Abimelek
9
1 Jerub-Baal naupa Abimelek chu Sekem khuoa a nû tràhai kuomah a fe a, a puhai sungkuo po po kuoma chun, 2 “Sekem mihai hin ‘Jerub-Baal nauhai po po mi sawmsarihaiin in chunga ro an rèl am, an naw leh mi pakhat chauin a rĕl thra in ti lem?’ ti indon ro. Kei hi in thisen inzompui ka nih ti hre zing bok ro” a ta.3 A nû tràhai chun Sekem khaw mi po po hrietah chu thu chu an hril a, “Ama hi kan unaupa a nih” an ti leiin Abimelek chu zui nuomna lungril an hung put ta a. 4 Baal-Berit tempula inthoka tangka sekel sawmsari an pèk chun mi hmangna bo le tawrot tak tak a ruoi a, chuonghai chun a hnung an zui a. 5 Ofra khuoa a pa inah a fe a, Jerub-Baal naupahai, ama unauhai ngei sawmsari chu lung pakhat chungah a that a, Jerub-Baal naupa a tlum tak Jotham ruok chu a lo inbi hmang leiin a him a. 6 Chuongchun, Sekem khuo le Bet Milo khuoa mi po po chu Sekem lungphun bula saisuo thing lien hnuoia chun Abimelek chu lala siem dingin an inkhawm a.
7 Chu thu Jothamin a hriet chun Gerizim tlang sîpah a hang ngir a, rawl inring taka khêkin, “Nangni Sekem khaw mihai, ka thu hi ngaithla unla, Pathienin nangni thu khom ngaithlang a tih. 8 Voi khat chu lal thlang dingin thing po po an fe khawm a, oliv thing kuoma chun, ‘Kan lalah nang um rawh’ an ta. 9 Oliv thing chun, ‘Pathien le mihriemhai ka chawimawi thei phăna tak ka thau hi suoksanin thing chunga lalah ka um ding maw?” a lo tipek a. 10 Thinghai chun theichang kuomah, ‘An leh, nang hung la, kan lalah hung um el rawh’ an ta. 11 Theichang chun, ‘Ka rà thlum tak le inhnik tak hi suoksanin thing chunga lalah ka um ding maw?” a lo ti pĕk nawk a. 12 Thinghai chun grep kŭng kuomah, ‘Chuong an leh nang hung la, kan lalah hung um el rawh’ an ta. 13 Grep kŭng chun, ‘Pathienhai le mihriemhai suklawmtu ka uoiin hi suoksanin thing chunga lalah ka um ding maw?’ a lo tipek nawk pei a. 14 A tawpah thinghai chun hling kuomah, ‘Hung la, kan lalah hung thrang el rawh’ an ta. 15 Hling chun, ‘Lala hriek nal in mi nuom tak tak a ni chun ka buk hnuoia hin hung inbi unla, in ni naw chun ka buka inthoka mei hung suok chun Lebanona sidar thing po po kang fai vong raw se’ a ta.
16 “Tu hin ka thu hi ngaithla ro. Lal dinga Abimelek in thlang khan indik tak le titak zeta in thaw a ni? In chunga Gideon-in a thawpek chêu ang phûin, ama hriet zingna le inzăna dingin Gideon le a sungkuohai chungah ieng am in thaw ve a? 17 Midianhai kuta inthoka san suok ding chêuin ka pa khan a hringna chăn huomin in ta dingin a lo bei a nih ti hre zing ro. 18 Voisun ruok hin chu ka pa sungkuohai chungah helin, lungphek pakhat chungah a naupa sawmsarihai chu that sien khom, in unaupa a ni lei ringotin a bawinu naupa Abimelek chu Sekem khaw mihai chunga lalah in lo siem ta hi. 19 Tuta Gideon le a sungkuohai chunga in thaw hi indik tak le ti tak zeta in thaw a ni chun, Abimelek chunga hin in lung awi sien, ama khom nangni chungah a lung awi raw se.
20 Chuong chu a ni si naw chun, Abimeleka inthoka mei suok chun Sekem le Bet Millo mihai po po hi kang hmang sien, chu chu a ni si naw leh Sekem le Bet Milo mihaia inthoka mei suok chun Abimelek chu kang hmang ve thung raw se” a ta. 21 Jotham chun a unaupa Abimelek chu a trì leiin Beer-ah a tlân a, chu taka chun a um ta zing a.
22 Abimelek chu Israelhai chungah kum thum a’n lal a. 23 Pathienin Abimelek le Sekem khaw mihai inkarah thlarau suol a’n tlăktir a, a khaw mihai chu Abimelek chungah dawhain an che a. 24 Abimelekin rawng taka Jerub-Baal naupasal sawmsari a thatna chunga le a unauhai that dinga a kut lo sukhrattu Sekem khaw mihai chungah phuba lak a ni theina dinga chuong thilhai chu Pathienin a thaw a nih. 25 Chuongchun, ama khingtu Sekem khaw mihai chun mi hung taphot lambuna lo suomtu dingin tlang sîpa chun mi an sie a, chu thu chu Abimelek kuomah an hril a.
26 Ebed naupa Gaal chu a unauhai leh an hung inthok a, Sekem-ah an lut a, Sekem khaw mihai chun an lo inhnĕmpui hle a. 27 Grêp huonah an fe a, an lo a, an chìl a, an pathien tempula chun kût an hmang a. 28 Faa an dawn lai chun Ebed naupa Gaal chun, “Tu am a na Abimelek in ti chu? Sekem khom chu tu am a na, chuonga a hnuoia ei hang kûn el ding chu? Jerub-Baal naupa an naw maw? Zebul hi a kaiza vengtu a ni naw am a ni? Sekem pa Hamor mihai rong bawl lem ro. Ieng leiin am Abimelek rong chu ei bawl ding? 29 Hieng mihai hi ka thu hnuoia um ni hai sien chu aw, Abimelek kuomah, ‘I sipai po po leh hung inthok rawh’ ti’ng ka ta, ka lo intlawm vong el ding a ni si a” a ta.
30 A khaw rorêltua um Zebul-in Ebed naupa Gaal thu hril a lo hriet chun a lung a sen hle a. 31 Arûkin Abimelek kuomah mi a tir a, “Ebed naupa Gaal le a unauhai Sekemah an hung a, a khaw mihai i laka helpui tumin an infuipor a nih. 32 Chuleiin, i mihai leh a zân a zânin hung unla, phŭlah lo inchăn ro. 33 Zing tieng nisa suok charin khuo chu hung bei unla, Gaal le a mihaiin do ding chea an hung suok pha leh i nuom ang angin lo thaw tawl rawh” tiin thu a’n cha a.
34 Abimelek le a sipai po po chu a zân a zânin an hung inthok a, pawl lia inthrèin Sekema chun arûkin thranghmun an khaw a. 35 An lo inchăn rŭkna hmuna inthoka Abimelek le a sipaihai an hung suok lai tak chun Ebed naupa Gaal chu a fe suok a, khawpui lutna kotpuia chun a ngîr a. 36 Gaal-in anni rawi a hmu chun Zebul kuomah, “En ta, tlâng sîpa inthokin mipui an hung chim thla a ni saw” a ta. Zebul chun, “Tlâng hlim saw mihriem i sawn mei mei a ni chu” a ta. 37 Gaal chun, “En hman rawh, ram lailung taka inthokin mipui an hung suok saw! Pawl khat lem chu aienthiem saisaw bul tienga inthoka hung an ni saw!” a ta.
38 Zebul chun a kuomah, “Kha hmaa, ‘Tu’m a na Abimelek, a rong kan bawl ding chu?’ tia i’n hrosa pùng púng kha iem umzie a nei a? Hienghai hi nuizat bûra i hmanghai kha an ni naw am a ni? Suok la, va’n beipui tawl raw leh” a ta.
39 Chuongchun, Gaal chun Sekem mipuihai chu a ko suok a, Abimelek le chun an inbei ta a. 40 Abimelek chun Gaal chu khawpui kot bul chen a hung hnot a, mi tam tak hliemin an tlu a. 41 Abimelek chu Aruma khuoah a’n kul a, Zebul chun Gaal le a unauhai chu Sekema inthok chun a hnot suok a.
42 A zinga chun Sekem mipui chu phŭlah an fe a, chu thu chu Abimelek an hril a. 43 A mihai a thruoi a, pawl thumin a thre a, phŭla chun arûkin a’n chăntir a. Mipui hung suok an hmu chun an lo bei a. 44 Abimelek le a pawlhai chu a hmatawnga thrangin khawpui lutna kotpui chen an hung hnot a, pawl hni danghai chun phûla hunghai chu an lo bei a, an lo that tawl a. 45 Abimelekin khawpui chu sunnithlakin a bei a, a lâk a, a sunga mihai chu a that a, khawpui chu a suksiet vong a, chi a phul khum a.
46 Sekem kula um po poin chu thu an lo hriet chun El-Berit tempula kulbingah an tlàn lut vong a. 47 Chu taka chun an inbeng khawm ti Abimelekin a lo hriet a. 48 Chuongchun, a mihai leh Zalmon tlang a kâi a, hrei a chawi a, thing kău a sât thlak a, a put a. A mihai kuoma chun, “Inhmaw ro, ka thaw ang hin thing kău sât unla, put seng ro” a ta. 49 A mihai po po chun thing kău an sàt thlak a, an put seng a, a hnung chu an zui a, kulbing vela chun an thing kău put chu an bum khawm a, an raw a, Sekem kula um po po chu an raw hlum a, nuhmei le pasal an rêngin sang khat lai an nih.
50 Chu zoah Abimelek chu Thebez khuoah a fe a, a’n huol a, a lâk a. 51 A khaw sunga chun kulbing a um a, chu taka chun a khaw mi po po, a nuhmei a pasalin, an tlàn lut a, kot an inkal khum a, kulbing sanga chun an lawn kai a. 52 Abimelek chun kulbing sang chu a hang bei a. 53 Kulbing chu raw dinga a kotpui tieng a pan lai chun nuhmei pakhatin a lu chungah bu rawtna lung a zuk thlak a, a lû a deng koi a. 54 Ralthuom chawitu tlangval chu a ko nghal a, “I kawlhnâm kha phawi la, mi sun hlum rawh, ‘Nuhmeiin a that a nih’ an mi ti nawna dingin” tiin thu a pêk a. Tlangval chun a sun tlang pop a, a thi ta a. 55 Israelhaiin Abimelek a thi tah ti an hmu chun mani in tieng an inlawi ta seng a.