3 Tangka sangkhat le zakhat a pekkir ni chun a nuin, “Hi tangka hi ka naupa puola thing milim inkertirna ding le tangkaruo milim insungtirna dingin keima kut ngeiin LALPA kuomah khŭn takin ka’n hlăn a; chuleiin, ka pêkkǐr nawk ding chè a nih” a ta. 4 Tangka chu a nu kuomah a pêk kǐr a, a nu chun tangka sekel zahni chu a lâk a, tangkaruo sertu kuomah a pêk a, ama chun thing milim kerna bakah tangkuo milim sungnaain a hmang a, milimhai chu Mika inah a sie a. 5 Mika chun pathienhai siena ding in a nei a, efod le milimhai a siem a, a naupa pakhat chu thiempu dingin a sie hrang a. 6 Chuong lai chun Israel ramah lal an la um naw a, mi tinin mani thra tizâwng zăwngin an thaw el a nih.

7 Judai ram Bethlehemah Levi chia mi tlangval pakhat, Judahai laia khawsa hlak a um a. 8 Ama chun umna ding hmun dang zongin Bethlehem a suoksan a. Chuonga an văknaa chun Efraim tlang rama Mika in chu a va tlung a. 9 Mika chun, “Khaw laia inthoka hung am i na?” a ta, ama chun “Judai ram Bethlehema inthoka hung, Levi chia mi ka ni a, umna ding ka zong a nih” a ta.

10 Mika chun, “Ka kuomah um la, ka pa le thiempuah thrang la, i fak le dawn le i silfenhai ka tum bakah kum khatah tangka sekel sawm peng ka ti che” a ta. 11 Levi chia mi chun a remti a, chuongchun tlangval chu a naupahai laia pakhat ve angin a um ta a. 12 Mika chun Levi chia mi chu thiempuah a sie a, a inah a’n umtir ta a. 13 Mika chun a kuomah, “Tu zet hin chu Levi chia mi ngei thiempu ka nei ta a, LALPAN mi sukhmuingil ngêi a tih” a ta.