3 Jakob naupa sawmhai chu pûr inchaw dingin Aigupta ramah an zu fe a. 4 Josefa sang Benjamin ruok chu tuoksuol a zu tuok palh Jakob chun a’n lau leiin a uhai le chun a’n fetir ve naw a. 5 Kanan rama khom trăm a tla vong leiin, pûr inchawa fe ding mi danghai ruol chun Israel nauhai khom chu an fe ve a nih.

6 Chuong lai chun Josefa chu Aigupta rama larsap le a ram mihai po po kuoma bu zor suoktu a nih. A unauhai an hung tlung chun bokkhupa hnuoi sikin chibai an bŭk a. 7 Josefan a uhai a hmu chun a hriet nghal tawl a, sienkhom hnam dang anga insuklangin, “Khaw laia inthoka hung chêu” tiin vǐn takin a lo biek tawl a.

8 Josefa’n a unauhai chu lo hre tawl sien khom anni ruok chun ama chu an hriet nawh. 9 Kha hmaa anni chungthua a mang dam kha a hriet suok rum rum a. An kuomah, “Nangni hi enthlatu in nih. Kan ram kan veng thrat nawna lai hmun en dinga hung in ni hi” a ta. 10 Anni chun, “Ni lo e, pu, i siehlawhai hi pûr inchaw dinga hung kan nih. 11 Mi pakhat nau vong kan nih. I siehlawhai hi mi indik tak kan ni a, enthlatu kan ni nawh” an ta. 12 Ama chun, “In ni kha. Kan ram hi kan vĕng thrat le thrat naw enthla dinga hung in nih” a ta.

13 Anni chun, “I siehlawhai hi unau pasal sawmpahni kan na, Kanana um mi pakhat nau vong kan nih. Kan mi tlum tak chu kan pa kuomah a um a, pakhat ruok chu a um ta nawh” an ta.

14 Josefa chun, “Enthlatu in nih ka ti kha in ni ngei hi. 15 Hieng ang hin fie ning in tih: in mi tlum tak chu hi taka hin a hung naw chun hi hmuna inthok hin suok naw ti niu ti Faraw hringna sâlin ka hril chêu a nih. 16 In thu a’n dik le indik naw fiena dingin, nangni laia pakhat tir inla, in mi tlum tak chu hung thruoi raw se; a dang po chu lung inah intâng hri phot in tih. Chuong naw chun Faraw hringna salin. ‘Enthlatu in ni ngei hi’ ka ti ding chĕu a nih” a ta. 17 An rêng chun ni thum a’n tàngtir tawl a.

18 A ni thum ni chun Josefa’n an kuomah, “Hieng hin thaw inla, hring in tih, Pathien chu ka trî si a. 19 Mi indik in ni chun, in unaupa pakhat hi lung inah um sien, a dang po chun in sungkuo trâmhai ta ding bu phurin kîr nawk ro. 20 Amiruokchu, in mi tlum tak chu hung thruoi unla, chuongchun in thu chu chieng a ta, in thi naw ding annawm” a ta. Chuong ang chun an thaw a.

21 Anni chun, “Ei unaupa chunga ei thilthaw leia hrem ei ni chieng khop el. A hringna hlă dinga a mi ngĕn tràwk tráwk laia a lungril beidongzie kha hmu zingin ei ngaithlak nuom si naw a. Chuleiin, hi mangangna hin a mi tlakbuok a nih” an inti tuo a.

22 Reuben chun, “‘Naupang chungah thilsuol thaw naw ro’ ka ti rèng chêu an naw maw? Sienkhom, in mi ngaithlăk nuom si nawh. Tuhin a thisen maw chu ei tuor ding a ni hrim a nih” a ta. 23 Josefa chun trong inlettu hmanga a lo biek tawl leiin an thu chu a lo hriet vong ti an hriet si nawh. 24 Anni chu naw tieng a nghatsan a, a trap a, sienkhom a hung ngha kir nawk a, anni chu a biek a. Anni laia mi Simeon chu a’n thruoitir a, an hmua ngei chun a khuop a.

25 Josefa chun an iphai chu bu thun sip tral a, an tangka hung chawi seng chu an ip sunga seng thunpek a, lampuia an fak le dawn ding pe bok dingin thu a pêk a, chuong ang tak chun an thawpek a. 26 An ip seng chu sabengtung an inphurtir a, an suok dok ta a. 27 Anni laia pakhat chun zana an rieknaah a sabengtung chu bu pe dingin a ip a hong a, a tangka chu a ipa chun a hmu ta tlat el a! 28 A unauhai kuomah, “Ka tangka kha an mi pekkir a ni hi tie, ka ip baua hin a lo um tlat el!” a ta. An lung a kak rak a, inthin dur durin, “Ei chunga Pathien thilthaw dan hi iengtizie am a ni ta aw?” an ti a, an inen tuo a.

29 Kanan rama um an pa Jakob kuom an tlung chun thil um dan iengkim chu an hril a. 30 “Chu rama hotu chun vîn deuin a mi biek a, an ram enthlatua fè angin a mi ngai a. 31 Keini chun, ‘Mi indik tak kan nih, enthlatu kan ni awzawng nawh. 32 Unau sawm le pahni kan ni a, mi pakhat nau vong kan ni bok a, pakhat ruok chu a um ta naw a, kan mi tlum tak chu tu hin Kanan ramah kan pa kuomah a um a nih’ kan ta. 33 An ram hotu chun, ‘Mi indik tak in ni le ni naw chu hieng hin hre thei ka tih: in unau pakhat ka kuomah maksan unla, in sungkuo trâmhai ta dingin bu phur unla, fe ta ro. 34 Chun, in mi tlum tak chu ka kuomah hung thruoi ro. Chu chun enthlatu ni loin mi indik tak in nizie hre thei ka ta, in unaupa chu pe kîr nawk ka ti chêu a, hi rama hin sum khom dawng thei in tih’ tiin a mi ti a” an ta.

35 An ip an hang bun ruok lai chun, an ip senga chun an tangka fûn seng chu a lo um tlat el a! Chu chu an pa rawia an hmu chun an thla a phâng ta ĕm êm a. 36 An pa Jakob chun, “Nangni hi ka nauhai mi’n chăntirtu in ni hi. Josefa ka chân ta a, Simeon ka chân ta bok a, tu hin Benjamin chen khom thruoi hmang in la tum ta deu deu a. Hieng hlol hi a ni maw ka chunga thil tlung dan chu!” a ta.

37 Reuben chun a pa kuomah, “I kuomah ka hung thruoi kîr nawk naw chun ka naupa pahnihai hi that el rawh. Ka mawphurnaah sie la, i kuomah hung thruoi kîr nawk ngèi ngéi ka tih” a ta. 38 Ama chun, “Ka naupa hi nangni leh fe thla ve naw nih. A u a thi ta a, ama chauh hi a ni ta a, in fèna lampuiah tuoksuol in zu tuok pal hlauh sien, ka lu kelsam tro ta hi lungngaiin thlanah in inliemtir ding a nih” a ta.