4 Josefa chun a unauhai kuomah, “Mi hung hnai ro” a ta. An va hnai chun an kuomah, “In unaupa Josefa, Aigupta tienga in zor ngei kha ka nih. 5 Nisienlakhom, hieng tienga in mi lo zor lei khan lungngai naw unla, mani intheida pha bok naw ro; mihai hringna sandam dingin Pathienin in hmaah a mi lo tir hmasa a nih. 6 Hi rama hin kum hni sung tràm a tla ta a, kum nga dang la hung ding sung hin tu khomin lo keiin sîk naw ni hai. 7 Hnuoi chunga in chi thla um sunhai humhal ding le in hringna ropui taka san suoktu ni dingin Pathienin nangni hmain a mi lo tir hmasa a nih.

8 “Chuleiin, hi taka mi’n fetirtu chu nangni ni loin Pathien a ni lem. Ama chun Faraw paa dam, a insung po po chunga hotu nina dam le Aigupta ram po po chunga rorêltuah dam a mi sie a. 9 Tuhin inrang takin ka pa kuomah hang fe unla, a kuomah, ‘I naupa Josefa chun hieng hin a tih: Pathienin Aigupta ram po poa hotuah a mi siem a. Sawt riel loin ka kuomah hung thla rawh. 10 Gosen ramah um i ta, ka bula ngei i um ding a nih, nang le i nauhai le i tuhai, an beram ruol le bawng ruolhai le i nei po po leh. 11 Chu taka chun keiman chawm ka ti che. Trăm hun ding kum nga a la um si a. Chuong naw chun nang le i sungkuo le i thil nei po po leh inkhâwng da zo vong rawi in tih’ tiin.

12 “Nangni ngei le ka sangpa Benjamin khoma a mi hmu angin, kei ngei kha ka nih tuta nangni betu cheu hi. 13 Aigupta rama chawimawina ka dong po po le in thil hmuhai po po hi ka pa kuomah hang hril ro. Chun, inrang takin ka pa kha hung thruoi thla ro” a ta.

14 Chuongchun, a sang Benjamin chu a kuo a, a trap a, Benjamin khomin trap pumin a u chu a kuo bok a. 15 A unau danghai po po chu a fawp a, an rêngin an trap a. Chu hnunga chun a unauhai chun thukhawchâng an hrilpui a.

16 Josefa unauhai an hung thu chu Faraw ina khom an lo hriet a, Faraw le a rongbawltuhai chu a suklawm hle a. 17 Faraw chun Josefa kuomah, “Hieng hin i unauhai chu hril rawh: In ranhai phur ding bu siem unla, Kanan ram tieng kir nawk nghal unla, 18 in pa le in sungkuohai leh hung kir nawk nghal ro. Aigupta rama ram thratna tak pe’ng ka ti chêu a, a ram hnienghnarna in tlăn ding a nih’ ti rawh. 19 Chun, hieng anga hril tawl dingin thu ka pêk bok che: Hieng hin thaw ro. In nuhmei le in nauhai chuongna dingin Aiguptaa inthokin tawlailir chawi unla, in pa hang thruoi thla ro. 20 In thil neihai khom hung ngaisak naw ro, Aigupta rama thil thra po po chu in ta vong a ni si a’, tiin.

21 Chuongchun, Israel nauhai chun chuong ang chun an thaw a. Farawin thu a pĕk angin, Josefa chun tawlailir le lampuia an fak ding a pêk a. 22 An rêngin silfen thar a pêk seng a, Benjamin ruok chu silfen thar panga le tangka sekel zathum a pêk a. 23 A pa kuoma chun thilpêk hieng hi a thon bok a: Aiguptaa an thil hlu neihai phurtu sabengtungchal sawm le lampuia an fak ding bu le bei le khorsaw dang phurtu sabengtungpui sawm. 24 Chu zoah a unauhai chu a’n fetir a, an kuomah, “Lampuiah insêl inhal awi lo” a ta.

25 Chuongchun, Aigupta rama inthok chun an pa Jakob umna Kanan rama chun an tlung nawk tah a. 26 Anni chun an pa kuomah, “Josefa kha a la dam zing a, Aigupta ram po po chunga rorêltu a ni tah!” tiin an hril a. Jakob chu a mit sul a, an thu hril chu a awi nawh. 27 An kuoma Josefa thu hril po po an hril vong hnung le tawlailira a thil hung thonhai a hang hmu hnung chun an pa Jakob lungril chu a har ta huoi a. 28 Israel chun, “Tu hin chu ka naupa Josefa a la dam ngei a nih ti ka hmin zân! Ka thi hmain fe’ng ka ta, zu hmu’ng ka tih”a ta.