Tuol thî chungchang
21
1 “LALPA in Pathienin hluo dinga a pĕk chêu rama chun khawhnawmah tu amanih sukhlumin um sien, a philtu hriet ni si naw sien, 2 in upahai le rorêltuhai hung an ta, an philna hmuna inthokin a vêla khuohai hlatzie chu inkhìng an ta, 3 a ruong zalnaa inthoka khaw hnai taka upahai chun bawng la tuoi, la sor ngai lo le ringkol la bat ngai lo chu hung kei an ta, 4 loa inlet ngai lo le thlai la chǐngna ngai lo, tui luongna ruoma chun kei thlang an ta, chu taka chun a rîng an tan ding a nih. 5 Chun, LALPA in Pathienin a rongbawltu, LALPA hminga malsawmtu le thubuoi le invuok thuhai rêltu dinga thiempu a ruot, Levi naupahai chun hung pan hnài an ta, 6 a ruong umnaa inthoka khaw hnâi taka upahai chun ruoma bawngla rîng an tan chunga chun an kut sawpin, 7 ‘Kan kutin hi thisen hi kan insuo naw a, kan mit khomin thaw a ni lai a hmu bok nawh. 8 Aw LALPA, i’n tlan suok kan mi Israelhai ta dinga inremna kan hung siem hi lo pom la, poi tawk lo thisen insuona laka a maw chu kan mipuihai chungah intlâktir lul naw rawh” tiin hril an ta, thisen insuona laka chun ngaidam ni’ng an tih. 9 Chuonga LALPA mithmua thil indik in thaw chun poi tawk lo thisen maw chu in chunga inthokin inthiel fai in tih. Sala man nuhmeihai chungchang
10 “In hmĕlmahai in do a, LALPA in Pathienin in kutah a pêk chĕu a, 11 sala in thruoi nuhmeihai lai chun hmel thra in tizawng le nuhmei dinga in ditzawng in hmu chun, 12 in inah thruoi unla, an lu vawpêk unla, an kut tin tan raw hai se. 13 An sal thuom chu hlip an ta, in ina um an ni ta leiin, thla khat sung an nu le pahai sûn an ta, chu hnungah pawl thei in ta, an pasal ni’ng in ta, in nuhmei ni bok an tih. 14 Sienkhom, in lung tlŭk zawng an lo ni naw chun an nuomná nàa fe in phalpĕk ding a nih. Sumin in zor ding a ni nawh, in sukhmingsiet ta si a.
Nau lutir rohluo chungthu
15 Miin nuhmei pahni nei sien, pakhat chu ditin pakhat chu dit naw lem sien, a dit le a dit naw lem chun naupa neipêk ve ve hai sien, a nau lutir chu a dit naw lem nau ni sien, 16 a ro chu a naupahai a’n khăwmtir hunah a dit tak naupa chu a dit naw lem naupa nĕka upa lemah a sie ding a ni nawh. 17 A dit naw lem naupa chu a nau lutir, a ro po poa chan hni khâwmtuah a sie ding a nih. A nau lutir chu a pa hrătna ra hmasa tak a na, nau lutir nǐna chu a chanpuol a nih.
Nau hel chungthu
18 Miin naupa lulul le hel hmang tak nei sien, a nu le pa thu awi loin an thununna pom nuom naw sien, 19 a nu le pa chun chelin, an khaw kul kotkhar bula upahai kuoma chun an hung thruoi ding a nih. 20 An khaw upahai kuoma chun, ‘Kan naupa hi mi lulul tak le hel hmang tak a ni a, kan thu khom a awi nuom naw a, inthĕ chek hmang le zu inrui hmang a nih’ an ti ding a nih. 21 Chuongchun, khuoa mi po po chun lungin an dĕng hlum ding a nih. Nangni laia inthokin suol chu in inthiel fai ding a nih. Chu chu Israel mi po poin hrieng an ta, trìng an tih.
Dan dang threnkhat
22 “Tu khom thina khop thil suol thawtu chu sukhlum a ni a, thinglĕrah in khai a ni chun a ruong chu thinga chun zankhuoin a um ding a ni nawh. 23 A thi ni lá làin in phûm ding a nih, tu khom thinga khai chu Pathien trongsephur a ni si a. LALPA in Pathienin in rochung dinga a pĕk chêu ram hi in sukporchè ding a ni nawh.