23
1 “Tu khom tilmu koi le mi tilre chu LALPA mihai pungkhawmnaah an thrang ve ding a ni nawh.2 Sawn le an thlahai, suon sawmna chen khom LALPA mihai pungkhawmnaah an thrang ve ding a ni bok nawh.
3 “Amon mi amanih Moab mihai le an thlahai, suon sawmna chenin, LALPA mihai pungkhawmnaah an thrang ve ding a ni nawh. 4 Aigupta rama inthoka in hung suok khan anni chun bei le tui chawia hung hmuok chĕu nêk hmanin, Aram Naharaim ram Pethor khuoa Beor naupa Balaam chu trongsie inphur ding chĕuin an ruoi lem a ni kha. 5 Amiruokchu, LALPA in Pathien chun Balaam chu a ngaithlăk nuom naw a, LALPA in Pathien chun a hmangai chĕu leiin a trongse inphur ding chĕu chu in ta dinga malsawmnaah LALPA in Pathien chun a’n changtir ta vong lem a nih. 6 In dam sung phot chu anni leh inruol thratna thuthlung in siem ding a ni nawh.
7 “Edom-hai chu in lungten ding a ni nawh, in unauhai an ni si a. Aigupta mihai khom in lungten ding a ni nawh, an ramah mikhuolin in zu um ta si a. 8 An thlahai chu suon thumnaa inthokin LALPA mihai pungkhawmnaa chun thrang ve thei an tih.
Riebûk vong thienghlim dàn
9 “In hmĕlmahai bei dinga in va rieknaah thil thieng lo hrim hrim lakah in inthier fihlim ding a nih. 10 Nangni laia tu khom zăna amaa inthoka thil pût leia inthieng nawna kai a um chun riebûka inthokin suok a ta, tuolah a um ding a nih. 11 Zan tieng insil fai a ta, nisa tlâk pha leh riebûkah hung kir nawk thei a tih.
12 “Inzun le inhnawmna ding riebûk puo tieng hmun bǐk ruot ro. 13 Hnuoi chona ding hmangruo nei unla, khur cho unla, in zun le êk chu vùr nawk ro. 14 LALPA in Pathien chu nangni húm ding le in hmĕlmahai laka san him dinga in riebŭk a fang zing leiin, nangni lai thil tirdakum hmua a zamsan nawna ding chĕuin, in riebŭk vong thienghlim ro.
Dàn zawm ding chi hrang hrang
15 “Suok tu khomin a pu tlansana nangni a hung bĕl chêu chun, a pu kuomah in pĕk kǐr năwk ding a ni nawh. 16 A umna khuo dinga a thlang le a um nuomna in ina chun nangni lai inumtir ro. In suknomna ding a ni nawh.
17 “Israel mi nuhmei nawchizor an um ding a ni nawh; Israel mi pasal inzor an um ding a ni bok nawh. 18 Nuhmei amanih pasala amanih inzorna man chu in thutiem tlăkna dingin LALPA in Pathien inah in hung chawi lut ding a ni nawh, a ieng ieng khom chu LALPA in Pathien ngaiin tirdakum a nih.
19 “Tangka dam, bu le thil dang hrim hrim khom a pung umin in unauhai in inpŭktir ding a ni nawh. 20 Ram dang mihai ruok chu a pung umin inpûktir thei in ta, in unau Israelhai ruok chu a pung umin in inpŭktir ding a ni nawh. Chuongchun, in hluo ding rama chun LALPA in Pathienin in kut sinthaw iengkimah malsawm a ti chêu.
21 “LALPA in Pathien kuomah thutiem in nei chun sawt riel loin pe tlâk vat ro, LALPA in Pathien chun hung thrîn ngei a ti chêu a, suola thiem naw chang rawi in tih. 22 Thil pe dinga intiem naw ruok chu suol a ni nawh. 23 Băua in intiem ta laklaw si chun in hlen ngei ding a nih, in bâu ngeia LALPA in Pathien kuoma in nuom thua in intiem a ni si a.