Samsonin phubä a lâk
15
1 Chu hnung, bu sîk hun lai hin Samson chun kêl tuoi keiin a nuhmei zu kandingin a fe a. “Ka nuhmei pindanah ka lût ding a nih” a ta, sienkhom a tarpu chun a phal naw a. 2 “I theida hlè nia ka hriet leiin i ruolpa ka lo pêk el an tah. A sangnu hi ama nêkin a hmêl a thra lem naw maw? A aiin nei lem el rawh” a ta.3 Samson chun an kuomah, “Tuta trum hin chu Filistinhai poi ka tawk a ni khomin mi dem thei ta naw ni hai” a ta. 4 Chuongchun a suok a, sihal zathum a va man khăwm a, a kop peiin an mei a suizom a, meiser a siem a, an meia chun a khit de a. 5 Meiser chu a raw chok a, sihalhai chu bu hmunah a’n suo a, buphal le bu la ngirhai chu, an oliv huon le grêp huon chenin, a kàng dur dur a.
6 “Tu thaw am a na?” ti Filistinhaiin an indon chun, “Timna khuoa mi pakhat makpa Samson thaw a nih; a tarpuin a nuhmei a lâkpĕk a, a ruolpa a pèk lei a nih” an ta. Filistinhai chun an pafain an hang raw hlum a. 7 Samson chun an kuomah, “Hienga in thaw si hin chu phuba ka lak hma chun chawl naw ning” a ta 8 Anni chu a bei a, a that treu a, a fe thlăk a, Etam lungpuia pûka chun a um a.
9 Filistinhai chu an inthok tung a, Judai rama chun an hang inkul a, Lehi hmun chen an inzar phei a. 10 Judai rama mihai chun, “Ieng leia keini mi bei dinga in hung inthok am a na?” an ta. Anni chun, “Samson man dinga hung inthok kan nih; kan chunga a thaw ang chara thaw ve kan tum a nih” an ta.
11 Chu phing leh Juda mi sangthum chu Etam lungpuia chun an zu fe a, Samson kuomah, “Filistinhai hi eini chunga rorêltu an nih ti i hriet naw maw? Kan chungah ieng top am a na i thaw ta hi?” an ta. Ama chun, “Ka chunga an thaw ang charin an chungah ka thaw ve a ni kha” a ta. 12 Anni chun, “Khuop a, Filistinhai kuta inhlàn ding chein kan hung a nih” an ta. Samson chun, “Nangni chun mi sukhlum lo dingin ka kuomah inkhâm phot ro” a ta. 13 Anni chun, “Sukhlum lo e, sienkhom khuop kan ti che a, an kutah kan pĕk ding chè a nih, that chu that teu nawng kan ti che” an ta. Chuongchun, hruol thar pahniin an khuop a, lungpui kaw kara inthok chun an hung thruoi suok a.
14 Lehi hmun an tlung chun Filistinhaiin an lo tuok a, an khĕk dur dur a. LALPA Thlarau chu a chungah thilthawtheinain a hung tlung a, a bân an zemna hrui hruol chu ziza zai, meia kăng rom angin a kuta inthok chun a hung tril thla trak trak a. 15 Sabengtung khâkru tharlâm a hmu a, a lâk a, chu chun mi sangkhat a vuok hlum a.
16 Samson chun,
“Sabengtung khâkru hmangin,
Ka that bŭm hnĕr hnûr a;
Sabengtung khâkru hmangin,
Mi sangkhat ka vuok hlum”
a ta.
17 A hril zo chun sabengtung rû chu a dehawn a; chu hmun chu Ramat Lehi (Khâkru Tlang) tiin an inbûk a.
18 Samson chu a dang a char êm leiin, “Nangin i siehlaw kut hi hmangin ropui takin i mi san suok a. Tu hin dangchara thiin sertan lohai kuta hin ka tlu lût el dim a ni?” tiin LALPA ko a. 19 Lehi hmuna khur chu a hung kak phut a, chu taka chun tui a hung inchik suok a. Samson chun a dawn a, a tha ngai putin a hung har nawk ta a. Chu tui hnar hmun chu En Hakore an inbŭk a, Lehi hmunah a la um zing.
20 Filistinhai vanglaiin Samsonin Israelhai chu kum sawmhni a thruoi a nih.