Mosie thi thu
34
1 Mosie chu Moab phaia inthokin Jeriko zawn Nebo tlanga Pisga sîpa chun a hang kai a, chu taka chun ram chu Gilead-a inthoka Dan chen LALPAN a’n entir vong a: 2 Naftali le Efraim ram po po, Manase le Judai ram po po, a thlang tieng tuifinriet chen; 3 Negev ram po po le Tûm khawpui Jeriko phai ruom, Zoar chenin. 4 Chu zoah LALPAN, “Hi ram hi a nih Abraham hai, Isak hai, Jakob hai kuoma, ‘In thlahai la pe’ng ka tih’ tia inkhâm meua ka lo tiem chu. I mit ngeiin ka’n hmutir ta che a, sienkhom nang ruok chu, chu taka chun lût naw ti nih” a ta.5 Pathien siehlaw Mosie chu LALPA thu angin chu hmun Moab rama chun a thi a. 6 Beth-peor zawn Moab rama ruomah a phŭm a, sienkhom voisun chen hin a thlăn umna tu khomin an hriet nawh. 7 A thi chun Mosie chu kum za le sawmhni a ni ta a, sienkhom a mit a la chău naw a, a thâ khom a la chuoi bok nawh. 8 Israel thlahai chun Moab phăiah ni sawmthum sung, trapa sùnna hun a tawp chenin, Mosie chu an tra a.
9 Nuna naupa Josua chu Mosien a ai awtu dinga a namnghet a ni leiin thlarau varnain a sip a, Israelhai chun a thu an ngaithlăk a, LALPAN thû Mosie kuoma a pĕk ang pei chun a thaw a.
10 LALPAN hmaisana a biek hlak Mosie ang hi Israelhai lai zawlnei tû khom an suok ngai nawh. 11 Aigupta lal Faraw le a thoktuhai mithmua le an ram sunga Mosie hmanga inchikna le thil mak tam tak a thaw anga thaw dingin LALPAN zawlnei dang tû khom a hmang ngai nawh. 12 Israelhai mithmua thil ropui le râpum tak tak Mosien a thaw anga thaw zawlnei dang an um bok nawh.