47
1 Josefa chu Faraw kuomah a hang fe a, “Ka pa le ka unauhai chu an beram ruol, bawng ruol le an thil nei po po leh Kanan rama inthokin an hung tlung thla ta a, tu hin Gosen ramah an um” tiin a hril a. 2 A unauhai laia mi panga a thlang suokhai chu Faraw hmaah a hung thruoi a. 3 Faraw chun, “Ieng sin am in thaw hlak a?” tiin anni chu a lo indon a. 4 Anni chun, “I siehlawhai hi kan pi le pua inthok ta khan ran vai mi kan nih. Kanan ramah trăm a tla nasa a, i siehlawhai ran ruol fak ding a um ta naw a, hi taka hin iemani chen um hri dinga hung thla kan nih. Lunginsiet takin i siehlawhai hi Gosen ramah umhmun khuor mi phalpek rawh” tiin an ngĕn a.
5 Faraw chun Josefa kuomah, “Hi, i pa le i unauhai i kuomah an hung ta a. 6 Aigupta ram hlak chu i hmaah a’n zar dei duoi a. I pa le i unauhai chu ram thratna hmun i nuomna lai laiah hmun inkhuortir ta la, Gosen ramah umhmun khuor raw hai se. Chun, anni lai mi thilthaw thei tak hriet i nei chun ka ran ruol chungah hotuin sie rawh” a ta.
7 Josefa chun a pa Jakob chu Faraw kuomah a hung thruoi a. Jakob chun Faraw chu mal a sawm a. 8 Faraw chun, “Kum ieng zat am i ni ta a? a ta. 9 Jakob chun, “Ka khuolzinna kum hi kum 130 a ni ta a. Ka dam sung kum hi la tlawm sien khom a harsa a, ami thlatuhai inzin kum zat khom a chen zo ve nawh” a ta. 10 Jakob chun Faraw chu mal a sawm a, a kuoma inthok chun a fe suok a.
11 Josefa chun a pa le a unauhai chu hmun an khuortir a, Faraw thupĕk angin a ram thratna lai tak, Ramases biela chun in le lo hmun a pêk a. 12 Josefa chun a pa le a unauhai le a pa sungkuo hai chu an tam dàn dungzuiin fàk ding a pêk bok a.
Josefa le trăm tlâk
13 Trămpui mitsim lei chun a ram pumah fak ding hrim hrim a um ta naw a, Aigupta ram le Kanan ram khom a hung chău se zo ta a. 14 Josefa chun Aigupta ram le Kanan rama sum um po po chu bu inchawktirna mana chun a rût khawm ta vong a, chuonghai chu Faraw inah a sung lût pei a. 15 Aigupta mipui le Kanan mipuiin an sum nei an fak zo vong hnung chun Josefa kuomah an hung a, “Fak ding mi pe raw khai. I mithmua kan thi i phal ding am a ni? Kan tangka hlak kan hmang zo vong ta si a” an ta.
16 Josefa chun, “Chuonga tangka in nei ta si naw chun in ranhaiin bu hung thleng el ro” a ta. 17 An ran ruolhai chu Josefa kuomah an hung thruoi a, ama chun an sakor hai, beram le kêl hai, bawng ruol le sabengtung hai chu buin a lo thlengpek pei a. An ranhai man chun kum khat chu an tlingtla thei hràm a.
18 Kum a hung invoi a, a kum nawk chun Josefa kuomah an hung nawk a, a kuomah, “Kan sum po po hlak kan inkhawng da zo ta a, kan ranhai hlak i chang vong ta bok si a, kan taksa le kan lohai chauh naw chu ieng khom nei hrim kan nei ta nawh ti hi kan pu hmaah ip kan tum nawh. 19 I mithmua ngei keini le kan ram hi kan bohmang el di’m a ni? Keini ngei hi kan ram leh buin mi’n chaw la, keini le kan ram hi Faraw bawiah um el kan tih. Thi loa kan hring suok theina ding le ram hi a chieurieu nawna dingin bu chi ding mi pe hrâm rawh” an ta.
20 Josefa chun Aiguptaa ram po po chu Faraw ta dingin a’n chawk ta vong a. Trăm chu a nasa èm leiin Aigupta mihai chun an lohai chu an zor fai vong a, ram chu Faraw ta a hung ni ta vong a, 21 Aigupta ram dung le khanga umhai po po chu Josefa chun Faraw bawiah a sie ta vong a nih. 22 Thiempuhai lo ruok chu a lâk ve nawh, a san chu anni hin Farawa inthokin chatlak loin an fak khop thrangpuina an dong lei a nih. Chuleiin thiempuhai chun an ram an zor ve naw a nih.
23 Josefa chun mipuihai kuomah, “Tuhin nangni le in ramhai chu Faraw ta dingin ka’n chawk ta chêu leiin bu chî chu hung la unla, loah chîng ro. 24 In sǐk pha leh hmun ngaa threa hmun khat chu Faraw ta dingin sung ro. Hmun ngaa hmun li chu in bu chì ding dam le nangni le in sungkuohai le naupanghai fàk ding ni’ng a tih” a ta. 25 Anni chun, “Nangin kan hringna i san him ta si a. Kan pu hin mi ditsak sien, Faraw bawia chun um el kan tih” an ta. 26 Faraw kuomah lo tharsuok hmun ngaa threa hmun khat sung ding ti dan Josefa siem chu Aigupta ramin tu chen hin danah a la nei zing a; thiempuhai ram chauh a nih Faraw ta ni lo chu.
27 Israel rawihai chun Aigupta rama Gosen biela chun umhmun an khuor a, chu taka chun in le lo nei sap peiin an hung hmuingil a, nasa takin an pung a.
28 Jakob chu Aigupta ramah kum sawm le pasarih a um hman a, a dam sung po chu kum zakhat le sawmli le pasari a nih. 29 Israel chu a thi a hung hnai a, Josefa a ko a, “I mit ka tlung a ni chun i kut kha ka malpui hnuoiah rol la, lunginsietna le ringumna ka chungah inentir dingin thu mi tiem rawh. Aigupta rama hin mi phûm lul naw rawh. 30 Ami thlatuhai kuoma ka chawl pha chun Aigupta rama inthok hin mi zawn suok la, anni an phŭmna hmuna ngei chun mi phûm ve rawh” a ta. Josefa chun, “I hril ang tak chun thaw ngei ka tih” a ta. 31 Ama chun, “Inkhâm ngeiin thu mi tiem rawh” a ta, chuongchun a kuoma chun a’n khàm a. Israel chun a funghrol hmawra innam kangin Pathien a chawibiek a.