Jakob thurosie
49
1 Jakob chun a naupahai chu a ko khawm a, an kuomah, “Thil la hung tlung dinghai ka hril theina ding chĕuin hung inkhawm ro. 2 Nangni Jakob nauhai, hung inkhawm unla, ngaithla ro. In pa Israel thu hi ngaithla ro. 3 “Reuben, nang hi ka nau lutir,
Ka thilthawtheina, ka hràtna ra hmasa tak,
Hmingthang le thilthawtheia mi khûm thei i nih.
4 Amiruokchu, tui anga so but i ni leiin,
Mihai khûm ta ngai naw ti nih.
I pa khumpuiah i kâi a,
Ka zàlna khum ngei el chu
I mi sukporchèpêk si a.
5 “Simeon le Levi hai unau kawlhnàm chu,
Nunrawngna hriemhrei a nih.
6 An inrawn khawmnaah fe nawng ka ta,
An inkhawmnaah thrang ngai naw ning.
An nuom nuomin an che a,
An lungsen pha tuol an that a,
Bawngchal zaper an săt chat a;
7 An lungsenna intûr tak chu,
Trongse phurin um raw se;
An lungturŭk râwng tak el chu,
Trongse phurin um bok raw se.
Jakoba chun thrè dar ka ta,
Israela chun sukdar ka tih.
8 “Juda, nang chu i unauhaiin,
Inpâk hlak an ti che;
I kut chun i hmêlmahai rǐngah,
Inrêktir hlak a ti che a,
I pa naupahai po po chu,
I hmaah hung kŭn an tih.
9 Aw Juda, sakeibaknei te ang i nih,
Ka naupa, i sa vè lai i hung kǐr;
Sakeibaknei sa inchàn angin i bok a,
Keipui bok lai ang elin,
Tuin am an suktho ngam ding che?
10 Lal hmol chu Juda laka inthokin,
Lak hmang ni ngai naw nih;
A neitu tak a hung inlang pha a,
Hnam tinin a thû an awi chenin,
Juda ke kara rorêlna hmol chu,
Lak hmang ni ngai naw nih.
11 A sabengtung chu grêp hruiah thlung a ta,
A sakor tuoi chu a ditna kâu takah thlung a tih.
A silfenhai chu uoiin-in sâwp a ta,
A korfuol chu grêp senin sâwp a tih.
12 A mit chu uoiin nĕkin duk lem a ta,
A hä chu bawngnêne nêkin vâr a tih.
13 “Zebulun chu tuipui kamah um a ta,
Long chawlna vakam ning a ta,
A ramri chu Sidon chen inzâr a tih.
14 “Isakar chu sabengtung zângru chang tak,
Ip pahni kara bok ang a nih.
15 Chawl chu thrain a hriet a,
A ram inhoizie khom a hriet bok.
Sienkhom rikphur dingin liengko a daw a,
Mi sor luiin a hung um tah.
16 “Dan chun a mihai chungah
Israel hnam a nǐna angin
Indik takin ro rêl a tih.
17 Dan chu lam sǐra rûlpui,
Lampuia rûlriel ang el,
A chunga chuong bin let khop a,
Sakor kea chuk hlaktu ang a nih.
18 “I sansuokna ka nghâk zing, LALPA.
19 “Gad chu râlin hung bei an ta,
Ama chun hnot thlûr tawl a tih.
20 “Aser hi a fàk thrâng a ta,
Lal fâk chi ang thil inhnik,
Amain siem suok a tih.
21 “Naftali chu zalèn taka zukpui tla,
Té nal tak tak nei hlak ang a nih.
22 “Josefa chu grêp ra nuom ang,
Tuikhur bula ra kûr thluk ang,
Banga inzâm kai dul ang a nih.
23 Theidain thalpui leh an bei a,
An kăp a, an hnaw tom a;
24 Sienkhom a thalngul a khau zing a,
A bân thä a hrât zing bok,
Jakob Mi hratkhawkhêng kut le,
Israel Lungpui le Vengtu lei chun;
25 I pa Pathien, thrangpuitu che,
Iengkimthawthei, malsawmtu che,
Van malsawmna vûr hlaktu che,
Lipui rila malsawmna petu che
Nene le sul malsawmna petu che leiin.
26 I pa malsawmpekna che hi,
A ropui lem tlâng hlunhai nĕkin,
Tlângpui hnienghnarna nêk daiin.
Chuong po po malsawmnahai chu,
Josefa lu sîpah innghat raw se,
A unauhai laia lal a ni si a.
27 “Benjamin chu satene hnukrâwl ang,
Zîng kârin a sa sè a fâk a,
Zan tieng a rallâk a sem hlak”
tiin.
28 Chuonghai po po chu Israel hnam sawm le hnam hnihai chu an ni a, an nina ang pei le inmila an pain an chungthu hrila mal a sawmpek dan chu a nih.
Jakob thi thu
29 Chun, an kuomah hieng thuchahai hi a pêk a: “Ka chipuihai kuomah thruoiin ka um vak ding a ni ta a. 30 Hit mi Efron loa pûk, Kanan rama Mamre zawna Makpela pùk, Abrahamin Hit mi Efron kuoma inthoka inphûmna dinga a lo chopa a’n chawka chun mi phûm ro. 31 Chu taka chun Abraham le a nuhmei Sari an phŭm a; Isak le a nuhmei Rebek an phŭm a, Leah an phûm bok a. 32 Lo le a sunga pûk um chu Hit mihaia inthoka a’n chawk a nih” a ta. 33 A nauhai kuoma thu a’n cha zo chun khumah a ke a hlăng kai a, a thlarau an thla a, a chipuihai kuomah thruoiin a um ve tah a nih.