Jakobin Efraim le Manase mal a sawm
48
1 Hun iemani chen hnunga chun Josefa kuomah, “I pa a damnaw ie” tiin an hung hril a. A nauhai Manase le Efraim chu a thruoi a. 2 Jakob kuomah, “I naupa Josefa a hung” tiin an va hril a. Israel chun a tha nei sun sangin khuma chun a thrung inkăng a.3 Jakob chun Josefa kuomah, “Pathien Iengkimthawthei chu Kanan ram Luz khuoah ka kuomah a hung inlàr a, mal a mi sawm a, 4 ‘Chi tam tak inthlatir ka ti che a, sukpung ka ti che a, hnam chi hrang hrangin siem ka ti che a, hi ram hi i thlahai kumkhaw ro dingin peng ka tih’ a ta.
5 “Tu hin i naupa pahnihai, Aigupta rama ka hung thlàk hmaa i neihai kha ka rochana ngai ding an nih. Efraim le Manase hi, Reuben le Simeon ang bokin, ka ta ni’ng an tih. 6 Hi hnunga nau i neihai ruok chu i ta ni’ng an ta, ram an rochung dinga chun an uhai hming intrawmpui an tih. 7 Padana inthoka ka hung kir lai khan vangduoithlak takin Rachel chu Kanan ramah, lam lailakah, Efrat khuo kan la hlat fe laiin a thi a. Efrat (Bethlehem an ti bok) panna lampuia chun ka vui liem tah a nih” a ta.
8 Israelin Josefa naupahai a hmu chun, “Tuhai am an na?” a ta. 9 Josefa chun, “Pathienin a mi pĕk naupanghai an nih” tiin a pa chu a hril a. A pa chun, “Hung thruoi hnai tawl rawh, mal ka lo sawm theina dingin” a ta.
10 A upa ta leiin Israel mit chu a chău ta a, a hmu thei ruon ruon chau a. Josefa chun a nauhai chu a hung thruoi hnai a, Jakob chun a lo kuo a, a fawp tawl a. 11 Israel chun Josefa kuomah, “I hmêl hmu nawk hi ka’n ring ta naw hrim hrim a, sienkhom tu hin i nauhai hmêl chen khom Pathienin a mi’n hmutir tah a ni hi” a ta.
12 Josefa chun a nauhai chu a pa kap kara inthok chun a kei suok a, bawka hnuoi sikin chibai a bûk a. 13 A nauhai pahni bâna chun a kei a, Efraim chu a kut chang tienga chelin Israel kut voi tieng panga chun a kei a, Manase chu a kut voi tienga chelin Israel kut chang tieng panga chun a kei a, a hung thruoi hnai a. 14 Israel chun a ban kawkal a, a kut chang tieng chu a naupang lem Efraim lu chunga chun a’n nghat a, a kut voi tieng chu a nau lutir Manase chunga chun a’n nghat a.
15 Josefa chu mal a sawm a:
“Mi thlatu Abraham le Isak hai zui hlak Pathien,
Ka pienga inthoka tu chena mi vengtu ka Pathien,
16 Siet theina po po laka inthoka
Mi’n tlansuoktu Vantirko chun,
Naupanghai hi malsawm raw se.
Ka hming le ami thlatu Abraham le
Isak hming chu hmingah put hai sien,
Hnuoia hin nasa takin hung pung raw hai se”
tiin.
17 A pain a kut chang tieng Efraim lu chunga a’n nghat lai Josefan a hmu chun a lawm naw a, Efraim lu sîpa a kut innghat lai chu Manase lu sipa son tumin a dom kang a. 18 A pa kuomah, “Pa, hi hi annawm ka nau lutir chu. A chungah i kut chang tieng innghat lem rawh” a ta.
19 A pa chun a nuom naw a, a kuomah, “Ka hriet, ka naupa, ka hriet. Ama khom hi hnama hril khop la hung ni’ng a ta, la ropui a tih. Amiruokchu, a sang hi ropui lem a ta, a thlahai khom hnam tam tak la hung ni’ng an tih,” a ta.
20 Chu ni chun mal a sawm tawl a:
“In hmingin Israel chun,
Hi malsawmna hi a puong a nih:
Efraim le Manase angin,
Pathienin inumtir raw se chêu”
tiin. Chuong ang chun Efraim chu Manase hmaah a sie a nih.
21 Israel chun Josefa kuomah, “Ngai ta, ka thi trêp ta a, sienkhom Pathienin umpui a ti chêu a, in thlatuhai rama chun thruoi kîr nawk a ti chêu. 22 Nang chu i unauhai chunga um i ni leiin an chan nêka tam pe chuong ka ti che a, Amor mihai kuta inthoka kawlhnâm le thala ka làk tlâng dung kha nei i tih” a ta.