4 Ama chun a chunga Mika thil thawpekhai chu hrilin, “A thiempua a mi ruoi a nih” a ta. 5 Anni chun, “Chuong a ni leh, kan inzinna hi kan tluong ding le ding naw Pathien mi rawnpêk rawh” an ta. 6 Ama chun, “Thlamuong takin fe ro. In fèna ding chu LALPAN a hrietpui chêu” a ta.

7 Mi pangahai chu an suok a, Laish khuo an tlung a, chuong mihai chu Sidon mihai ang bokin, tu khom inringhlâ lo le thlamuong taka khawsa an nih ti an hmu a. An ramin tlăksam a nei naw a, anni khom an hnienghnâr hle a. 8 Chuongchun, Zora le Estaol tieng chun an kir nawk a, an unauhai chun “In ram thlithlai chu ieng ang am a na?” tiin an lo indon a. 9 Anni chun, “Thaw ro, hang bei ei tiu. A ram chu kan hang hmu ngei a, a thra khop el. Nuoma tung inmûm el loin inthok suok nghal un la, a ram chu hang la ro. 10 In hang tlung pha chun ralmuong taka um mihai le LALPAN a pèk ta chêu ram lien tak chu hang hmung in ta; hnuoia um thil hrim hrim chu tlăksam an nei nawna hmun a nih” an ta.

11 Chuongchun, Zora le Estaol khuoa inthok chun Dan hnama mi ralthuom chawi mi zaruk an suok a. 12 An kai tung a, Judai ram Kiriat-Jearim khaw kawlah umhmun an khuor a, chu chu tu chen hin Mahane Dan ti a la ni zing. 13 Chu taka inthok chun Efraim tlangramah an kai tung a, Mika in chu an tlung a.

14 Enthlatu Laish khuoa hang fe mi pangahai chun an unauhai kuomah, “Hieng laia in pakhata hin efod dam, pathien hrang hrang lim dam, milim ker dam a sunga sung dam a um ti in hriet am? Chuleiin, ieng tin am in thaw ding ti in ngaituo ro” an ta. 15 Chu hmuna inthok chun an kawi a, Levi chia mi tlangval umna Mika in chu an va tlung a, a chungchang thu an indon a. 16 Dan thlaa mi ralthuom chawi mi zaruk ruol chu kul kotkhar bulah an ngir a. 17 Kul kotkhar bula thiempu le ralthuom chawihai an ngir lai chun ram enthlaa fe mi pangahai kha in sŭngah an lŭt a, milim ker dam, efod dam, pathien lem dang dang le milim sung chop dam chu an lăk a.

18 Chuonga Mika inah lut a, a milim ker chop hai, efod hai, milim dang dang le milim sung chop hai an lak lai thiempuin a hmu chun, “Ieng am a na in thaw ta kha?” a ta. 19 Anni chun, “To la, i kutin i hmŭr hup rawh. Kan kuomah hung ve la, kan pa le thiempuah um rawh. I ta dingin insung pakhat chaua thiempua um am Israel laia hnam khat thiempua um a thra lem?” an ta. 20 Thiempu chu a lawm hle a. Efod le sungkuo pathien limhai le milim ker hai chu a làk a, anni lai chun a thrang ve ta a.

21 Chuongchun an naupang chik té tè hai, an ranhai le an thil neihai chu hmasomin an fe suok a. 22 Mika ina inthoka hla fe an phak hnung chun Mika tuolbawmhai chu an pung khawm a, Dan thlahai chu an va hnot phak a. 23 Dan thlahai chu an hei ko a, anni chu an hung ngha kîr a. Mika kuoma chun, “Iem a ta mi khang zozai kha i hung pui?” an ta. 24 Ama chun, “Ka pathien siemhai leh thiempu in fepui dai a, ieng am nei ka nei ta a? Ieng ti kongin am ‘Iem i ti an leh?’ dam chu in mi ti hrim hrim a?” a ta.

25 Dan thlahai chun, “Keini lai hin trong mei mei naw raw khai, chuong naw chun mi lungturûk kut tuor hlauh rawi i ta, i sunghai leh in hringna chân phä rawi in tih” an ta. 26 Dan thlahai chu an fe a, Mika chun hang bei ngam ruol nia a hriet naw leiin in tieng a kirsan ta a. 27 Mika milim siemhai le a thiempu chu an fepui a, Laish khuo, ralmuong taka umhai kuom chu an hang tlung a, kawlhnâmin an that a, an khuo chu an rawpek a. 28 Sidona inthokin a hlat êm leiin hung san suoktu ding tu khom an nei naw a, an sè vèlah sungkuo laina hnai tu khom an nei bok si nawh. An khawpui chu Bet Rehob bul ruoma um a nih. 29 Dan thlahai chun khuo chu an bawl thra a, an hluo a. Israel naupa, an thlatu Dan hming chawiin Laish khawpui chu Dan tiin an inbŭk a. 30 Dan thlahai chun milim siem fawm chu anni ta dingin an indin a, Mosie naupa Gersom naupa Jonathan le a naupahai chu, sala an intang chen khan thiempuah an um tah a nih. 31 Chuongchun, Mika siem fawm milimhai chu Silo-a Pathien in a um sung po chun an hmang ta pei a nih.