Mosien Israelhai mal a sawm
33
1 Hi hi a thi hmaa Pathien mi Mosien Israelhai mal a sawmna chu a nih. 2 Hieng ang hin mal a sawm a:“Sinai tlànga inthokin
LALPA chu a hung suok a,
Seir tlăngah ni zung angin,
Ei chungah a hung inzăm a,
Paran tlănga inthokin,
Ama chu a hung ĕng suok a.
Sim tieng tlâng pangpĕra chun,
Vantirko sâng tam takin,
Ama chu an hung zui a.
3 A mihai hmangaitu a na,
A mi thienghlimhai a hum a,
A ke bulah an hung kŭn a,
A bău suok thuhai chu an dong:
4 Mosien Dan thu a mi pĕkhai,
Jakob sungkuohai rohlu chuh.
5 Jesurun chunga lal a na,
Mipui thruoitu luhai le
Israel hnam chunga chun.
6 “Reuben chu dam khawsuok sien,
Thi mang loin dam raw se,
A mihai tlawm hlè sien khom.”
7 Juda hnam chungthua chun:
“LALPA, Juda khêk ri ngaithla la,
A mihai kuomah hung thruoi rawh.
A kuta râl a tawn lai hin,
I kutin ama chu dopui la,
A hmêlmahai dopêk rawh.”
8 Levi hnam chungthua chun:
“I Thummim le i Urima chu,
I laka ringum kutah i’n koltir a;
Masa hmuna khan i fie a,
Meriba tuiah i fie ta bok kha.
9 A nu le pa le unauhai nêkin,
I chungah a ringum lem a,
I thupêkhai a zawm a,
I thuthlung a vong tlat a
10 I danhai zawm pei dingin,
Israel nauhai an zirtir a,
I maichămah rimtui inhlănin,
Pumraw hlănbiek an inhlăn.
11 Aw LALPA, an kut malsawmin,
An thilthaw taphotah lawm la;
An hmêlmahai kawng vaw nawi rawh,
Tho nawk ta dèr lo dingin.”
12 Benjamin hnam chungthua chun:
“LALPA ditsak hlaw mi chu,
A bulah him takin chêng a ta,
Chung Pathienin sunnithlâkin,
Ama chu hliekhu’ng a ta,
A ruongah himin inbeitir a tih.”
13 Josefa hnam chungthua chun:
“A ram chu LALPAN malsawmin,
Van daidaw fîmin chawm sien,
Hnuoi rila inthoka suok tuiin;
14 Nisain a pĕk ra hlu tak hai,
Thla tharsuok thil hlu tak haiin;
15 Tlang hlunha’n ra hlû insuoin,
Muol hlunha’n an hnienghnărna,
Hung insuopêk hai sien la;
16 Leilung pêk thei thil thra famkim,
Chîmbuk choka um ditsakna chu,
A unauhai laia thruoitu challang,
Josefa chungah hung tlung raw se.
17 Bawngchal lutir angin a mawi a,
A kî chu ramsiel ki hrêu ang a na;
Manase mi a sanga tiem,
Efraim mi sângsawmhai chu,
A ki zum ngeihai chu an nih;
Chu chun hnamhai phir tlang a ta,
Kawl kil tawp chen sik lêng a tih.”
18 Zebulun hnam chungthua chun:
“Tuipuia a sumdawngnaah,
Zebulun chu hlim raw se;
In tienga Isakar hausakna chu,
Hung pung zuol pei raw se.
19 An tlăngah hnamhai ko an ta,
Hlănbiekna indik inhlăn an ta,
Tuifinriet hausakna tlăn an tih,
A kama ro phŭmrûkhai leh.”
20 Gad hnam chungthua chun:
“Gad-hai ram inzauhpektu,
Pathien chu inpâkin um raw se;
Gad chu sakeibaknei ang a na,
Bân le lu-ah a ham thlĕr a;
21 Ram thratna tak a thlang a,
Rorêltu chanvo a chang a,
Mipui luhai an inkhawm pha,
Israelhai kuoma dàn thupêkhai,
LALPA rorĕlna fel a kengkaw.”
22 Dan hnam chungthua chun:
“Dan chu sakeibaknei te,
Basana inthoka inchawm suok a nih.”
23 Naftali hnam chungthua chun:
“Aw Naftali, ditsakna hlawtu,
LALPA malsawmnaa sip,
Dîl sim tieng rochungtu a nih.”
24 Aser hnam chungthua chun:
“Nau laia malsawmna vochuom,
Dongtu chu Aser a na,
A unauhai ditsak hlaw sien,
Oliv hriek hau hlê raw se.
25 A khaw kotpui kalnahai chu,
Thir le dar vong ning a ta,
A dam sung dai zât po chu,
A thâ khom hrât zing a tih.”
26 Aw Jesurun, i Pathien ang,
Pathien dang hrim an um nawh,
Vàn sûm chungah ropui takin,
Thrangpui ding che’n a hung inthok.
27 Chatuon Pathienin a hum che,
A chatuon bănin a dom zing che.
“Sukbohmang ro” tia khêkin,
I hmêlmahai a hnot suok a.
28 Vànin daidaw a’n tlăktirna,
Bu le uoiin thar tamna ramah,
Israel chu himin chêng a ta,
Jakob tuikhur chu him a tih.
29 Aw Israel, i va hamthra ngei de!
Nang anga LALPA sandam hnam,
Tu hnam am an um hlak a?
Ama chu i phaw le thrangpuitu che,
I kawlhnâm ropui a nih.
I hmêlmahai chu i hmaah,
Hungin hung intuklut an ta,
An hmun sanghai chîl pher i tih”
a ta.