Fel lei a ni nawh
9
1 “Aw Israelhai, ngaithla ro. Nangni nêka hnam lien lem le hrât lem, an khawpuihai khom van tonga kula inhuon chu va hlu suok dingin Jordan vadung in kân el ding a ni ta hi! 2 Anni chu Anak thlahai, mi lien le dung insang tak tak an nih ti in hriet ta a, “Tuin am Anak thlahai chu an ngam thei ding?” in ti hlak kha. 3 Nisienlakhom, meichok anga lem zo theitu, voisuna in hmaa fe ding hi LALPA in Pathien a nih ti hre chieng ro. Ama chun anni chu sukbohmang a ta, in hmaa ngei tukdol tawl a tih. In kuoma LALPAN a tiem tah angin, anni chu hnot suok in ta, sukchimit nghàl in tih.4 “LALPA in Pathienin a hnot suokpek pha chĕu in lungrilin, “Kan felna leiin hi ram hi hluo dingin LALPAN a mi thruoi lŭt a nih” ti naw ro. Hieng hnamhai hi an rîtlona leiin LALPAN a hnot suok ding a nih. 5 In fel lei le in ringum leia ram chu hluo ding in ni naw a, hieng hnamhai hi an suol ĕm leiin le in pi le pu Abraham hai, Isak hai, Jakob hai kuoma inkhâm meua LALPAN a lo tiem tah chu hlen dingin LALPA in Pathienin anni chu a hnot suokpĕk ding chĕu a ni lem. 6 Hi ram thra tak, in hluo dinga LALPAN a pĕk chêu hi, in fel lei a ni nawh ti hre ro; hnam lulul tak in ni si a.
Rangkachak bawng lim
7 “Thlalèra LALPA in Pathien lung in suksenzie kha theinghil ngai naw ro. Aigupta in suoksana inthoka hi hmun in tlung chen hin LALPA laka hel in hmang hlè a nih. 8 Horeb tlànga khan nangni sukhlum phà khop hielin LALPA lung in suksen a nih. 9 Lungphĕk, in kuoma LALPAN thu a thlungna lungphĕk chu la dinga tlânga ka hang fe lai khan ni sawmli le zan sawmli ka hang thang a, chu sûng chun bei ka fak naw a, tui ka dawn bok nawh. 10 LALPA chun lungphĕk pahni, Pathien kutpăra ziek chu a mi pĕk a. Chu lungphĕka chun in pungkhawm nia tlânga inthoka LALPAN in kuoma thu a hril po po kha a chuong a.
11 “Ni sawmli le zan sawmli hnunga chun lungphĕk pahnih, thuthlungna lungphèkhai chu LALPAN a mi pek a. 12 LALPA chun ka kuomah, ‘Tho la, hi taka inthok hin fe thla nghal rawh. Aiguptaa inthoka i thruoi suok, i mihai chu an insukporchè zo ta khu. Zawm dinga thu ka pĕk lampui chu an pĕtsan tah pang a, milim sung chop an insiem ta khuh!’ a ta. 13 Chun, LALPA chun ka kuomah, ‘Hi mihai hi ka en vang vang a, hnam lulul an lo ni takzet hi tie! 14 Mi’n kiengsan la, anni sukbohmang ding le vankhup hnuoia inthoka an hming thâi bo dingin ka lâw lăw hang law tawl ka tih. Nang ruok chu anni nêka hnam hrât lem le tam lemin siem ka ti che’ a ta.
15 “Chuongchun, tlanga inthok chun lungphèk pahni chu kuta chawiin ka kîr thla a, tlâng chu a chok puot puot a. 16 Ka hei thlir chun, ngai ta u, LALPA in Pathien lakah in lo suol ta a, milim, bawng tuoi lim sung chop chu in lo insiem a, LALPAN lampui hraw dinga thu a pĕk chêu chu in lo pĕtsan ta pang ti ka hmu a. 17 Chuongchun, kut khing hnia ka chawi lungphĕk chu ka pei thlăk a, in mithmua ngei a koi dar ta vong a.
18 “Chun, ni sawmli le zan sawmli LALPA hmaah kûnin ka bokkhup nawk a. LALPA suklungsen a, a mithmua thil suol in thaw po po lei chun bu ka fâk naw a, tui ka dawn bok nawh. 19 LALPA lungsen inling chu ka tri a, sukbohmang vong chêu khopin a lung in suksen bok si. Sienkhom, chu trum khom chun LALPA chun a mi ngaithlak nawk a. 20 Sukbohmang nuom khopin Aron chunga khom LALPA lung chu a sen a, sienkhom chu lai chun Aron ta ding khomin ka hnipĕk a. 21 In thil suol thaw, bawng tuoi lim in siem chu ka lâk a, ka raw a, hnuoiah ka suknawi a, pilvut angin ka rawt dip a, a dip chu tlanga inthoka hung luong tuia chun ka dehawn a.
22 “Chun, Tabera le Kibrot-hatava hmuna hai LALPA in suklungsen bok a. 23 Kadesh-barnea hmunah LALPAN, “Ram ka pĕk chêu chu hang hluo ta ro” tia a tir lai chêu khan LALPA in Pathien thupêk chu helsanin, ama chu in ring naw a, a rawl in ngaithlak bok nawh. 24 Ka hriet tir chêua inthok khan LALPA chunga hel hmang mi in ni hrim a. 25 Chuongchun, LALPAN, ‘Ka sukbohmang tawl ding a nih’ a ti lei chêu khan LALPA hmaah ka kûn a, ni sawmli le zan sawmli zet ka bokkhup a ni kha. 26 LALPA kuoma chun, ‘Aw Chunghnungtak LALPA, thilthawtheina ropui taka i kut hràta Aigupta rama inthoka i‘n tlan suok, i mihai le i rochanhai hi sukbohmang lul naw raw khai. 27 I siehlaw Abraham hai, Isak hai, Jakob hai kha hre zing la, hi mihai lululzie dam, ritlozie dam le suolzie dam ruok hi chu hmu khûm lul rawh. 28 Chuong naw chun i mi hung thruoi suokna rama mihaiin, ‘LALPAN a ram tiema chun a thruoi lŭt thei naw leiin le a theida tawl leiin thlalĕrah that dingin a thruoi suok tawl a nih’ ti pal hlauh rawi an tih. 29 I thilthawtheina ropui tak le i bân phara i thruoi suok, i mihai le i rochanhai an ni mieu si a’ tiin ka ngĕn a.