4 Chuong laia Israelhai thruoitu chu zawlnei Debora, Lapidot nuhmei a nih. 5 Ama chun Rama le Bethel khaw inkâra Debora Tûm thing hmuna chun rorêlna hmun a’n din a, chu taka chun Israel thlahai chun an ro inrêltir dingin an pan hlak a. 6 Ama chun Kedes-Naftali rama inthokin Abinoam naupa Barak chu a’n cha a, “LALPA, Israelhai Pathienin, ‘Naftali thlahai le Zebulun thlahai laia mi sing khat thruoi la, Tabor tlangah hang fe rawh. 7 Kison vadungah Jabin sipai kawmandar Sisera chu a tawlailir le a rawihai leh hung tir lut ka tih; chun anni chu ka pêk che’ a ti a nih”tiin a hril a.

8 Barak chun a kuomah, “I mi fepui ding chun fe’ng ka ta, i mi fepui naw ding chun fe naw ning” a ta. 9 Debora chun, “A thra annawm, fepui mol ka ti che. Amiruokchu, i thilthaw vel dàn lei hin, hming thratna chu chang naw ti nih, LALPA chun Sisera chu nuhmei kutah a pêk lem ding a ni si a” a ta. Debora le Barak chun Kedes an pan a. 10 Chu taka chun Zebulun thlahai le Naftali thlahai chu an inchà khăwm a, mi sing khat thruoiin Barak chu a’n thok suok a, Debora khom a fe ve a.

11 Chun, Ken mi Heber, Mosie tarpu Hobab thlaa mi chu Ken mihai laia inthoka tla hrangin, Kedes khaw kawl Zananima saisuo thing bula chun puon in a va kei a. 12 Abinoama naupa Barak chu Tabor tlangah a kai thu Sisera an hril chun, 13 a thîr-tawlailir 900 chu a khâwm a, Haroset- Hagoyim-a inthokin a sipai po po chu Kison vadunga chun a thruoi a.

14 Chu phing leh Debora chun Barak kuomah, “Khai leh, inthok suok ta raw leh. Voisun hi LALPAN i kuta Sisera a pèk ni chè a ni hi. I hmathruoitu chu LALPA a ni naw am a ni?” a ta. Chuongchun, Barak chu Tabor tlanga inthok chun a trum thla a, mi sing khatin an zui a. 15 Barakin hma a nor phei lai chun Sisera tawlailirhai le a sipaihai po po chu LALPAN kawlhnâmin a tukdol vong a, Sisera chu a tawlailira inthokin a trum a, kein a tlan hmang ta dai a. 16 Barak chun tawlailirhai le sipaihai chu Jentailhai ram Haroset Hagoyim chen a hnot a, Sisera sipai po po chu kawlhnâmin a that a, dama hlà pakhat khom a nei nawh.

17 Sisera ruok chu Ken mi, Heber nuhmei Jael puon ina chun a tlân lut a. Hazor lal Jabin le Ken mi Heber sungkuohai chu inrem zinga um an nih. 18 Jael chu Sisera hmuok dingin puon ina inthok chun a hung suok a, a kuomah, “Ka lalpa, hung lut rawh, tri dêr naw rawh” a ta. Chuongchun, puon in sunga chun a zui lŭt a, ama chun puon a’n khum a. 19 Sisera chun, “Lunginsiet takin tui mi hung pe raw khai, ka dang a châr êm el” a ta. Ama chun bawngnene siena bawm a hong a, a’n dawntir a, puon an khum nawk a. 20 Sisera chun, “Puon in kotkhara khan ngîr la, ‘Hi taka hin mi an um am?’ tia an hung indon che chun, ‘An um nawh’ lo ti pei rawh” a ta.

21 Nisienlakhom, Heber nuhmei Jael chun puon in thlungna hemkil hmol zum le tubo chu a lâk a, damtein a pan phei a, a sawl chau, indên taka Sisera a in lai chu a bekah hemkil zum chun a hem tlang a, hnuoi leh a hemde a, a thi ta a.

22 Barak chun Sisera chu a hung hnot pei a, lo hmuok dingin Jael chu a va suok a, a kuomah, “Hung raw khai, i mi zongpa chu lo inhmutir ka ti che” a ta. Chuongchun a zui lut a, Sisera chu a bekah hemkil inbûr ngura a thi saa lo zàl chu a hmu a. 23 Chu ni chun Israel thlahai chun Kanan lal Jabin chungah hnĕna an chang a. 24 Kanan lal Jabin chu an suksiet dĕr hmâ khat chu Israelhai chun thâ an inthlà hrim hrim nawh.