3 Zing khuo a var char chun anni chu an sabengtung leh an infetir a. 4 Khuoa inthoka an suok chu, an la phàk hlat hmain, Josefa chun a in enkoltu kuomah, “Tho la, khanghai kha va hnot rawh. I hnot phăk phâ leh an kuomah, ‘Ieng leia thil thra thil thra loa in rul am a na? 5 Kha kha ka pu uoiin dawnna le a âisânna no a ni naw am a ni? In thilthaw hi thil thra lo tak a nih’ va ti rawh” a ta.

6 A va hnot phak chun chuong thu chu an kuomah a hril a. 7 Anni chun, “Pu, iengti zie am a na hieng thu i hril hi? I siehlawhai hin chuong ang thil chu kan thaw awm naw êm el. 8 Kan ip băua tangka kan hmuhai khom kha Kanan rama inthokin i kuomah kan hung chawi kir nawk a ni kha. Ieng tin am i pu ina tangka amanih rangkachak amanih chu kan inrûk ding? 9 I siehlawhai lai hin tu khom i hmŭna taphot chu thi mol raw se, keini khom kan pu suokah um el kan tih” an ta. 10 Ama chun, “Awleh, inti ang chun ni raw se. Amiruokchu, ka hmŭna taphot chu kan suokah a um ding a nih; a dang ruok chu fihlîm vong in tih” a ta.

11 An ip seng chu hnuoiah an chawi thlak a, an hong a. 12 Ama chun a upa taka tranin a naupang tak chen ip chu a dap a, no chu Benjamin ipa chun a hmu ta a. 13 Chu phing leh an silfenhai an pot thlĕr a, an ip seng chu an sabengtung seng an inphurtir a, khawpui tieng an kir nawk a.

14 Juda le a unauhai an hung tlung chun Josefa chu inah a la um zing a, a unauhai chu an hung a, a hmaa chun hnuoi sikin an bokkhup a. 15 Josefa chun an kuomah, “Ieng am a na in thaw ta hi? Kei chun aisanin thil ka hmu suok thei vong ti in hriet naw am a ni?” a ta.

16 Juda chun, “Pu, ieng am hril tang kan ta? Ieng tin am kan inhril suok ta ding? I siehlawhai suolna chu Pathienin a hung phor suok tah a ni hi. Tu hin i suok vong kan ni ta hi, kei le a kuta no an hmùna khom hi” a ta.

17 Josefa chun, “Chuong ang chun thaw naw ning, a kuta no an hmùna chauh hi ka suokah um a tih. A dang po chu thlamuong takin in pa kuom tieng kîr nawk ta ro” a ta.

18 Chu phing leh Juda chun a va pan hnai a, “Pu, lunginsiet takin i siehlaw hin i hmaah thu bău khat bêk a hril mi phalpêk hràm rawh. Faraw leh intluk hiel ni la khom, i siehlaw chunga hin lungsen naw hrăm rawh. 19 Ka lalpa chun i siehlaw kuoma hin, ‘Pa le unau dâm in nei am?’ tiin i mi’n don a. 20 Keini chun, ‘Nei e, Pa, putar tak le a tar tieng nau, a naupang tak kan nei a, chu u chu a thi ta a, a nu nauhai laia a dam um sun a na, a pa chun ama chu a hmangai khop el’ kan ti a.

21 “Chun, nangin i siehlawhai kuomah, ‘Ama chu ka mit ngeia ka hmu theina dingin hung thruoi thla ro’ i ti a. 22 Pu, keinin i kuomah, ‘Kan sangpa chun a pa maksan thei naw nih, a maksan chun a pa chu thi el a tih’ kan ta. 23 Sienkhom, nang chun i siehlawhai kuomah, ‘In sangpa in hung thruoi naw chun ka hmêl hmu thei ta naw ti niu’ i ta. 24 I siehlaw, ka pa kuom kan hang tlung chun aw pu, i hril ang tak khan kan hril a. 25 Kan pa chun, ‘Zu fe nawk ta unla, bu iemani zat zu’n chaw nawk ro’ a ta. 26 Keini chun, ‘Zu fe thei ta naw’ng kan tih. Kan mi tlum tak hi a hung ruok chun zu fe’ng kan ta, a hung naw ruok chun chu mi hmĕl chu kan hmu thei ta naw ding a nih’ kan ta.

27 “I siehlaw ka pa chun, ‘Ka nuhmeiin nau pahnih a mi neipek ti in hriet a. 28 Pakhat chu ka kuoma inthokin a fe suok a, pot chen vongin a um ni ngei a tih ka ta, chu taka inthok chun ama chu ka hmu ta ngai naw a. 29 Ama khom hi ka kuoma inthoka in thruoi suok a, tuoksuol a zu tuok palh chun ka lu, kelsam tro ta hi lungngaiin thlănah in inliemtir ding a nih’ a ta.

30 “Chuleiin, bawipu hi kan kuoma thrang ve loa i siehlaw, ka pa kuom kan hang tlung chun, a hringna chu bawipu leh hin an inzom tlat si leiin, 31 bawipu a thrang nawh ti a hriet charin thi’ng a ta, i siehlawhai hin i siehlaw kan pa, lua kelsam tro ta chu lungngaiin thlànah kan inliemtir ding a nih. 32 I siehlaw hin, ‘I kuomah ka hung thruoi nawk naw chun a maw chu kumkhuoin phur ka tih’ tiin ka pa lakah bawipu chungthua mawphurtu takah ka lo insiem ta a. 33 Chuleiin, lunginsiettakin i siehlaw hi bawipu aiah i suokah mi’n umtir la, bawipu hi a uhai leh inkirtir nawk hràm rawh. 34 Bawipu thrang lo chun ka pa kuom tieng ieng tin am kir nawk thei ka ta? Thei naw nih. Rinumnan ka pa a tlàk buok ding chu lunginsiet takin mi’n hmutir lul naw rawh” a ta.