Hnam dang la umhai
3
1 Kanan rama um Israelhai laia mi, râl la do ngai dèr lohai fiena dingin LALPAN hnam threnkhat a rama chun a la hla a. 2 Israel thla suon thar, a hmaa indo dan ieng khom la hre ngai dèr lohaiin râl bei dàn an inchuk theina ding chaua anni chu a hlà a nih. 3 Chuonghai chu Filistinhai lal panga hai dam, Kanan mihai po po dam, Sidon mi hai le Lebanon tlang ram Baal-Hermon tlanga inthoka Hamat kawn chena inzar phei Hiv mihai dam chu an nih. 4 LALPAN Mosie hmanga an thlatuhai kuoma thu a lo pèkhai kha Israelhaiin an zawm ding le ding naw hrietna ding le fiena dinga a la hlà tawl an nih.5 Israel thlahai chu Hit mihai, Amor mihai, Periz mihai, Hiv mihai le Jebu mihai lai chun an um a. 6 Chuongchun, an innei pol a, an pathienhai rong an bawl ve ta a.
Roreltu Otniel
7 Israel thlahai chun LALPA mithmuah thil suol an thaw a, LALPA an Pathien chu theinghilin, Baal le Astoret hai rong an bawl a. 8 LALPA chu Israelhai chungah a lungsen ta hle a, anni chu Mesopotamia hmar thlang tieng ram lal Kusan-Risathaim kutah a zor a, a hnuoiah kum riet an um a. 9 Israel thlahai chun LALPA an ko charin anni sansuok dingin Kaleb sangpa Kenaz naupa Otniel chu a hung ruotpĕk a, ama chun a hung sansuok a nih. 10 LALPA thlarau chu a chungah a um a, Israelhai ro a rĕlpĕk a, râl bei dingin a’n thok suok a, LALPAN Mesopotamia ram lal Kusan-Risathaim chu a kutah a pêk a, a’n hnĕtir a. 11 An ram chu Otniel thi chenin kum sawmli sung a ralmuong tah a nih.
Ehud
12 Israel thlahai chun LALPA mithmuah thil suol an thaw nawk a. Chuonga thil suol an thaw lei chun LALPAN Moab lal Eglon chu anni nêka hrâtin a siem a. 13 Ama chun Amon mihai le Amalek mihai chu a khâwm a, Israel thlahai chu an bei a, Tûm khawpuia chu an lakpek a. 14 Israelhai chu Moab lal Eglon thu hnuoiah kum sawm le kum riet an um a.
15 Israel thlahai chun LALPA an ko nawk a, sandamtu dingin LALPAN Benjamin hnama mi Gera naupa Ehud, voikawlong chu a ruotpek a, ama chu Israel thlahai chun Moab lal Eglon kuoma pek ding sie an inchawitir a. 16 Ehud chun chemte ngei ton, tong chen vela sei a sut a, chu chu a malpui chang tieng puon hnuoiah a thuprŭk a. 17 Moab lal Eglon chu pa thâu tak el a ni a, Ehud chun sie chu a pêk a. 18 Sie a pek zo chun sie chawituhai leh an kir nawk nghal a. 19 Sienkhom, ama ruok chu Gilgal khaw bula pathien lim lung an kerna hmuna inthok chun a kîr nawk a, “E khai, lalpa, thurûk hril ding che ka nei a nih” a ta. Lal chun, “To thriep ro khai” a ta, a bula ngîr po po chun an suoksan ta vong a.
20 Nipuia a chawl hadamna pindan chunghnunga ama khât chaua thrung lal chu a va pan hnai a, “Pathienin i kuoma hril ding thu a mi’n chà a nih” a ta, lal chu a thrungnaa inthok chun a hung tho a. 21 Ehud chun a kut voi tiengin a malpui chang tienga a chemte thuprŭk chu a phawi a, lal phînga chun a sun rak a. 22 A chemte hâ chen a tlum a, a thau chun a hnaw ping a, chemte chu a phawi suok naw leiin a hnung tieng chen a dawt tlang pŭr a. 23 Ehud chu a suok a, pindan chu a khâr a, a kal tlat a. 24 A suok hnung chun a siehlawhai chu an hung a, pindan chu a lo inkal leiin thlan sukdeina pindanah a va chawl hadam ni dingin an ring a. 25 Sawt tak an nghak hnung khoma pindan kotkhar chu a hong ta si naw leiin chabi an lăk a, an hong a, an lalpa chu truongah thi sain a lo inhlum dĕr el a.
26 Chuonga an nghak sung chun Ehud chu a lo tlàn hmang a, lung milim an serna hmun chu a pĕl a, Seira-ah a tlân lut a. 27 Chu hmun a tlung phing leh, Efraim tlang rama chun a tawtawrawt a mût a, Israel thlahai chu tlânga inthokin a kuomah an hung thla a, aman hma a thruoi a. 28 “Mi zui ro, in hmĕlma Moab mihai chu LALPAN in kutah a pêk an tah” a ta, chuongchun an zui thlăk a, Moab panna Jordan kai chu an lâk vong a, tu khom an inkaitir phal nawh. 29 Chu ni chun Moab mi hrât le awmkhau ngot khom singkhat vel an that a, tu khom a tlân suok an um nawh. 30 Chu nia inthok chun Moab-hai chu Israelhai lakah an tlawm ta a, a ram khom kum sawmriet sung ralmuongin a um tah a nih.
Samgar
31 Ehuda zoa chun Anat naupa Samgar a hung inlang a, ama chun bawng hawlna thîr zum ringotin Filistin mi zaruk a that a nih. Ama khom hi Israelhai san suoktu a nih.