4 Chu hnung iemani chena chun Sorek ruoma nunghak pakhat a hming Delila chu a ngaizawng a. 5 Filistin hotuhai chu nunghak kuomah an fe a, “Ama hi thahnè a, khuopa kan soisak theina dingin a hrătna rŭk hriet tumin zăwr la, tangka sekel sangkhat le zakhat seng peng kan ti che” an ta.

6 Delila chun Samson kuomah, “I hrat vieuna san thuruk mi hril rawh. Ieng tin am soisak dingin khuop thei kan ti che a?” tiin a’n don a. 7 Samson chun, “Thalhrui tharlâm pasari, la trawl loin mi khuop unla, mi dang ang bokin che thei naw ve el ka tih” a ta. 8 Filistin hotuhai chun hrui thar hlok, la vuoi lo chu an hung chawi a, chu chun a khuop a. 9 Pindan sung rila chun aruka inchàntu mi a sie a. “Samson tho rawh, Filistinhaiin an hung bei ding che a nih” a ta. Amiruokchu, meiin hrui zăi a kăng chat ang elin a khuopna thalhruihai chu a’n tan hmok hmok el a. A hràtna san chu an hriet suok thei chuong nawh.

10 Delila chun Samson kuomah, “I mi hlĕm a, nuizat bûrah i mi siem a nih. Tu hin ieng anga khuop thei di’m i na ti mi hril ta raw leh” a ta. 11 Ama chun, “Hruol thar la hmang ngai dèr loin nghet takin mi zem la, mi dang ang bokin che thei naw el ka tih” a ta. 12 Delila chun hruol thar a lak a, chu chun a zem bur a. Pindan sung rila inchàn rûktuhai hrieta chun, “Samson tho rawh, Filistinhaiin an hung bei ding chè a nih” a ta. Sienkhom, a kuta khuopna hruol chu patzai ang elin a’n tan hmier hmier a.

13 Delila chun Samson kuomah, “Tu chen hin mi hlemin nuizat bûrah i mi la siem zing a nih. Khuop thei i ni dan mi hril ta raw leh” a ta. Samson chun, “Ka sam hi hmun saria phierin puon khawngnaa pat zai leh zep sain tà khum inla a ni el annawm” a ta. 14 A sam chu puon kola chun tomkilin nghet takin a kil de a. Chu zoah, “Samson, Filistinhaiin an hung bei tum che” tiin a ko a. A hung thranghar a, puonbu kil dĕna le a puonbu chop chun a kei thlong ta vong a.

15 Delila chun Samson kuomah, “Ieng khom mi hril nuom si loin iengtin am ‘Ka hmangai che’ dam i mi ti chu? Hi hi voi thum zet nuizat bûra i mi siemna a ni ta a, i hrătna rŭk san hlak i mi hril nuom top bok si nawh” a ta. 16 Sŭn le zăn a mor ngat ngat lei chun a nghok tongkhongah a hril ta a. 17 “Ka lua hin bakchep hrim hrim hmang a la ni ngai naw a, ka nu sula ka um laia inthoka Pathien ta dinga ser hrang Nazarit mia siem ka ni a, ka sam hi vaw ta inla chu ka hratna hi bo vong a ta, mi dang ang boka hrat naw hung ning ka tih” tiin iengkim a hril ta a.

18 Iengkim a hril ta vong ti Delila’n a hriet chun Filistin hotuhai kuomah, “Iengkim a mi hril ta leiin hung nawk phot el ro” tiin a’n cha a. Filistinhai hotuhai chu sum chawiin an hung a. 19 A malpui chungah a’n intir a, mi a ko a, a sam phier sari chu a chep thlak vong a, an thuhne tran a, a hratna chun a zamsan ta a. 20 Ama chun, “Samson, Filistinhaiin an hung bei tum che” a ta, a in chu a hung har a, “Ni dang ang bokin va suok ka ta, intâl suok nawk el ka tih” tiin a’n ngaituo a. LALPA chun a maksan tah ti hrim a hriet si nawh.

21 Chuongchun, Filistinhai chun an man a, a mitmu an khel dok a, Gaza tieng an thruoi thlăk a, dâr kol an inbuntir a, lung ina chun bu an inrawttir a. 22 Sienkhom, a sam an vaw kol hnung chu a hung inthrang tran nawk a.

23 Filistin hotuhai chu an pathien Dagon^a kuoma inthawina ropui tak inhlàn ding le insukhlim dingin an pung khawm a, “Ei Pathienin ei hmĕlma Samson ei kutah a mi pĕk tah annawm” an ta.

25 An hung phŭr zuol deu hnung chun, “Ennuom dingin Samson kha hung thruoi suok ro” tiin an khĕk a. Samson chu an ko suok a, ban le ban inkarah an inngǐrtir a, ennuomah an siem a. 26 Samson chun a kuta keitu siehlaw kuomah, “Hi in dotu banpui hi ka them phak theinaah mi sie rawh, banpuiah ka’n nghai theina dingin” a ta. 27 Chu tempula chun nuhmei le pasal an inbeng sip hmur a, Filistinhai lalhai khom an kim hle a; nuiza siemnaa Samson an hmang laia a chung sawnga inthoka thlirtu nuhmei pasal ringot khom mi sangthum lai an nih.

28 Samson chun LALPA a ko a, “Aw LALPA, lunginsiet takin mi hre zing la, aw Pathien, ka mit khing hni phuba hi Filistinhai chungah trum khata ka lâk vong theina dingin voi khat bêk mi hung sukhrât nawk rawh” tiin a trongtrai a. 29 Samson chun tempul lailunga dotu sûtpui pahni chu a hang them a, a kut chang tiengin sûtpui pakhat, a kut voi tiengin sûtpui dang chu a nam a. 30 “Filistinhai hi hang thi chil ka tih” a ta, a theina po poin a nam a, tempul chu a hung chim thla ta hum hum a, a sunga hotuhai le mipuihai a del hlum vong a. Chuongchun, a dam laia a sukhlum nêkin a thi chilhai chu an tam lem.

31 A unauhai le a pa sunghai po po chu a ruong la dingin an hung thla a, an lăk a, an zawn tung a, Zora le Estaol inkara a pa Manoa an phŭmna hmuna chun an vui liem a. Kum sawmhni sung Israelhai a thruoi a nih.