Rà hmasa
26
1 “In rochung dinga LALPA in Pathienin a pĕk chêu ram chu lût a, hluo a, in va um pha chun, 2 LALPA in Pathienin a pĕk chêu in ram leilung rà suok hmasa tak seng chu hung chawi in ta, bawmah sieng in ta, LALPA in Pathienin a hming innghatna dinga a la ruot ding hmuna chun in fepui ding a nih. 3 Chutaka um thiempu kuoma chun feng in ta, a kuomah, “LALPAN kan pi le puhai kuoma inkhâm meua pĕk a tiem rama chun kan hung tlung tah ti LALPA, i Pathien hmaaha ka puong a nih” tiin in hril ding a nih. 4 Thiempu chun in kuta inthokin bawm chu la’ng a ta, LALPA in Pathien maichăm bula chun inthrut a tih. 5 Chun, nangnin LALPA in Pathien hmaa chun, “Kan pu chu Aram mia, mi vâkvăi a na, Aigupta ramah a fe thla a, a zu um a, mi tlawmte chauh an la nih. Chu taka chun hnam ropui tak, thilthawthei tak le tam tak an hung ni ta a. 6 Aigupta mihai chun an mi suknomna a, an mi sukrethei a, sin harsá sà an mi’n thawtir a. 7 Chuongchun, LALPA, kan pi le puhai Pathien chu kan ko a, LALPA chun kan rawl a lo ngaithlăk a, kan retheizie hai, kan rimsikzie hai le an mi nĕksawr nasatzie hai chu a hriet a. 8 LALPA chun Aigupta rama inthokin kut hrât tak hmangin, bân pharin, thil râpum tak tak le inchikna le thil mak tak hai thawin a mi thruoi suok a, 9 hi hmuna hin a mi thruoi lŭt a, hi ram, nenetui le khuoizu luongna ram hi a mi pĕk a. 10 Chuleiin, aw LALPA, i mi pĕk kan ram leilung tharsuok hmasa tak seng chu kan hung chawi a nih’ in ti ding a nih. LALPA in Pathien hmaa chun in bawmhai chu inthrut unla, a hmaah kûn ro. 11 Nangni le Levi mihai le nangni laia ram dang mi umhai le in sungkuohai kuomah thil thra tinrêng LALPA in Pathienin a pèk lei chêuin hlim takin in um ding a nih.Sawma pakhat
12 “Chun, a kum thumna, in thil tharsuok po poa inthoka sawma pakhat in pĕk dinghai chu in sie fel pha leh in khuoa Levi mihai, ram dang mi hai, fahra hai le hmeithai hai chun faa an tlai theina dingin, in pĕk ding a nih. 13 LALPA in Pathien hmaah, ‘I thu mi pĕk angin ka ina inthokin thilpêk thienghlim chu ka lâk suok a, Levi mi hai, ram dang mi hai, fahra hai le hmeithai hai ka pêk a, i thupêk po po pĕtsan ka nei naw a, pakhat tê khom theinghil ka nei nawh. 14 Ka lusŭn lai khomin ka tharsuok inhlăna mi chu ka pur ngai naw a, inthieng nawna ka kăi laiin ka tawk ngai naw a, mithi puola ding khomin ka’n hlăn bok nawh. LALPA ka Pathien thû chu ka zawm a, a thu mi pĕk po po ang chun ka thaw a nih. 15 I chĕngna hmun thienghlim, vana inthokin mi zuk thlir la, i mi Israelhai le kan pi le puhai kuoma inkhâm meua pĕk i tiem ram, nenetui le khuoizu luongna ram hi mal hung sawm rawh’ in ti ding a nih.
LALPA hnam thlang
16 “LALPA in Pathien chun hieng a thupêkhai le dànhai hi fimkhur taka zawm dingin voisun hin thu a pêk chĕu a; chuleiin, in lungril po po le in thlarau po poa pomin in zawm ding a nih. 17 Nangni khomin LALPA chu in Pathien a nizie, a lampuihai hraw a, a thupêkhai, thusuokhai le dànhai zawm a, a thu in awi dingzie chu voisun hin in puong a. 18 A mihai, a tiem tah anga a ro puol bik hnam le a thupêkhai zawmtu ding in nizie voisun hin LALPAN a puong a nih. 19 A tiem tah anga hnam dang po po chung daia inpâk le hmingthang le chawimawi hlaw ding le LALPA in Pathien mi thienghlimhai ni dingin a thlang chêu ti a puong bok a nih.”