Inmâk chungchănga dàn
24
1 “Miin nuhmei a nei a, a nungchang mawihnai loa a hriet leia a chungah a lungni naw chun, inmâkna lekha ziekpèk a ta, pe’ng a ta, an in tieng inkǐrtir a tih. 2 A ina inthoka a suok hnung chun mi dang nei thei a tih. 3 A pasal hnuhnung lem chun a dit naw a, inmâkna lekha a pêk a, a ina inthoka a’n suoktir amanih, an naw leh a pasal chu a thi a ni khomin, 4 a matu, a pasal hmasa, a mak leia sukporchètu khan nei nawk thei ta naw nih. Nei nawk chu LALPA ngaia tirdakum a nih. LALPA in Pathienin hluo dinga a pĕk chêu rama hin suol in phur lŭt ding a ni nawh.Dàn chi hrang hrang
5 “Nuhmei nei hlim chu indonaah in infetir ding a ni naw a, mawphurna dang khom in pĕk ding a ni bok nawh. Kum khat sung chu in tieng a nuom ang angin a nuhmei leh hlim takin a um ding a nih.
6 “Bat aia dakhamah bu rawtna lung amanih, a chung tienga a rawtna lung amanih in hrĕnpek ding a ni nawh, chu chu mi hringna hrĕnpêk ang a nih.
7 “Tu khomin a unau Israel chanpui inru a, sal anga a soisak amanih le a zor hmu suok a ni chun, a’n rutu chu sukhlum ngei ding a nih. Nangni laia inthokin suol chu inthiel fai ro.
8 “Vun natna hri hrim hrim chungchangah, Levi mi thiempuhaiin an zirtir chêu ang tak khan, fimkhur takin thaw ro. An kuoma thu ka pĕk kha fimkhur takin zawm ro. 9 Aigupta rama inthoka in hung suok hnunga lam laka LALPA in Pathienin Miriam chunga a thaw kha hre zing ro.
10 “I tuolbawm kuomah thil i’n puktirin a aia dakhama hrĕn dinga a thil inhlàn chu la dingin a inah i lût ding a ni nawh. 11 Tuolah lo nghak la, i thil pûktu chun a dakham chu i kutah hung pe lem raw se. 12 Mi retheiin a silpuon a dakham chun zan chenin i hrĕnpek ding a ni nawh. 13 A silpuon chu sila a in theina dingin, a dakham chu nisa tlâk pha leh pe kir nawk ngĕi ngêi ro. Chuongchun, ama chu in chungah lawm a ta, LALPA in Pathien mithmuah thil fel thaw ni’ng in tih.
14 “Inhlawfaa in ruoi mi rethei le tlasam chu, in hnam chanpui Israel mi a ni amanih, in khuoa um ram dang mi a ni amanih khomin in nĕksawr ding a ni nawh. 15 A thaw nia a hlaw chu nisa tlak hmâ ngeiin pe ro, mi rethei a ni leiin a hlawa innghat a nih. Chuong naw chun in chungthuah LALPA ko a ta, suola thiem naw chang ni hlauh rawi in tih.
16 “Pahai chu an nauhai leiin sukhlum an ni ding a ni naw a, nauhai khom an pahai leiin sukhlum an ni ding a ni bok nawh; mi tin mani suolna seng leia sukhlum an ni ding a nih.
17 “Ram dang mihai le fahrahai ro chu indik lo takin in rĕlpek ding a ni nawh; hmeithai silpuon khom dakhamah in hrĕnpek ding a ni bok nawh. 18 Nangni khom Aigupta bawiah in um a, chu taka inthok chun LALPA in Pathienin a’n tlan suok chêu a nih ti hre zing ro. Chuleiin hieng hi thaw dingin thu ka pêk chĕu a nih. 19 In loa bu in sǐk pha, in sǐk hmaihai chu inkhawm dingin kîr nawk ta naw ro, ram dang mihai, fahrahai le hmeithaihai ta dingin hlà ro. Chuongchun, LALPA in Pathienin in kut sinthaw po poah malsawm a ti chêu. 20 In oliv ra in vuok tril pha, a zâra tril mahlahai chu vaw tril dingin fe nawk ta naw unla, ram dang mihai, fahrahai le hmeithaihai ta dingin hlà ro. 21 In huona grêp ra in lo pha a tro in zong ding a ni nawh; ram dang mihai, fahrahai le hmeithaihai ta dingin hlà ro. 22 Aigupta rama bawi in ni lai kha hre zing ro. Chuleiin, hieng hi thaw dingin thû ka pêk chĕu a nih.