Vuoka hremna
25
1 Miin thubuoi an nei chun roreltu hmaah inkhing an ta, rorêltuhaiin lo rèlpèk an ta, mi fel chu thiem inchangtir an ta, mi suol chu thiem naw an inchangtir ding a nih. 2 Mi suolin vuok a phù chun rorêltuin inzăltir a ta, a hmaah invuoktir a ta, a suol dan zirin an vuok zăt ding bi chu thliek a tih. 3 Amiruokchu voi sawmli nêka tam a’n vuoktir ding a ni nawh. Voi sawmli chuong vuok a ni chun, in mithmuah in unaupa chu muolpho a tih. 4 Bawngchalin bu a chìl laiin a hmŭr khuop naw ro.
Unau nuhmei hluo dàn thu
5 Urêng an um khawm a, nau pasal nei loin anni laia mi chu thi ta sien, a thipa nuhmei chu mi dang, puo tieng miin an nei ding a ni nawh. A pasal unauhaiin rochung an ta, nuhmeiah nei an ta, an unaupa thaw ding chu a chunga chun thawng an tih. 6 Nau pasal a neipĕk hmasa tak chun Israel laia a hming a bo nawna dingin a unau thi tah hming chu a put ding a nih. 7 Sienkhom, ama chun a unaupa nuhmei chu a nei nuom naw chun, a unaupa nuhmei chu kul kotkhar bula upahai kuomah fe’ng a ta, ‘Ka pasal unaupain Israelhai lai a unaupa hming inumtir zing a nuom naw leiin a unaupa thaw ding chu ka chungah a thaw nuom nawh’ a ti ding a nih. 8 A khaw upahai chun ama chu ko an ta, inbiekpui an tih. 9 Ama chun, ‘Ka nei nuom nawh’ tia a thrang tlat chun a unaupa nuhmei chun upahai hmaah hang pan a ta, ‘A unaupa sungkuo indin nuom nawtu chunga chun hieng anga thaw ni pei raw se’ tiin a pheikhok hlîppĕk a ta, a hmaiah chil sàkkhum a tih. 10 Chu pa le a thlahai chu ‘Sungkuo pheikhok hlippêk’ ti hming inputtir ni’ng an tih.
Dàn dang dang
11 Mi insuol hai sien, a pakhat lem nuhmei chun a pasal san suok dingin a’n suolpuipa sera chun man sien, 12 chu nu kut chu in tanpek ding a nih. In lunginsiet ding a ni nawh.
13 In ipah bŭkna thuhmun ni si, a rik dan inang lo, pakhat a rik lem, pakhat a zâng lem in nei ding a ni nawh. 14 Inkhǐna thuhmun ni si, a lien lem le a chin lem um bok si khom in inah in kol ding a ni nawh. 15 Bŭklung indik le fel le inkhǐna indik le fel in nei ding a nih, chuongchun LALPA in Pathienin a pĕk chêu rama hin dam sawt in tih. 16 LALPA in Pathien chun chuong anga thawtu ni lo, indik lo taka mi dawrtu chu a tirdak a nih.
Amalekhai chunga thaw ding
17 Aigupta rama inthoka in hung suok laia Amalek mihaiin lampuia an lo thaw dàn chêu kha hre zing ro. 18 Sâwl le chăua in inzin lai khan lampuiah an lo lambun chêu a, Pathien trîna nei hlek loin a hnufuol po an săt hlum a ni kha. 19 LALPA in Pathienin in hluo ding le rochung ding ram a pĕka in doralhai laka muongna a pêk phà chêu, Amalekhai hi vankhup hnuoia tu hriet hlaw ta lo dingin sukchimit ro. Chu chu theinghil dêr naw ro!