Debora le Barak hla
5
1 Chuongchun, chu ni chun Debora le Abinoam naupa Barak chun hi hla hi an sak a:2 LALPA chu inpâkin um raw se!
Israel hotuhaiin hma an thruoi a,
Inhâwk takin mipuiin an zui.
3 Lalhai, lo ngaithla unla,
Hotuhai, in na lo sit ro;
LALPA chu zaiin chawi ka ta,
LALPA, Israel Pathien kuomah,
Rimawi ka rem ding a nih.
4 Aw LALPA, Seir tlang pĕl a,
Edoma inthok i hung suok ni khan,
Hnuoi inthinin, văn a trè a,
Sûmin khuongruo an sŭrtir.
5 Sinaia khan LALPA hmaah,
Tlânghai an inthin dur dur,
LALPA, Israel Pathien hmaah.
6 Anat naupa Samgar dam laiin,
Jael dam lai ni ngeia chun,
Lamlienhai chu rausana umin,
Khuolzinhan kawngrâu an hraw.
7 Israel rama khuohai chu,
Hluo loin an ram zo a,
An ram zo, an ram zo ie,
Kei Debora ka chĕt hma chun,
Kei Israel ram nu ngei hi,
Ka hung chĕt ve hmâ khat chu.
8 Pathien dang an biek charin,
Kotsuoah râlin an hung nang.
Israel rama mi sang sawmli lai,
Fei le phaw chawi an um nawh.
9 Israel hotuhai ka ngaituo hle,
Tlawmngaia inpe mihai khom,
LALPA chu inpâkin um raw se.
10 Sabengtung vâra chuonghai,
Thrungna dûpa inthrunghai,
Nangni kea lawn trêng trènghai,
Hi thu hi insampui ro.
11 Tuikhura an zaihla sak ri chu:
LALPA thil fel thaw thu inzâwtin,
Israel khawtea mi râlhrânghai,
Hnĕna chang thu an hril a ni chu!
LALPA mipuihai chu kul kotah,
An inhăwr khăwm mup mup a,
12 “Debora har rawh, har rawh!
Zai hla remin hma thruoi rawh;
Aw nang Barak, Abinoam naupa,
Zuong thoin hma hung thruoi la,
Manhai chu salah thruoi rawh”
Tiin an khĕk dur dur a.
13 Mi lien la um pohai chu,
An thruoituhai leh an hung thla,
Mi hrât tak mi beipui dingin,
LALPA mihai an hung chim thla.
14 Amalek zungzàmhai khom,
Efraim-a inthokin an hung a,
Benjamin mihan an hung zui.
Makir-a hotuhai an hung thla,
Zebulun haiin puonzâr an chawi.
15 Isakar hotuhan Debora an zui,
Isakar a hung, Barak khom a hung,
Varuom tieng an zui thla pei.
Reuben khawzawla ruok chu,
Lung âwp inkaiin an um.
16 Ran ruol lai intung mûm a,
Ran chingtuhai kutkawi mut ringot,
Ngaithlâka um a hun ta nawh.
A nih, Reuben pahnamhai hlak chu,
Lungâwp inkaiin an um.
17 Gad pahnam hlak Jordan ral,
Gilead bielah an um trok trok;
Dan-hai hlakin long naw chu,
Buoipui dang an nei ta nawh.
An chĕngna tuipui kamah,
Aser-hai an inzam trok trok.
18 Zebulun hnamhai ruok chun,
Thi huomin thrang an lăk a,
Naftali-hai khomin thi an huom,
An chĕngna phŭl hmun sângah.
19 Lalhai an hung, an indopui,
Tanak hmun Megido tuikhurah,
Kanan lalhai leh an indo,
Sienkhom tangka le râllâk,
Ieng khom hăwn kîr an nei nawh.
20 Vana arasihai chenin,
An lampuia inthok chun,
Sisera chu an hung do a.
21 Vadung hlun Kison ngei chun,
Anni chu a lĕn hmang tah.
Aw ka thlarau, hma tieng panin,
Hrât takin kal chawi pei rawh!
22 Chu zoah sakor tlăn ri chu,
A thŭmin a thûm dur dur a,
Sakor hrăthai an tlăn puot puot.
23 “Meroza chu trongsie inphur ro”
A sunga chênghai po po khom,
LALPA chu thrangpui lo a,
LALPAN mi hrât a beinaah,
A hung inthok nuom naw leiin”
Tiin angel chun a hril a.
24 Puon ina chêng nu po po lai,
Ken mi Heber nuhmei Jael chu,
Nu vangnei chungchuong a nih.
25 Sisera’n tui a hni a,
Bawngnêne a lo pĕk a,
Mi thra no ngei ela chun,
Bawngnêne khal a lo pèk.
26 Puon in hemkil a lâk a,
Chang tieng tubo a chawi a,
Sisera lu a hem hăwp a,
A bekah a hem tlang pŭr.
27 A ke bulah a bok ruop a,
Chu chun thiin an hlum ruou.
28 Sisera nu chun tukvera thlîrin,
Zawngdaikal awngkara dâkin,
“Iem a ta a tawlailir a hung kir intak?
Ieng leia a muongchâng am a na?”
Tiin an don vêl ruoi a.
29 Anni laia nu var tak chun,
Ama zawna siem bok chu,
Hril nonin a lo don a:
30 ‘Râllâk sum insem khop ding,
Nunghak pahni bêk hawn ding,
Sisera râllâk ding puon ze mawi,
Rong chi hrang hranga chei mawi,
Rînga băt ding puon zep mawi,
An hmu naw lei amani ding maw?
31 Chuong ang tak chun aw LALPA,
I hmêlma po po chu ram raw hai se!
Nangma hmangaituhai ruok chu,
Ropui taka hung suok zie hlak,
Zîng ni angin var raw se!”
tiin.
Chuongchun, a ram chu kum sawmli sung ralmuongin a um a.