Tola
10
1 Abimelek hnunga chun Israelhai san suok dingin Isakar hnama mi Dodo naupa Pua, Pua naupa Tola chu a hung suok a, Efraim tlang ram Samir khuoah a um a. 2 Kum sawmhni le kum thum Israelhai chungah ro a rèl hnungin a thi a, Samir khuoah an phŭm a.Jaira
3 Chu hnung chun Gilead mi Jair a hung suok a, kum sawm hni le kum hni sung Israel chungah ro a rĕl a. 4 Ama chun naupa sawm thum, sabengtung tuoi sawm thum chunga chuong hlak mi a nei a, Gilead rama khaw sawm thum chungah ro an rĕl a, chuonghai chu tu chen hin Havot-Jair an tih, 5 Jair chu a thi a, Kamon khuoah an phŭm a.
Jeftha
6 Israel thlahai chun LALPA mithmuah thil suol an lo thaw nawk ta a. LALPA chu nghatsanin, a rong bawl ta loin, Baal dam, Astoret dam, Aramhai pathien dam, Sidonhai pathien dam, Moabhai pathien dam, Amonhai pathien dam, Filistinhai pathien dam rong chu an bawl ta lem a. 7 Chuleiin, an chungah Pathien a lungsen hle a, Filistin-hai le Amon-hai kutah a zor a. 8 Chu kum chun an hung hnĕ băn a, an sirsop nasa hle a. Kum sawm le kum riet sung chu Jordan ral Gilead biel Amor mihai rama chêng Israel thlahai po po chu an nĕksăwr a. 9 Amon-hai chun thlang tienga um Juda hai, Benjamin hai le Efraim sungkuohai chu do dingin Jordan an kăn a, Israelhai chu nasa takin an lungzing a. 10 Chu phing leh Israel thlahai chun, “Kan Pathien chu kan lo nghatsan a, Baal rong dam kan lo bawl tàk leiin i chungah thil suol kan lo thaw a nih” tiin LALPA an ko a.
11 LALPA chun Israel thlahai kuomah, “Aigupta mihai, Amor mihai, Amon mihai, Filistin mihai, 12 Sidon mihai, Amalek mihai, le Moan mihaiin an nĕksăwr chêua in mi ko khan an kuta inthokin ka san suok hlak naw chêu am a ni? 13 Sienkhom mi nghatsanin pathien danghai rong in bawl a, chuleiin, san suok ta naw’ng ka ti chêu. 14 In thlang lem pathienhai kuoma chun fe unla, anni chu ko khêk ta unla! In lungzing pha leh annin hung san suok cheu raw hai se chu!” a ta.
15 Nisienlakhom, Israel thlahai chun LALPA kuomah, “Thil suol kan lo thaw tah a na, kan chungah thra i ti ang angin thaw la, amiruokchu tu hin chu mi san suok lul rawh” tiin an ngên trăl a. 16 Hnam dang pathien an kolhai po po chu an sie hmang vong a, Pathien rong an bawl a, Israelhai rimsikna chu a tosan săwt thei nawh.