm leiin Benjamin thlahai chun an tlawm trĕp a nih ti hmêl khom an hriet chang nawh. 35 Israel thlahai hmaa chun LALPAN Benjamin thlahai chu a sukhlum treu a, chu nia Israel thlahaiin Benjamin thla an that po po chu kawlhnâm chawi ngot singhni le sangnga le zakhat an nih.

36 Benjamin thlahai chun an tlawm tah ti an inhmai nawh. Benjaminhai hmaa Israelhai an hnung tol kha Gibea bula inchăntu an lo sie rùk an ring lei a ni si a. 37 A rûka inchăntuhai chun Gibea chu an bei thut a, an inzar dar a, a khaw pumpui chu kawlhnâmin an suosàm a 38 A rûka inchàntuhai khan mei an inkhuk chara Israel mi danghai khan hung nor let dinga inremsiem an ni a, 39 mei an inkhûk charin an hung bei let tah a nih. Benjaminhai chun Israelhai chu beiin, mi sawmthum vel lai an that hman a, “A hmaa ang bokin ei hnè nawk an tah” an ti hman hrim a.

40 Nisienlakhom, khawpuia inthoka mei khu a hung suok phing leh Benjaminhai chu an hang ngha kir a, khawpui pumpui khu chun van tieng a pan tung ngut ngut el a. 41 Chu phing leh Israelhai chun an hung hnot kir a, Benjaminhai chu an thlabâr hle a, sietnan a tlak buok a nih ti an inhmai nawh. 42 Israelhai hmaa chun thlalĕr tieng panin an tlan sie a, sienkhom tlan hmang ngaina a um naw a, khawpuia inthoka hung hnottuhai khan chu taka chun an sukhlum a. 43 Benjamin mihai chu an inhuol a, an hnot a, ni suokna tienga chawlna hmun, Gibea dep tieng chun an hnot phak a. 44 Benjamin mihai chu mi singkhat le sangriet an that a, chuonghai chu mi hrât le huoisen vong an nih. 45 Anni rawi chu an intawl pei a, thlalĕr tieng Rimon lungpui tieng chun an tlanse a, mi sangnga chu lamlien dungah an that a, Gidom chenin an hnot ngat ngat a, mi sanghni an that a.

46 Chu ni chun Benjamin mi kawlhnâm chawi ngot khom singhni le sangnga an that a, an rêng chun mi hrât le huoisen vong an nih. 47 Mi zaruk ruok chu thlalĕr tieng Rimon lungpuiah an tlansie a, Rimon lungpuia chun thla li an um a. 48 Israelhai chu Benjamin mihai chungah an truong nawk a, an khawpui sunga mi an hmu taphot chu, an ranhai chenin kawlhnâmin an sat hlum pei a, chu bakah khuo an hmu taphot chu an raw pei bok a.