4 Sienkhom, LALPA chun Gideon kuomah, “Mi an la tam taluo rop. Vadungah thruoi thla vong la, keiin thlierpêk ka ti che. Keiin, i kuoma hung ding ka ti po hung an ta, hung lo ding ka ti po kîr nawk raw se” a ta. 5 Chuongchun, a mihai chu Gideon-in vadungah a thruoi thlak a. Chu taka chun LALPAN, “Khûpa thringthri puma tui dawn a, ui anga leia a lieka liek taphot chu sie hran la; chuong ang boka kûna thringthria tui dît taphot hai chu sie hrang bok rawh” a ta. 6 Kut phaa mi a lieka liek mi zathum an um a, mi dang po chu kûna thringthria tui chu a dìta dît vong an nih.

7 LALPA chun Gideon kuomah, “Mi zathum, a lieka liekhai kha hmangin ka sandam ding chĕu a na, Midianhai hi i kutah ka pêk ding a nih. Mi dang po po chu an umna hmun sengah inkirtir nawk rawh” a ta. 8 Israel mi zathum ti chauh naw chu an puon in tieng Gideon chun a tirkir vong a, tawtawrawt le fak ding an chawihai ruok chu mi zathum chun an kol a. Midianhai chu an hnuoi ruoma chun an inkul a.

9 Chu zân chun LALPAN Gideon kuomah, “Tho la, an inkulnaah trum thla rawh, anni chu i kutah ka pêk ding a nih” a ta. 10 Amiruokchu, makhâta zu fe i tri chun i siehlaw Pura le hin an inkulnaa chun zu fe phot unla; 11 chuongchun an thu hril hrieng i ta, chu chun i kut sukhrât a ta, an kula chun fe ngam ta’ng i tih” a ta. Chuongchun, a siehlaw Pura le chun kula râl vênghai umna tontir taka chun an zu fe a. 12 Midian hai, Amalek hai le khaw sak mihai chu ruoma chun khau hon ang topin an lo um khup el a, an sanghawngseihai ringot khom tuipui kama trieu angin hang tiem seng ding a ni nawh.

13 Gideon a zuk tlung lai chun mi pakhat hin a ruolpa chu a mang a lo hril a: “Ngai ta, mang ka lo nei a, barli bei tlang hi Midianhai kul tieng a hung inhlum a, puon ina hin a’n hlum lùt a, a del chim a, a del pêr vong el a” a ta. 14 A ruolpa chun, “Chu chu Israel mi Joas naupa Gideon kawlhnàm naw chu thil dang ni naw nih. Pathienin Midianhai le an sipaihai po po hi a kutah a pêk tah a ni chuh” a ta.

15 Mang le a hrilfiena thu Gideon-in a hriet chun Pathien a chawibiek a. Israelhai inkulna hmuna chun a kir nawk a, “Tho ro leh, LALPAN Midian sipaihai chu in kutah a pêk tah a nih” a ta. 16 Mi za thum chu pawl thumin a thre a, an rêng chun tawtawrawt le bêl ruok, a sunga meiser sie sa chu a pêk seng a. 17 Ama chun an kuomah, “Mi en unla, ka thaw ang ang hin in thaw ve pei ding a nih. Kul hmatâwng tak ka tlung pha leh, ka thaw ang angin hung thaw seng ro. 18 Kei le ka kuoma um po poin tawtawrawt kan mut phât leh, kul vêla umhai po po khomin tawtawrawt mût unla, ‘LALPA ta ding le Gideon ta dingin’ tiin khêk seng ro” a ta.

19 Gideon le a kuoma um mi zahai chun zan ril hma thret, diuti an inthlak zo charin an kul tlăng chu an tlung a, an tawtawrawt an mŭt a, an bĕl chawi an vuok koi a. 20 An pawl thum chun tawtawrawt an mût a, an bèl chawi chu an sukkoi a, voi tiengin meiser an chawi a, chang tiengin tawtawrawt an chawi a, “LALPA le Gideon kawlhnâm” tiin an khèk dur dur a. 21 A kul huol tuok chun mani hmun sengah an ngìr a, Midianhai chu thlabâra khêkin an tlanse hum hum a. 22 Tawtawrawt za thum chu an hang mût a, kul sunga umhai chu LALPAN anni le anni kawlhnâmin a’n sattir a. Sipaihai chu Zerera tieng Bet-Sitta-ah an tlăn a, Tabat bula Abel Mehola ramri chen an tlung a. 23 Israelhai chu Naftali hai, Asera hai le Manase hai biela inthok chun an hung pung khawm a, Midianhai chu an hnot a. 24 Gideon chun Efraim tlangram po poah, “Hung thla unla, Midianhai hi hung bei unla, anni lâk hmain Jordan vadung le Bet-bara chen hi hung la khal vong ro” tiin thu a thon a, mi a’n tlantir a. Chuongchun, Efraimhai chu an hung pung khawm a, Bet-Bara chenin Jordan vadung suk chu an lo lak khal vong a. 25 Midian lal pahnih, Oreb le Zeeb chu an man a, Oreb chu Oreb lungpuiah an that a, Zeeb chu Zeeb grep săwrna khurah an that bok a. Midianhai chu an hnot a, Oreb le Zeeb lu an lak chu Jordan vadung rala um Gideon kuoma chun an hung chawi a.