7 Midianhai leia Israelhai khĕk ri chu LALPAN a lo hriet a, an kuomah zawlnei a hung tir a. 8 Zawlnei chun, “LALPA, Israelhai Pathien chun hieng hin a tih: ‘Aigupta bawia inthokin ka thruoi suok chêu a, 9 Aiguptahai kuta inthoka hnûk thlain, a nêksawrtu chêu po po kuta inthoka san suokin, anni chu in hmaa inthokin ka hnot suok a, an ram ka pêk chĕu a. 10 ‘Kei hi LALPA in Pathien chu ka na, hieng in umna ram neitu Amor mihai pathien hi be naw ro’ ka ti a, sienkhom ka thu in ngaithlak si nawh’ a tih” tiin a hril a.

11 LALPA vantirko chu Ofra khuoah a fe a, Abiezar mi, Joas saisaw thing bula chun a thrung a, Joas naupa Gideon chun Midianhai hmu thei lo dingin grep săwrna khura chun bu a lo chǐl a. 12 LALPA vantirko chu a kuomah a hung inlăr a, “Nang mi hrât le huoisen, LALPA chu i kuomah a um” a ta. 13 Gideon chun, “Aw pu, LALPA kan kuomah a um si chun, iengtiziea hienga kan chungah thil a tlung si am a na? Kan thlatuhai khan LALPAN Aiguptaa inthokin a mi thruoi suok thu an hril chănga a thil mak thaw an mi hril zozaihai kha khaw lam iem a chang zo an ta a? Tu hin chu LALPAN a mi nghatsan dĕr ta a, Midianhai kutah a mi pèk an ta hi” a ta.

14 LALPA chu ama tieng a hung ngha a, a kuomah, “I hrâtna kol leh hin fe la, Israelhai chu Midianhai kuta inthokin va san suok rawh tiin ka tir chê a ni hih” a ta. 15 Gideon chun, “Ieng tin am Israelhai chu sansuok thei telul ka ta? Kan sungkuo hi Manase thlahai lai khom a che thei naw tak kan ni a, kei hlak hi kan unauhai laia a tlum tak ka ni nawk bok si” a ta. 16 LALPA chun, “I kuomah ka um ding annawm; Midianhai chu a ruolin hem thlu vong i tih” a ta. 17 Gideon chun, “I mit ka tlung ta rau rau si hin chu, a mi betu hi nang ngei i nih ti hrietna dingin inchikna mi pe rawh. 18 I hmaa ka thil inhlàn ding chawia ka hung kir hmâ khat chu hi taka hin lunginsiet takin mi lo la umpêk zing rawh” a ta. LALPA chun, “I hung kir nawk hmâ khat chu lo nghăk ka ti che” a ta.

19 Gideon chu inah a lût a, kĕl tê le beiphit kilogram sawm, chol thrang loin a hung buotsai a. A sa chu leikhâwrah a sie a, sa tuihăng chu bêla hung chawiin, saisuo thing hnuoia chun a hung inhlăn a. 20 Vantirko chun a kuomah, “Sa le chol thrang lo bei kha la la, hi lung chunga hin sie la, a tuihâng ruok kha chu bun thla rawh” a ta. 21 Chuong ang chun a thaw a. LALPA vantirko chun a hmol chawi lai hmorin sa le chol thrang lo bei chu a hang tăwk a, lunga inthok chun mei a hung suok a, sa le chol thrang lo bei chu a kăng ral vong a, LALPA vantirko chu a bo ta dai a. 22 LALPA vantirko a nih ti Gideon-in a hung hriet chun, “Aw, LALPA Chunghnungtak, hlak chu hmaisana ngei LALPA vantirko ka hmu a lo ni zing a!” a ta. 23 LALPA chun a kuomah, “Thlamuong takin um rawh. Tri naw rawh; thi naw ti nih” a ta. 24 Chu hmuna chun Gideon-in LALPA ta dingin maichăm a siem a, Jehova Salom a’n bŭk a, chu chu tu chen hin Abiezar mihai khuo Ofra-ah a la um zing.

25 Chu zân vĕk chun LALPAN a kuomah, “I pa bawngchal la la, bawngchal pahninaa dingin kum sari mi la bok la, i pa Baal maichăm hi sukchim vong la, a sira Asera lim thing hi phûr thlu bok rawh. 26 Hi hmunsânga hin LALPA i Pathien ta dingin maichăm kongro nei indin la, Asera lim thing i phŭr thlŭk kha hmangin bawngchal pahnina chu pumraw thilhlânah inhlàn rawh” a ta. 27 Gideon chun a siehlaw sawm thruoiin LALPAN a hril ang tak chun a thaw a. A sunghai le a khaw mihai chu a tri leiin sŭna nêkin zănah a thaw lem a.

28 A khaw mihai zing tieng an hung tho chun, Baal maichăm chu sukchimin a lo um a, a bula Asera lim thing khom phŭr thlûkin a um bok a, maichăm bawl thar hlol chunga chun bawngchal pahnina chu inhlănin an hmu a. 29 “Tu thaw tak am an ta ding maw?” an ti sup sup a. Fimkhur taka an hang dap vel hnung chun, “Joas naupa Gideon thaw a lo ni zing annawm!” an ti ta a.

30 A khaw mihai chun Joas kuomah, “I naupa hung thruoi suok rawh. Baal maichăm a sukchim a, a bula Asera lim thing a phûr thlûk bok leiin a thi ngei ding a nih” an ta. 31 Joas chun ama hung khingtuhai po po kuoma chun, “Baal chu in tran ding a ni maw? Ama chu in hum tum a ni? Tu khom a trantu taphot chu zing tieng lá là hin sukhlum ding a nih. Baal chu pathien a ni takzet chun, a maichăm sukchimtu chu aman khing raw se” a ta. 32 ‘Baal-in khing raw se’ a ti leiin chu ni chun Gideon hming lemah ‘Jerub-Baal’ tiin an inbŭk a, Baal maichăm a suksiet leiin.

33 Chun, Midian mi po po, Amalek mi po po le khaw sak tienga mihai chu thrang ruolin Jordan an hung kăn a, Jezreel phairuoma chun an inkul a. 34 LALPA Thlarau chu Gideon chungah a hung tlung a, a hnung zuitu ding Abiezar mihai ko khawmna dingin tawtawrawt a hang mut a, Abiezar-hai chu a hnung hung zui dingin a ko khăwm a. 35 Manase-hai kuomah mi an intlàntir a, anni khom chun an hung pan khawm a. Aser-hai, Zebulun-hai le Naftali-hai khom a’n cha khawm bok a, anni khomin an hung fin a.

36 Gideon chun Pathien kuomah, “I hril tah anga ka kuta Israelhai hi i sandam ding a ni chun, 37 ngai ta, hrizâwlah beram hmul sieng ka ta, beram hmula chun daidaw a lo um a, a vêla hnuoi po po chu a hul vong si chun, i hril angin, keima kut hmangin Israelhai hi i sandam ding a nih ti hrieng ka tih” a ta. 38 Chuong ang chun a lo um ngei a, zingkâr inhma takin a tho a, beram hmul a hang săwr chun tui no khat zet a săwr suok el ta a.

39 Gideon chun Pathien kuomah, “Ka chungah lungsen naw rawh. Voi khat bêk hang hril nawk ka tih. Lunginsiet takin voi khat chau bèk beram hmulin mi la’n fietir nawk rawh. Tuta trum hin chu beram hmul chauh hul sien, hnuoi chu daidawin hŭ dup thung raw se” a ta. 40 Chuong ang tak chun Pathienin chu zân chun a hung thaw a, beram hmul chauh chu a lo hul a, hnuoi chung chu daidawin a hû dup ta thung a.