22
1 “I unaupa bawngchal amanih beram amanih invâk hmang i hmu chun ngaithà loin a inah thruoi kîrpèk ngèi ngéi rawh. 2 I unau chu i kawl hnaia um a ni naw amanih, a neitu chu i hriet lo amanih a ni chun, i in tieng thruoi la, lo kol la, a hung zong pha i lo pĕk kìr ding a nih. 3 A sabengtung le a silfen le a thil inhmang hrim hrim khom ngaithà loin chuong ang chun i thaw ding a nih. 4 I unau sabengtung amanih bawngchal amanih lama tlu i hmu chun ngaithà loin kei thopui nawk rawh.
5 “Nuhmeiin pasal thuomhnaw an inbel ding a ni naw a, pasal khomin nuhmei thuomhnaw an inbel ding a ni bok nawh. Tu khom chuong anga thawtu chu LALPA in Pathienin a tirdak a nih.
6 “Thing lĕr amanih, hnuoi amaniah vate bu, a puiin a tui amanih a tê amanih a op lai i hmu chun a pui chu a tê leh la ngai naw rawh. 7 A tê chu la thei i ta, a pui ruok chu insuo ngĕi ngêi ding a nih, chu chu i ta dingin thrang a ta, dam sâwt bok i tih.
8 In thar in bawl pha a chung zawla inthoka mi an tlăk nawna ding le thisen suokna in a ni nawna dingin a chung chu palin inhuon ro. 9 Chun, in grêp huonah thil chi hni chîng pol naw ro, chuong naw chun in thil chǐng tharsuok le in grêp rà chu sukporchèin um rawi a tih. 10 Lo keinaah bawngchal le sabengtung hmang kop naw ro. 11 Sahmul le pat khawng pol ngai naw ro. 12 In silpuon tlăng hmun liah patsum sui bawk, pebuk in siem ding a nih.
Inneina chungthuah
13 “Miin nuhmei a nei a, a pawl hnungin a dit naw a, 14 ‘Hi nu hi ka nei a, ka pawl a, nunghak thienglàm a nina ka hmu nawh’ tia muolpho taka a sukpăwi chun, 15 nunghak nu le pahaiin kul kotkhar bula khaw upahai kuomah nunghak thienglàm a nizie an hung suklang ding a nih. 16 Nunghak pa chun upahai kuomah, “Hi pa hi ka naunu ka’n neitir a, sienkhom a dit nawk naw a. 17 Tu hin, ‘I naunu hi nunghak thienglàm a nǐna ka hmu nawh’ tiin muolpho takin a siem a, sienkhom ka naunu hi nunghak thienglàm a nizie fiena chu hieng hi a nih” tiin an puonpha chu upahai hmaa chun phar an ta, 18 upahai chun ama chu hrem an ta, 19 Israel nunghak thienglàm a sukhmingsiet leiin tangka sekel za inchawitir an ta, a nunghak nu le pa chu pêng an ta, a nuhmei ni zing a ta, a dam sungin ma thei naw nih.
20 “Amiruokchu, chu mi thu chu a’n dik a, nunghak chu nunghak thienglàm a nizie fiena a um naw chun, 21 a pa in kotah hung thruoi suok an ta, a khuoa pasalhai chun lungin dêng hlum an tih, a pa ina a um lai nawchizor anga khawsa a, Israelhai ramah thil tirdakum a thaw leiin. Nangni laia inthokin suol chu in inthiel fai ding a nih.
22 “Pasal tu khomin mi nuhmei a zălpui chun an pahniin in sukhlum ngĕi ding a nih. Israel rama inthokin suol chu in inthiel fai ding a nih.
23 “Miin khaw sungah nunghak thienglàm, mi nuhmei huol lai intuokpuia a lo zălpui chun, 24 an pahniin khaw kul kotkharah thruoi in ta, in dĕng hlum ngei ding a nih- nuhmei chu khaw sunga um ni sia santu koa a khêk naw leiin le pasal chun mi dang nuhmei huol hming a suksiet leiin. Nangni laia inthokin suol chu in inthiel fai ding a nih.
25 “Amiruokchu, miin ramhnuoiah mi nunghak huol sa intuokpui a, a suol lui chun, a suoltu pasal chu sukhlum ding a nih. 26 Nunghak chun thǐna khop suol a thaw naw leiin ieng khom law naw ro. Hieng ang thil hi mani tuolbawmhai beia that ang a nih. 27 Mi chun nunghak chu ramhnuoiah a va tong fùk a, nunghak chu a khêk a, sienkhom santu ding a hmu si naw lei a nih.
28 “Miin nunghak thienglăm, mi la huol lo a tuok a, a suol lui a, chu chu hmu suok a ni chun, 29 a zălpuitu chun a nunghak pa chu tangkaruo sekel sawmnga a pêk ding a nih. A nunghak chu a sukhmingsiet ta leiin a nei ngĕi ding a nih; a dam sungin ma thei naw nih.
30 “Tu khomin mani pahai nuhmei laia mi zàlpuiin a pa a sukmuolpho ding a ni nawh.