4 A zinga chun mipuihai chu inhma takin an tho a, chu taka chun maichăm an siem a, pumraw thilhlân le inremna thilhlân an inhlăn a. 5 “Israel thlahai pungkhawmnaa LALPA hmaa hung inlang ve lo an um am?” tiin an indon a. Kha hma khan Mizpa khuoah LALPA hmaa hung inlang naw taphot chu sukhlum ngei ding tia khŭn taka thu an lo inkhăm ta tlat si lei a nih. 6 Israelhai chun an unau Benjaminhai chu an lunginsiet a, “Voisun hin Israel thlahai lai hnam khat chu satthlâk an ni ta si a, 7 a la um sunhai ta dingin an nuhmei ding ieng tin am ei ngaituo ta ding a na? Ei naunuhai hlak nuhmeia inneitir dêr lo dingin thu ei lo inkhăm ta bok si a” an ta.

8 Mizpa khuoa inkhawmpuia hung thrang ve lo hnam an um am tia an hang indon chieng chun Gilead ram Jabes khaw mi naw chu an an um vong a. 9 Hming an hang lam khan Jabes khaw mi an thrang ve nawh ti an hmu suok chauh a nih. 10 Pungkhawmhai chun mi huoisen thlang khawm ngot singkhat le sanghni an tir a, “Fe unla, Jabes khuoa mi po po, nuhmei le naupang chenin, kawlhnâmin va sat hlum vong ro. 11 Pasal po po le nuhmei, pasal pawl tah chu that vong ro” an ta. 12 Jabes-a chun pasal la pawl ngai dêr lo nunghak zali an hmu a, chuonghai chu an umna Silo khuoah an hung thruoi a, chu chu Kanan ram a nih.

13 Chun, pungkhawmhai chun mi an tir a Rimon lungpuia inbi Benjaminhai chu an va’n biekpui a, inremna thu an puong a. 14 Benjamin-hai chu an hung kir a, Jabes-a nunghak an hung thruoihai chu nuhmei dingin an pĕk a, sienkhom an la’n dai naw a. 15 Israel hnam lai LALPAN kâr a siem tak leiin mihai chun poi an ti a, Benjaminhai chu an lainat a nih.

16 Pungkhawm laia upahai chun, “A la damhai nuhmei ding hi ieng tin am thaw tang ei ta, Benjaminhai laia an nuhmeihai hlak chu sukbohmang an ni ta si a? 17 Benjamin hnam hi sukmanga a um nawna dingin Benjamin thla la um sunhai hi ieng tin am thla ei inneitir thei ding a na? 18 Ei naunuhai hlak nuhmeiah ei inneitir thei si naw a” an ta. Israel thlahai chun, tu khom Benjaminhai nuhmei dinga mani naunu inneitir taphot chu trongsephur dong dingin an lo inkhàm ta si a.

19 Anni bok chun, “Ngai ta u, Bethel hmar tieng, Bethela inthoka Sekem tieng fèna lamlien sak tienga Lebon sim tienga um Silo khuoah kum tin LALPA ta dingin kût a um hlak kha. 20 Benjamin thlahai kuoma chun, ‘Va fe unla, grep hmunah lo inchàn unla, 21 lo en zing unla, lămnaa thrang dinga Silo khuoa nunghakhai an hung suok pha leh grep huona inthokin hung suok unla, Silo nunghakhai chu mani nuhmei ding seng man unla, Benjaminhai ram tieng fepui ro. 22 An pahai amanih an tràhai amanih an hung pha leh an kuomah, ‘Lunginsiet ro khai. Indonaa khan an nuhmei ding ei lo manpêk si naw a, nangni hlakin in lo pêk bok si nawh, lo pe ni inla chu, thiem naw in hlaw ding a ni bok si a’ kan lo ti ding a nih” tiin thu an pêk a.

23 An ti ang chun Benjamin thlahai chun an thaw a, lâma hunghai chu anni zat seng nuhmei dingin an man a, an fe hmangpui a, an ram tieng an thruoi a, an khawpuihai cheiin an hluo nawk a.

24 Chu taka inthok chun Israel thlahai chu mani chi chi le mani hnam hnamin an intêl hrang a, anni ram sengah an kir nawk ta a.

25 Chuong lai chun Israelhaiin lal an la nei naw a, mi tinin mani thra ti zawng zawngin an thaw el a nih.