Samson pieng thu
13
1 Israel thlahai chun LALPA mithmuin thil suol an lo thaw nawk ta a, LALPAN Filistinhai kutah kum sawmli a’n umtir a.2 Zora khuoah Dan hnama mi, mi pakhat a um a, a hming chu Manoa a nih. A nuhmei chu a ching leiin nau boin an um zing a.
3 LALPA vantirko chu nuhmei kuoma chun a hung inlăr a, a kuomah, “Ngai ta, i ching a, nau i la pai ngai naw a, sienkhom inrâi i ta, naupa nei i tih. 4 Chuleiin, fimkhur raw khai. Uoiin le zu hrim hrim dawn naw la, fak thieng lo thil hrim hrim fa bok naw rawh.
5 A nih, inrâi i ta, naupa i nei ding a ni si a. A lua chun sam vawna hmangruo hrim hrim i hmang ding a ni nawh, chu naupang chu sula a um laia inthoka Pathien ta dinga ser hrang Nazarit mia a ni ding a ni si a; ama chun Filistinhai kuta inthoka Israelhai san suokna sin chu hung tran a tih” a ta.
6 Nuhmei chun a pasal kuomah, “Pathien mi, mi pakhat ka kuomah a hung a, a hmêl chu vantirko hmêl anga inzaum a na, a hungna hmun ka’n don naw a, a hming khom a mi hril bok nawh. 7 Ama chun ka kuomah, ‘Ngai ta, inrâi i ta, naupa nei i tih. Uoiin le zu hrim hrim dawn naw la, fak thieng lo hrim hrim fa bok naw rawh. Naupang chu sula a um laia inthoka Pathien ta dinga ser hrang Nazarit mi a ni ding a ni si a’ tiin a mi hril a” a ta.
8 Manoa chu LALPA kuomah a trongtrai a, “Aw LALPA, lunginsiet takin Pathien mi i hung tir kha ka kuomah hung tir nawk la, naupang hung pieng ding chu ieng tin am kan enkol ding ti mi hung inchûktir raw se” tiin a hni a. 9 Manoa thil hni chu Pathienin a lo ngaithlak a, a nuhmei chu phûla a thrung laiin a kuomah Pathien vantirko a hung inlăr nawk a, a pasal Manoa ruok chu a kuomah a um ve naw a. 10 Nuhmei chu inhmaw takin a tlân a, a pasal a va hril a, “Ngai ta, ni khat laia ka kuoma inlâr kha a hung inlàr nawk ta ie” a ta. 11 Manoa chu a tho a, a nuhmei chu a zui a, chu mi kuom chu a va tlung a, a kuomah, “Nang hi i ni maw nuhmei kuoma thu hriltu chu?” a ta. Ama chun, “Ni e” a ta. 12 Manoa chun, “I thu anga a hung tlung pha, naupang zawm ding le thaw ding thilhai chu iem ni tang a ta?” tiin a’n don a. 13 LALPA vantirko chun, “I nuhmei kuoma ka hril ta po po ang khan thaw raw se. 14 Grêp hruia inthoka suok hrim hrim a fâk ding a ni naw a, uoiin amani zu amani le fàk thieng lo hrim hrim dawnin a fâk ding a ni bok nawh. Thu ka pĕk ta po po kha vong thra raw se” a ta.
15 Manoa chun LALPA vantirko kuomah, “Lunginsiet takin i ta dinga kèl tuoi ka buotsai zo chenin mi la um pêk hràm la tiin ka thlo che a nih” a ta. 16 LALPA vantirko chun, “In mi la thlo tàng a ni khomin i bu chu fa naw ning. Pumraw thilhlân i buotsai tum a ni chun LALPA kuomah inhlăn lem rawh” a ta (Manoa chun LALPA vantirko a nih ti a hriet si nawh).
17 Manoa chun, LALPA vantirko kuoma chun, “I thuhrilhai hi a hung tlung kim pha kan chawimawi theina ding chein i hming mi hril thei i tim?” a ta. 18 LALPA vantirko chun, “Ieng dinga ka hming i mi’n don am a na? I hriet thiem phăk ruol ding a ni nawh” a ta. 19 Manoa chun kèl tuoi chu a lâk a, bu le bâl thilhlân leh lungpui chunga chun LALPA ta dingin a’n hlàn a. Vantirko chun thil mak tak a thaw a, Manoa le a nuhmei chun an thlîr zing a. 20 Maichăma inthoka meichok van tienga a fe tung lai chun LALPA vantirko chu meichoka chun a kai tung a. Manoa le a nuhmeiin chu chu an hmuin hnuoiah an bokkhup a. 21 LALPA vantirko chu a hung inlang nawk ta naw phing leh Manoa le a nuhmei chun LALPA vantirko a nih ti an hriet chauh a nih.
22 Manoa chun a nuhmei kuomah, “Pathien ei hmu ta si a, ei thi ngèi ngéi ding a nih” a ta. 23 A nuhmei chun, “LALPAN a mi sukhlum ding ni sien, ei pumraw thilhlàn le bu le bâl thilhlànhai kha pom naw ni a, hieng thil po po hi mi’n hmutirin mi hril bok naw nih” a ta.