Samson le Timna nunghak
14
1 Samson chu Timna khuoah a zu fe a, Filistin nunghak pakhat a zu hmu a. 2 In tieng a hung inlawi chun a nu le pa kuomah, “Timna-ah Filistin nunghak pakhat ka hmu a, ka nuhmei dingin zu thruoi ro” a ta. 3 A nu le pa chun, “Ei sungkuo le ei chipuihai lai hin i lung kuoi zawng nunghak i hmu dèr naw am a ni, chuonga ser tan lo Filistinhai lai nuhmei ding i zu zong el ta chu?” an ta. Samson chun, “Mi thruoipêk el ro, ka’n koppui thei chi ding tak a nih” a ta. 4 (Chuong laia Israelhai chunga rorêltu chu Filistinhai an na, anni le an intauh thei dan remchang chu zonga chu thil chu LALPAN a thaw a nih ti chu a nu le pain an hriet si nawh.) 5 Samson chu a nu le pa leh Timna-ah an zu fe a. Timnaa grêp huon an tlung tawmin sakeibaknei vanglaiin a lo inrŭm khum thut a. 6 Samson chunga chun LALPA Thlarau thilthawtheina a hung tlung a, hriemhrei ieng khom chawi naw sien khom, kut ringotin sakeibaknei chu kèl tê ang elin a pot nawi a, sienkhom a thilthaw chu a nu le pa a hril nawh. 7 Chun, an zu tlung a, nunghak chu Samsonin a’n biekpui a, a dit hle a.
8 Iemani chen hnungah nunghak chu nei dingin an zu fe nawk a, sakeibaknei ruong chu en dingin Samson chu lam sirah a pêt vak a, a ruonga chun khuoiin bu an lo sep a, khuoizu khom a lo um a. 9 Khuoizu chu a lâk a, fe malamin a fâk pei a, a nu le pa a hnot phak chun anni khom a thren a pêk a, an fàk a, sienkhom sakeibaknei ruonga inthoka khuoizu chu a làk a nih ti a hril tawl nawh. 10 A pa chu nunghak inah lengin a zu biek a, chu taka moneituhai thaw hlak dan angin Samsonin ruoi a thre a. 11 Samson an hmu charin a ruol ding tlangval sawmthum an hung thruoipek nghàl a.
12 Samson chun an kuomah, “Tu hin thu khirh ka’n don ding chĕu a nih. Ruoi thrè hun ni sari sunga a donna in mi hril thei chun puon zai inhmi thlè sawmthum le silfen sawmthum pe’ng ka ti chêu. 13 A donna in mi hril thei naw chun puon thlê sawmthum le silfen sawmthum in mi pèk ding a nih” a ta. Anni chun, “Thu khirh chu mi hang hril ta la, lo ngaithlang kan tih” an ta.
14 Ama chun,
“Fatua inthoka fak ding iemani suok,
Hrât taka inthoka thil thlum iemani suok”
a ta. Ni thum sungin an don thei nawh.
15 A ni linaa chun Samson nuhmei kuomah, “Hi thu khirh hi mi hrilfie dingin i pasal hi thlût rawh, chuong naw chun nang le i pahai sungkuo hi kan raw hlum el ding chĕu a nih. Mi rok dingin a ni maw hi taka hin in mi fiel?” an ta. 16 Samson nuhmei chun trap pumin a zuot a, “I mi lo theidâ hlè a ni hi tie! I mi lo hmangai tak tak naw top hih. Ka chipuihai thu khirh tak i’n don a, kei hlak a hrilfiena khom i mi hril nuom si nawh” a ta. Ama chun, “La to ta la, ka nu le pa khom la hril loin nang ka hril ding che maw?” a ta. 17 Ruoi thrè hun ni sari sung chun a hmaah trapin a thlût ngat ngat leiin a ni sarina chun a hril ta a, ama chun thu khirh umzie chu a chipuihai kuomah a hril sawng a.
18 A ni sarina nisa tlâk hma chun a khaw mihai chun a kuomah, “Khuoizu nĕka thlum lem iem a na? Sakeibaknei nêka hrat lem iem a na?” an ta. Samson chun an kuomah,
“Ka bawngla sorin lei inlet naw inla,
Ka thu khirh hre suok teu naw ti niu”
a tipèk tawl a.
19 LALPA Thlarau chu Samson chungah thilthawtheinain a hung inlang a. Askelon-ah a fe thlăk a, mi sawmthum a that a, an thuom a hlippek a, thu khirh hrilfietuhai kuoma chun silfenhai chu a pêk a, lungsen êrin a pa in tieng chun a kîr nawk ta a. 20 Samson nuhmei chu inneinaa Samsonin thriena a hmang kuomah an lo pêk lem el ta a.