Aiguptaa an inzin voi hnina
43
1 Chu rama chun tràm a la tla nasa hle a. 2 Aiguptaa inthoka an bu hung phur an fàk zo chun an pa’n, “Fe nawk ta unla, bu tlawm azawng zu’n chaw nawk ro” a ta. 3 Juda chun, “Chu pa chun, ‘In sangpa in hung thruoi sa ve naw chun ka hmêl hmu ta naw ti niu’ tia ursun taka a mi hril sa a nih. 4 Kan sangpa hi keini leh i’n fetir chun zu fe’ng kan ta, bu chu zu’n chaw nawk kan tih. 5 A fe i phal si naw chun, zu fe naw’ng kan tih, a san chu mi khan, ‘In sangpa in hung thruoi ve naw chun ka hmêl hmu ta naw ti niu’ a ti ta sä a ni leiin” a ta. 6 Israel chun, “Ieng leia sang dang in la nei thu dam chu hril kher kher a, ka chungah buoina in intlungtir am a na?” a ta. 7 Anni chun, “Aman chîk takin kan chanchin le ei insung chanchin a mi’n don a. ‘In pa teh a la dam am? Unau dang in nei am?’ dam a ta. A thil indon chu mawl takin kan hril el a nih. ‘In unaupa chu hung thruoi thla ro’ a mi ti ding ieng tin am kan hriet kher ding?” an ta.
8 Juda chun a pa Israel kuomah, “Naupang hi kei leh mi’n fetir la, nang le keini le kan nauhai hi thi loa ei dam theina dingin inthok suok nghal kan tih. 9 A him dan ding chungthuah kei hi maw mi’n phurtir vong rawh. Hi taka hin i hmaah ka hung thruoi kir nawk naw vai chun, ka dam sungin a maw iengkim phur vong ka tih. 10 Tu khom hin, fe intak naw inla chu voi hni zet tlung hman ding ei ni tah” a ta.
11 An pa Israel chun an kuomah, “Chuong a ni tlat si chun, hieng hin thaw ro. In ipa khan hi rama thil thra threnkhat thinghnai damdawi dam, khuoizu dam, mawsawla le murra dam, makhak mu dam, ruon mu dam tlawm azawng bêk a kuoma thil pek ding chawi ro. 12 Tangka khom in chawi lêt hni chawi ro, in ipa an lo thun kha in pek kir a trûl ding a ni leiin, an thaw palh a ni el thei a. 13 In sangpa khom thruoi unla, a kuomah zu fe nawk vat ro. 14 In unaupa leh Benjamin leh in hung kir nawk a phalna dingin, LALPA Iengkimthawthei chun chu mi chu in chungah lunginsietna inneitir raw se. Kei ruok chu, lu ka sŭn leh ka sŭn ding a ni ma el” a ta.
15 Anni chun thilpek ding le tangka a let hni an chawi a, Benjamin an thruoi a, inhmaw takin Aigupta tieng an pan thlak a, Josefa hmaa chun an inlang nawk ta a. 16 Anni leh Benjamin a hmu charin Josefa chun a in enkoltu kuomah, “Hienghai hi ka inah thruoi la, ran that la, thlaithleng buotsai rawh; ka kuomah sunbu an fak ding a nih” a ta. 17 Ama chun Josefa thupek angin a thaw a, a ina chun anni chu a thruoi lùt a. 18 Josefa ina an thruoi lùt lei chun anni chu an thlaphâng hle a. “Ei fe hmasaka ei ipa tangka an lo sie leia hi taka an mi thruoi lut a ni awm hi. Ama hin mi bei a, mi hne a, suokah mi man a, ei sabengtunghai lak a tum ning a tih” an ti a.
19 Josefa in enkoltu chu an va hnai a, a in kotkhar bula chun an va biek a, 20 “Pu, kan hung hmasak khan bu inchaw ding chaua hung thla kan na. 21 Sienkhom, zana kan rieknaah kan ip kan hang hong leh kan tangka fun chawi seng kha, a rik dan khom a ngai char seng chu, kan ip bauah a lo um a. Chuleiin, tangka chu kan hung chawi kir nawk a nih. 22 Bu kan inchawkna ding khom tangka a hranin kan hung chawi bok. Kan ipa tangka kha tu sie am a nih ti kan hriet nawh” an ta.
23 Ama chun, “A poi nawh. Tri dêr naw ro. In Pathien, in pa Pathien chun in ipah rosum a pêk cheu a ni chu; in tangka kha ka hmu si a” a ta. Simeon chu an kuomah a hung thruoi a. 24 Chuongchun, anni chu Josefa inah a thruoi a, ke sawpna ding tui a pêk a, an sabengtunghai khom chu bu a pêk bok a. 25 Sùna Josefa a hung phaa an thilpĕk dinghai chu an siem lăwk a, chu taka chun bu an fak ding ti an hriet si a.
26 Inah Josefa a hung chun an thilpĕkhai chu an inhlàn a, hnuoi sikin chibai an bûk a. 27 Anni rawi chu iem an chang ti an don hnungin, “In pa tar tak in hril kha iem a chang a? A la dam zing de maw?” a ta. 28 Anni chun, “I siehlaw kan pa chu a la dam zing a, a la thra ie” an ta. Inza takin a hmaah an kûn a, chibai an bûk nawk a.
29 Josefa chu a hang dak a, a sang Benjamin, a nu naupa chu a hmu a, “Kha maw in mi tlum tak, a chanchin in mi hril kha?” a ta. Ama bok chun, “Ka naupa, Pathienin lunginsiet raw se che” a ta. 30 A sang a hang hmu chun lungriemin a thlak nasa êm leiin insŭm harsa a ta, trapna hmun zongin a pindanah a tlân lut a, chu taka chun a va trap suok ta a. 31 A hmâi a phi zo chun a hung suok a, insûm hrâm hrâmin, “Bu thur ta ro leh” a ta.
32 Ama ta dingin a tumin, anni rawi ta dingin a tumin, Aigupta mi a fakpuihai ta dingin a tumin thlaithlĕng chu an hung siem a. Aigupta mihai chun Hebrai mihai chu dawkan hmun khatah an kìlpui ngai nawh, chuong ang thil thaw chu Aigupta mihai ta dingin thil thieng lo a nih. 33 Anni rawi chu an upat dan indotin, nau lutir le a tlum tak chen indot thlapin Josefa hmaa chun an inthrung tlar a, makti takin an inen tuo a. 34 An buthlèng ding seng chu Josefa chun a’n semtir a, Benjamin thlènga chun mi dang lĕt nga topa tam an thurpek a. Chuongchun, uoiin dawnin hlim takin ama le chun ruoi chu an kìl tlàng ta a.