Aigupta ramah Jakob a fe
46
1 Israel chu a nei po po leh a suok a, Beersheba a zuk tlung chun a pa Isak Pathien kuomah hlànbiekna a’n hlàn a. 2 Zăna chun Jakob chu zèla umin Pathienin a biek a, “Jakob, Jakob’ tiin a ko a, Ama chun, “Hi taka hin ka um” a ta. 3 Pathien chun, “Kei hi Pathien, i pa Pathien chu ka nih. Aigupta rama fe thlâk hi rin naw rawh. Chu taka chun hnam ropui takin siem ka ti che. 4 Aigupta rama chun fepui ka ti che a, thruoi kîr nawk ngèi ngéi ka ti che. Josefa kut lum ngeiin i thi ding pha leh dom hlum a ti che” a ta.5 Jakob chu Beersheba-a inthok chun a suok a. Ama le nu le nauhai chuongna dinga Faraw tawlailir hung thona chun anni rawi po chu Israel nauhai chun an inchuongir a. 6 An ran ruolhai le Kanan rama an thil lam suok po po hai chu somin, Jakob le a thlahai chun Aigupta chu an tlung a. 7 Chuongchun, a naupa le a naunu hai, a tupahai le tunuhai le an thlahai po po chu Aigupta rama chun a lutpui tawl tah a nih.
8 Hienghai hi Israel thlahai (Jakob le a naupahai), Aiguptaa luthai hming chu a nih:
Jakob le Lea thlahai
9 Jakob nau lutir Reuben naupahai chu Hanok, Palu, Hezron le Karmi hai an nih. 10 Simeon naupahai chu Jemuel, Jamin, Ohad, Jakin, Zohar le Kanan nuhmei laka a nei Saul hai an nih. 11 Levi naupahai chu Gerson, Kohat le Merari hai an nih. 12 Juda naupahai chu Er, Onan, Sela, Perez le Zera hai an ni a, Er le Onan chu Kanan ramah an thi. Perez naupahai chu Hezron le Hamul an nih. 13 Isakar nau pahai chu Tola, Pua (Puva), Jasub (Joba) le Simron hai an nih. 14 Zebulun naupahai chu Sered, Elon le Jaleel hai an nih. 15 Chuonghai po po chu a naunu Dina bakah Lea naupahai, Padan Arama a um laia Jakob a neipekhai chu an ni a, an rêngin sawmthum pathum an nih.
Jakob le Zilpa thlahai
16 Gad naupahai chu Zefon (Zifion), Hagi, Suni, Ezbon, Eri, Arodi le Areli hai an nih. 17 Aser naupahai chu Imna, Isva, Isivi le Beria hai an nih. An farnu chu Sera a nih. Beria naupahai chu Heber le Malkiel an nih. 18 Chuonghai po chu Labanin a naunu Lea a pek Zilpain naupa Jakob a neipekhai chu an ni a, an rêngin mi sawmparuk an nih.
Jakob le Rachel thlahai
19 Jakob nuhmei Rachel naupahai chu Josefa le Benjamin an nih. 20 Josefa chun Aigupta ramah naupa Manase le Efraim a nei a, chuonghai chu On khuoa thiempu Potifar naunu Asenat-in Josefa a neipekhai chu an nih. 21 Benjamin naupahai chu Bela, Beker, Asbel, Gera, Naman, Ehi, Rosa, Mupim, Hupim le Arda hai an nih. 22 Chuonghai chu Rachelin Jakob a neipekhai chu an ni a, an rêngin sawmpali an nih.
Jakob le Bilha nauhai
23 Dan naupa chu Husim a nih. 24 Naftali naupahai chu Jaziel, Guni, Jezer le Silem hai an nih. 25 Chuonghai po chu Labanin a naunu Rachel kuoma a pek Bilha-in naupa Jakob a neipekhai chu an ni a, an rêngin pasari an nih.
26 Jakob naupahai po, an nuhmeihai tiem sa loin, Jakob le Aiguptaa lut, a thràlbea suok po po chu an rêngin sawmruk paruk an nih. 27 Aigupta rama pieng Josefa naupa pahnihai le tiem chun Aiguptaa Jakob sungkuo fe po chu an rêngin sawmsari an nih.
Gosen Bielah Jakob a chêng
28 Gosen biel tienga fe dan ding lam zongtu dingin Jakob chun Juda chu Josefa kuomah a tir hmasa a, chuongchun Gosen ram an tlung ta a. 29 Josefa chun a sakor tawlailir a buotsai a, a pa hmuok dingin Gosen a pan a. Josefa a tlung a, a pa a hang hmu chun a kuo a, sawt fê an trap a.
30 Israel chun Josefa kuomah, “Keima ngeiin i la dam zing ti ka hmu ta a, tu hin chu thi ka’n huom tah” a ta.
31 Josefa chun a unauhai le a pa sungkawhai kuomah, “Faraw kuomah hang feng ka ta, hieng hin hang hril ka tih: ‘Ka unauhai le ka pa sungkawhai kha tu hin Kanan rama inthokin an hung tlung ta a, 32 anni chu ran vaitu an ni leiin an beram ruol le bawng ruol le an nei po po khom an hung sawm thlâk vong a nih’ tiin. 33 Chun, Farawin a ko cheu a, ‘Ieng sin am in thaw hlak a?’ ti a’n don pha chĕu chun, 34 ‘I siehlawhai hi kan thlatuhaia inthok ta khan kan naupang têta inthoka tu chen hin ran vaitu kan nih’ ti ro, chuongchun Gosen ramah inumtir a ti chêu. Beram vêngtuhai rêng rĕng chu Aigupta mihai tirdak zawng tak an ni si a” a ta.