Jeftha le Efraim
12
1 Efraimhai chu an pung khawm a, Jordan vadung chu Zafon hmunah an kăn phei a, Jeftha kuoma chun, “Ieng dinga Amon thlahai bei dinga i hung phei lai khan i kuoma hung ve dinga i mi fiel naw hrim hrim am a na? I in leh kan raw ding chè a nih” an ta.2 Jeftha chun, “Kei le ka mipuihaiin Amonhai hi thei tawp suoin kan do a, nangni khom kan inchà chêu a, sienkhom an kuta inthokin tu khomin in mi hung san suok nawh. 3 In mi hung san naw ding a nih ti ka hmu chieng phing leh thi ngamin ka thrang a, Amon thlahai bei dingin ramri kânin ka hung a, LALPAN an chungah hnĕna a mi pĕk a nih. Chu chu ni siin, ieng dinga mi bei dinga voisun hin in hung inthok am a na?” a ta.
4 Jeftha chun Gilead mihai chu a khawm a, Efraimhai chu a bei a. Efraimhai chun Gilead mihai chu, “Nangni Gilead ruol, Efraim le Manase hnama inthoka tlan hmang ruol mei mei” an ti hlak leiin Gilead mihai chun Efraim mihai chu an that treu el a. 5 Gilead mihai chun Efraimhai ram dep Jordan vadung kaia mi hung taphot chu an lo man a. Efraim mi tlan hmanghai chun, “Hung kai kan ti aw” an ti zătin, “Efraim mi in ni am?” an lo ti pei a. Anni chun, “Kan ni nawh” an ti leh, 6 “An leh, ‘Shibboleth’ hang ti ta” an ta, anni chun an lam chieng thiem naw leiin ‘Siboleth’ an ti nawk hlak a. A lam fie thiem naw po chu an lo man a, Jordan vadung kaia chun an that pei a. Chu trum chun Efraim mi singli le sanghni an that a.
7 Jeftha chun Israelhai chungah kum ruk ro a rĕl a. Chuongchun, Gilead mi Jeftha chu a thi a, Gilead rama khaw pakhatah an phŭm a.
Ibzan, Elon le Abdon
8 Ama hnungah Bethlehem khaw mi Ibzan chun Israelhai chungah ro a hung rĕl a. 9 Ama chun naupa sawmthum le naunu sawmthum a nei a. A naunuhai chu anni pahnam sunga mi ni lo pasalah a’n neitir vong a, a naupahai khom chu anni pahnam sunga mi ni lo vong nuhmeiah a’n neitir a. Ibzan chun Israelhai chu kum sari a thruoi a. 10 Chun, Ibzan chu a thi a, Bethlehemah an phŭm a.
11 Ama hnungin Zebulun mi Elon chun Israelhai chu kum sawm a thruoi nawk a.
12 A thi chun Zebulun ram Aijalon-ah an phŭm a.
13 Ama hnung chun Pirathon khaw mi Hilel naupa Abdon chun Israelhai a hung thruoi nawk a. 14 Ama chun naupa sawmli le tupa sawmthum, sabengtung tuoi sawmsari chunga chuong hlak, a nei a, Israelhai chungah kum riet ro a rĕl a. 15 Pirathon mi, Hilel naupa Abdon chu a thi a, Efraim ram, Amalek-hai umna tlangram Pirathon khuoah an phŭm a.