5 A ni lina tŭk chun inhma takin an tho a, fe tumin an insiem a, sienkhom a hmei pa chun a makpa kuomah, “Fain la’n sukhar phot unla, chu zoah in fe ding annawm” a ta. 6 An pahni chun thrungin, fain an dawn tlang a. Chu zoah a hmei pa chun, “Voi zan chu la riek unla, la chawl hadam ro” a ta. 7 Suok tumin a hang thoa chu a tarpu chun cham nawk dinga a thlo tlat leiin chu zan chun an la riek nawk a. 8 A ni ngana tùka fe tuma a hang inthok khom chun a tarpu chun, “La hang insukhar phot unla, zan tieng ni nêmah suok lem ro” a ta. Chuongchun, an pahni chun bu an fak tlang nawk ta a.

9 Chu pa chu fe tuma a hmei le a siehlaw leh hang suok a tum chun, a tarpu chun, “En ta, khuo an hnu el ding an ta a, voi zan chu la riek nawk el ro, nisa khom a tla ding a ni ta hi. La châm unla, hlim takin um ro. Zing inhma takin tho in ta, in fe el ding annawm” a ta. 10 Sienkhom, zan dang la hang riek nawk chu a nuom ta naw leiin Jebuhai khuo Jerusalem tieng panin a hmei leh thuomhnaw phur a sabengtunghai le chun a suok a.

11 Jebuhai khawpui Jerusalem kawl an tlung chun nisa a tla trêp ta a. A siehlaw chun, “Thaw ro, Jebuhai khawpuia hin lut ei ta, riek el ei tiu” tiin a rot a. 12 A pu chun, “Ni lo e, Israel mihai umna ni lo, hnam dang mi khawpuia chun lût lo e; Gibea khuo tieng pan pei lem ei tiu” a ta. 13 A pu bok chun “Hung ro, Gibea an naw leh Rama khuo ban tumin fe pei ei ta, a pakhat lem lemah ei riek ding a nih” a ta. 14 Chuongchun, an fe pei a, Benjaminhai khuo Gibea kawl an tlung chun nisa a tla a. 15 Chu taka chun riek dingin an lŭt a, khawpui tuolzawla chun an inthrung a, sienkhom an ina riek dinga fiel tu khom an um nawh.

16 Chu zan tieng chun Efraim tlangrama inthoka hung, Benjaminhai khuo Gibea hung khawsa putar pakhat lo fe chu a hung inlawi a. 17 A hang ngha vel chun tuolzawla khuolzin inthrung a hmu a, “Khaw laia inthoka hung am in na? Khaw tienga fe ding am in ni a?” tiin putar chun a’n don a.

18 Mikhuol chun, “Judai ram Bethlehema inthoka Efraim tlangram kilkhawr, kan umna pana inzin kan nih. Judai ram Bethlehemah ka zu’n zin a, tuhin ka in pana inzin kan ni a, tu khom a mi’n tlungtu kan hmu naw a nih. 19 Kan sabengtunghai fak ding bupawl le ran bu kan nei a, kei le i bawinu le i siehlaw tlangval fak ding le dawn ding bu le uoiin a um bok a, chuong tieng zawnga chu ieng khom tlăksam kan nei nawh” a ta. 20 Putar chun, “Thlamuong takin um ro, in mamaw po po chu keiman tum vong ka tih; khawlaia ruok chu riek lul naw ro” a ta. 21 Chuongchun, a inah a thruoi lut a, an sabengtunghai chu bu a pêk a; a mikhuolhai ke chu a sawppek a, fain an dawn a.

22 Chuonga hlim le lawm taka an um lai chun a khuoa mi lut-inle le suol turuhai chun a in chu an hung inhuol a, a kotkhar chu an hung chum dot dot a, putar kuoma chun, “I mikhuolpa kha hung thruoi suok rawh, kan lo pawl theina dingin” an ta. 23 In neitupa chu a va suok a, an kuomah, “Ruolhai, chuong chu ni lo e, chuong ang ĕm chun suol lul lo e. Hi mi hi ka mikhuol a na, hieng anga thil inzakum thlak chu thaw lul naw ro. 24 Ngai ta u, hi taka hin ka naunu nunghak le ka mikhuolpa hmei an um a, anni chu hung thruoi suok ka ta, hmang unla, in ti ang angin thaw ro. Hi pa chunga ruok hin chu chuong ang thil inzakum chu thaw lul naw ro” a ta.

25 Nisienlakhom, mi suolhai chun a thu chu an ngaithlak nuom nawh. Chu phing leh mi chun a hmei chu mihai kuoma chun a thruoi a, an lo pawl a, khawvar hmâ khat chu zankhuoin an soisak hrep a, khuo a var charin an fesan a. 26 Khuo a var phing leh nuhmei chu an infetir a, a pasal tlungna in kotkhar bula chun a thalin a tlu thlor a, khaw var hnung chenin a zâl ta zing a. 27 A pasal zing tho chun fe suok dingin kot a hang hong a, kot bula chun a hmei chu a thala tlu let dèrin a hmu a. 28 Ama chun, “Tho raw leh, fe nawk ta’ng ei tih” a ta, sienkhom a hung don ta hrim hrim nawh. Chuongchun, a sabengtung chunga chun a hlang kai a, a tho a, a in tieng pan chun a suok ta a.

29 In a tlung chun chemte a lâk a, a hmei chu a kut le ke a tan bong vong a, hmun sawm le hmun hniin a chan nawi a, Israel ram po poa chun a thon dar a. 30 A hmu taphot chun, “Israel thlahai Aigupta rama inthoka an hung suoka inthokin hieng anga thil thaw hrim hrim hi hmu le hriet a la ni ngai nawh. Ngaituo unla, inrâwn tlâng unla, iem kan thaw ding mi hril ro” an ti vong a.