Zeba Le Zalmuna
8
1 Efraim-hai chun Gideon kuomah, “Iengtiziea hienga hi i mi thaw am a na? Midianhai i do ding khan ieng dinga i mi ko ve naw am a na?” tiin an suosal nasa hle a. 2 Ama chun, “Nangni thaw le hrilkhi chun ka thaw ve hi ieng khom a ni nawh. Abiezar pahnamhai grêp lo nêkin Efraim hnamhai grep lo threlh zong chu a hlawk lem dai an naw maw? 3 LALPA chun Midianhai lal Oreb le Zeeb hai chu in kutah a’n hlàn a. Nangni leh iem tekhi tlâk ka nih?” a ta. Chu phing leh an lungsen chu a rè tah a.4 Gideon le a kuoma mi za thumhai chun Jordan vadung an tlung a, an kăn a, chău ta hle hai sien khom an hnot pei a. 5 Sukot khuoa mihai kuoma chun, “Ka sipaihai lunginsiet takin beipĕr pe ro khai. An chău ta hlea chu Midianhai lal Zeba le Zalmuna hai chu ka la hnotpui pei tum si a” a ta. 6 Sukot khaw hotuhai ruok chun, “Zeba le Zalmuna hai chu i kuta um an ni ta’m a ni? Ieng leiin am i sipaihai chu bei kan pèk ding?” an ta. 7 Gideon chun, “Aw leh, chu lei tak chun, LALPAN Zeba le Zalmuna hai ka kuta a mi pĕk phâ chu thlalĕr hling le dai hlinghai chun in taksa la sun thlĕr neng nung ka tih” a ta. 8 Chu taka inthok chun Peniel-ah a hang fe a, a hni ngai bok chu a hang hni a, sienkhom Sukot mihai ang bokin an lo don a. 9 Penielhai kuoma chun, “Hnĕna changa ka hung kir nawk pha leh hi kul hi hung sukchim ka tih” tiin a hril bok a.
10 Zeba le Zalmuna chu Karkor-ah an sipai sing khat le sang nga leh an inkul a, chuonghai chu khaw sak sipai hunghai laia la dam um sun chu an nih, kawlhnâm chawi mi nuoi khat le sing hni chu an thi ta si a. 11 Noba le Jogbea sak tienga um ran vêngtuhai hraw hlak lam hluia chun fein, Gideon chun inring lawk dĕr loa um sipaihai chu a hang bei thut a. 12 Midian lal pahnih, Zeba le Zalmuna hai chu an tlansie a, sienkhom a hnot a, a man ve ve a, an sipaihai po po chu a tukdol vong a.
13 Joas naupa Gideon chu indonaa inthok chun Heres kawnah a hung kir thla a. 14 Sukot mi tlangval pakhat chu a man a, thu an don a, Sukot khaw hotuhai le upahai hming an ziektir vong a, an rêngin sawmsari le pasari an nih. 15 Sukot mihai kuoma chun a hang fe a, “Zeba le Zalmuna hi en ta u, hieng mihai hi annawm, ‘Zeba le Zalmuna hai i kuta um ta ang ziezanga i mi chauhai beiper kan hang pek ding chu!’ tia in mi ti-elna hai kha an ni hi” a ta. 16 A khaw upahai chu a thruoi a, Sukot mihai mithmuah thlalĕr hling le dâi hlinga hrûtin a hrem a. 17 Peniel khaw kul chu a sukchim a, a sunga umhai chu a that a.
18 Gideon chun Zeba le Zalmuna kuomah, “Tabor tlanga in mi thathai kha mi ieng ang am an ni a?” tiin a’n don a. Anni chun, “Nangma ang char, lal nau hmêl put vong an nih” an ta. 19 Gideon chun, “Khanghai kha ka unauhai, ka nu sula inthoka pieng ve ngei an ni kha. An hringna lo hlà chu ni unla, LALPA hring zing hmingin, in hringna ka hlà ve âwm vei leh!” a ta. 20 A nau upa tak Jether kuoma chun, “That tawl raw leh” a ta. Jether chu naupang a la ni leiin a tri a, a kawlhnâm a phawi ngam naw a. 21 Zeba le Zalmuna chun, “Nang kha hung la, mi hung that ta la; patling sin thaw ding chun patling thâ a ngai annawm” an ta. Gideon chu a tho a, Zeba le Zalmuna chu a that a, an sanghawngsei nghawnga thil chei an inortirhai chu a lâk a.
22 Mihai chun Gideon kuomah, “Midianhai lakah i mi san suok leiin kan chungah nangin ro rêl ta rawh, i nauhai le i tuhai chen khom rorêltuah um raw hai se” an ta. 23 Gideon ruok chun, “In chungah ro rêl naw ning, ka nauhai khomin rêl naw ni hai; LALPAN in chungah ro rêl lem a tih” a ta. 24 Gideon bokin an kuomah, “Thil pakhat ruok chu hni chêu ka nuom: mi tinin in ràllàk nabê mi pe seng ro” a ta. (Ismael thlahai chun rangkachak nabê bè an chîng hrim a nih.) 25 Anni chun, “Pe mol kan ti che” an ta, puon an pha a, mi tinin an ràllàk nabê chu an deng khawm a. 26 Rangkachak nabê an pek khawm po po rikzie chu kilogram sawmhni văng a na, chu taka chun Midian lalhaiin incheina man to an bè le khaidiet an hlì chi dam, puon sen duk an silhai dam le an sanghawngsei rînga khaidiet an inhlitirhai dam chu tiem sà lo a nih. 27 Chuong rangkachaka inthok chun Gideon-in Efoda a siem a, a umna khuo Ofra-ah a sie a, chu chu Israel mihai po po chun bein an uire a, Gideon le a sungkuohai ta dinga châng a hung inchang ta a.
Gideon thi thu
28 Chuong ang chun Midianhai chu Israel thlahai hmaah tukdolin an um a, lû an ling nawk thei ta ngai nawh. Gideon dam sung chun ram chu kum sawm li sung ralmuongin a um a. 29 Joas naupa Gideon chu a ina um dingin a kir nawk a. 30 Nuhmei a hau leiin nau pasal khom sawmsari a nei a. 31 A hmei, Sekema um khomin nau pasal a nei a, a hming chu Abimelek a nih. 32 Joas naupa Gideon chu tar kûna damin a thi a, chuongchun Abiezar mihai khuo Ofra-a chun a pa Joas thlănah an phŭm a.
33 Gideon a thi charin Israel thlahai chu Baal lakah uirein, Baal-Berit chu pathienah an biek el ta a. 34 Sîr tina um an hmĕlmahai po po laka sansuoktu LALPA an Pathien chu Israel thlahai chun an hriet fuk ta nawh. 35 An ta dinga thil thra tam tak thawpektu Jerub-Baal (Gideon) sungkuohai chunga khom Israelhai chun thrat an insuo zui chuong bok nawh.