Indo chungchangah
20
1 “In hmĕlmahai leh indo dinga in suok huna an sakor hai, tawlailir hai le nangni nêk daia tam an sipai hai in hmu pha chun tri naw ro, Aigupta rama inthoka thruoi suoktu chêu LALPA in Pathien chu in kuomah a um ding a ni si a. 2 In indo tăwmin sipaihai hmaah thiempu hung a ta, sipaihai chu hieng ang hin infui a tih: 3 ‘Aw, Israelhai, ngaithla ro, tuhin in hmĕlmahai leh in indo ding a nih. Tri naw unla, zâm naw unla, an hmaah thlabârin chî-ai naw ro. 4 In hmĕlmahai dopêk ding chêu le hnĕna inchangtir ding chĕua nangni kuoma um chu LALPA in Pathien a ni si a’ tiin.5 “Chun, hotuhai chun in mihai kuomah, ‘In thar bawla inhlăn hman lo in um am? A inah kîr nawk raw se, nakie thi pal a ta, mi dangin a in chu inhlăn hlauh rawi an tih. 6 Chun, grep huon siema a rà la sor hman lo in um am? A inah kir nawk raw se, nakie thi pal a ta, mi dangin sor hlauh rawi an tih. 7 Nuhmei ding huola la nei hman lo in um am? A inah kir nawk raw se, nakie indonaah thi pal a ta, mi dangin nei rawi an tih’ tiin in hril ding a nih. 8 Chun, hotuhai bokin, ‘A tri le a zâm in um am? A inah kir nawk raw se, ama ang bokin a unauhai khom lo lungphăng rawi an tih’ ti ro. 9 Hotuhaiin an sipaihai kuoma thu an hril zo pha leh, sipaihai inrawitu ding kawmandar an thlang ding a nih.
10 “Khuo rŭn dinga in va hnai pha chun, a khaw mihai kuomah inrem in nuom thu hril hmasa phot ro. 11 Inrem an lo nuoma an lo inpĕk chun, chu taka mi po po chu sinthawah sor in ta, in rong an bawl ding a nih. 12 Inrem nuom loa an lo do chêu chun, a khuo chu inhuol ro. 13 In kutah LALPAN a pêk pha chêu chun, a sunga um pasal po po chu that fai vong ro. 14 Nuhmei le naupanghai, ran ruol le an thil nei dang in râllâkhai chu nangni puola dingin hăwn thei in ta, LALPA in Pathienin in hmĕlmahai thil râllâka a pèkhai chĕu chu hmang thei in tih. 15 Chuong ang chun in umnaa inthoka ram hla, in kawl hnaia um hnam danghai ta ni lo khuohai chu, in thaw ding a nih.
16 “Amiruokchu, LALPA in Pathienin rochana a pĕk chêu ram sunga khuoa hai ruok chu inthuok thei taphot chu hlă nei naw ro. 17 LALPA in Pathienin thu a pĕk ang chĕuin, sukchimit vong tawl ro. Chuong hnamhai chu Hit hai, Amor hai, Kanan hai, Periz hai, Hiv hai le Jebu hai an nih. 18 Chuong naw chun an pathien biek dan tirdakum tak chu zui ve dingin zirtir an ti chêu a, LALPA in Pathien lakah thil suol thaw rawi in tih.
19 “Chun, hun sawt tak khuo in inhuol a, la dingin nasa takin in indo a ni khomin a khuoa thinghai chu phûr thlu naw ro, a rà in la sor ding a ni leiin phûr naw ro. Tuola thinghai chu ieng leiin am hmêlma angin in inhuol ve ding? 20 A rà fak thei lo thinghai ruok chu a khuo in lâk chena kul inhuon khumna dingin phûr thei in tih.