Josefan Faraw mang a hrilfie
41
1 Kum hni zet a’n voi hnungin Faraw chun mang a nei a. Nile vadung kamah a lo ngìr a. 2 Vadunga inthokin bawngpui pasari, thâu le tlor thra tak tak el an hung suok a, phairuong lai chun an tla khawm a. 3 Chu hnunga chun, Nile vadunga inthok bokin bawngpui dang pasari, ber tak tak le kor tak tak an hung suok a, vakama bawngpui tlahai bula chun an ngìr a. 4 Bawngpui ber le kor tak tak hai chun bawngpui nàm thra le thau tak tak hai chu an fàk zo ta vong a. Faraw chu a thranghar ta a.5 A hang in nawk chun mang dang a nei a. Bu kûng khata hin bu vŭi sari, inhrol le thra tak tak, an hung suok a. 6 Chu hnunga chun bu vŭi chikté tè pasari, khawsak thliin a mŭt trăwl bor bor el hai chu an hung suok nawk a. 7 Bu vŭi chikté tèhai chun vŭi sari lien tak tak hai chu an lem zo el ta a. Faraw a hang thranghar chun a mang a lo ni hlau a.
8 A tûk zingkâr chun a lungril a mangang a, Aigupta ram sunga mitvai-dawithiem hai le mi var po po chu a ko khawm a, a mang chu a hril tawl a, sienkhom a hril fie thei an um si nawh.
9 Chu phing leh uoiin semtu hotu chun Faraw kuomah, “Voisun hin ka băksamna ka hriet suok ie. 10 A siehlawhai chunga Faraw a lungsen trum khan kei le bei siemtu hotu chu vengtu sipai kapten inah an mi’n tàngtir a. 11 Kan pahni chun zăn khat chu a ruolin mang kan nei ve ve a, kan mang chun umzie hrang a nei ve ve bok a. 12 Kan intăngnaa chun Hebrai tlangval, vengtu sipai kapten siehlaw a’n tăng ve a. Kan mang chu kan hril a, a kawk umzie ang charin ami hril fiepek ve ve a. 13 A hril fie ang char chun thil a hung tlung a, kei chu ka ngirhmun pangngaiah an mi hlangkai a, pakhat chu khai hlum” a ta.
14 Faraw chun Josefa chu a’n kotir nghal a, ripa inthok chun an hung thruoi suok a, a hmul a met fai a, a silfenhai a thlak a, Faraw hmaah a hung a. 15 Faraw chun Josefa kuomah, “Mang ka nei a, a hril fie thei an um si naw a. Sienkhom, nang chun mang an hril che chu i hril fie thei pei ti thu ka lo hriet a” a ta. 16 Josefa chun, “Kei chun ka thaw thei nawh, sienkhom Pathienin Faraw beisei donna chu pe’ng a tih” a ta.
17 Faraw chun Josefa kuomah, “Ka mangin Nile vadung kamah ka lo ngìr a. 18 Vadunga inthok chun bawngpui tlor thra le thâu tak tak pasari hi an hung suok a, phairuong lai chun an tla khawm a. 19 Anni hnunga chun bawngpui dang pasari, a rù khât ang el, ber tak tak le kor tak tak an hung suok a, chuong ang hrima bawngpui ber chu Aigupta ramah ka la hmu ngai nawh. 20 Bawngpui korhai chun bawngpui thau, a hung suok hmasahai chu, an fâk vong a. 21 An făk zo hnung khom chun an făk a nih ti tu khomin hre naw ni hai, a tira ang bok khan an la ber tawl zing a nih. Chu zoa chun ka thranghar a.
22 “Ka mang nawka chun bu kûng khata inthokin vui sari, inhrol le thra tak tak, an hung vui suok a. 23 Chu hnunga chun vui sari dang chikté tè, sak thliin a mŭt trăwl bor bor, rop riep el hi, an hung suok bok a. 24 Bu vui pisihai chun bu vui thrahai chu an dol zo vong a. Hi thu hi ka mitvai-dawithiemhai ka hril a, sienkhom tu khomin an mi hril fiepek thei si nawh” a ta.
25 Josefa chun Faraw kuomah, “Faraw mang hi thil thuhmun a ni a, Pathienin thil a thaw trĕp thu Faraw kuomah a puong a ni chuh. 26 Bawngpui thra pasari chu kum sari, buvui thra pasari chu kum sari tǐna ve ve a nih; a mang umzie chu thuhmun char a nih. 27 Bawngpui kor le ber pasari hung suokhai chu kum sari tina a na, hmang tlak lo bu vui sari, sak thliin a em trawlhai chu kum sari tina tho a nih. Kum sari sung tràm a tla ding ti inentirna a nih.
28 “Faraw kuoma ka hril tah ang khan, Pathienin thil a thaw ding lai trèp chu Faraw a hung inhriettir a ni hi. 29 Aigupta ram sung po poa hin kum sari sung a tontawin bu tam a ta, 30 chu chu trăm kum sariin zui a tih. Chu sung chun Aigupta hausakna po po chu mihaiin theinghil vong khopin trăm chun a ram pum nuoi tlaran a tih. 31 A zuitu trămpui mitsim chu a nasa êm leiin Aigupta ram hnienghnarna po po khom theinghil vong an tih. 32 Mang pahnia Faraw kuoma inhriettir a nǐna san chu Pathienin a thilthaw ding chu a sukthluk fel diem ta a, a thaw vak ta ding a ni lei a nih.
33 “Tu hin Farawin thil chinchang hre thiem le mivar zong suok sien, Aigupta ram chunga hin hotuah ruot raw se. 34 Bu suok tam hun kum sari sung po poa mi hmun ngaa threa hmun khat pei khon khawmtu dingin hotu ruot raw se. 35 Kum thrat kuma bu suok po po chu Faraw thupêkin la khawm hai sien, chu chu khawpuia hai kudâmah sêk khawl raw hai se. 36 Trămin a ram a sukram vong nawna dingin, Aigupta rama kum sari trăm a tlăk sunga ring dingin vong thra raw hai se” a ta.
37 A thu rot chu Faraw le a hnuoia sinthawtuhai po po chun thra âwmin an hriet seng a. 38 Faraw chun, “Pathien thlarau kol mi, hi mipa ang hi mi ei hmu zo ding am a ni?” tiin a mihai chu a’n don a.
39 Faraw chun Josefa kuomah, “Hieng po po hi Pathienin an hriettir che a ni leiin, nangma anga chinchàng hre thei le mivar tu khom an um nawh. 40 Chuleiin, ka lal ina hin a hotu tak ning i ta, ka khuo le tuihai hi i thu ang peiin um an ta, lalthrungphaa inthrung ka nina chauh hi i nêka ka’n lal lemna sun chu a nih” a ta.
Aigupta hotuah Josefa
41 Faraw chun Josefa kuomah, “Tuhin Aigupta ram po po chunga hotuah ka sie che” a ta. 42 Faraw chun a hming namna suoi kutsebi chu a kuta inthokin a phawi dok a, Josefa chu a’n buntir a, pat zâi inhmia siem korfuol a’n hăktir a, rangkachak khaidiet a’n hlìtir bok a. 43 Ama dottu a ni angin ama chuongna dottu tawlailira chun an chuongtir a, a hmaa fehai chun “Dingthrathruon ro” tiin an khêk pei a. Chuong ang chun Aigupta ram po po chunga hotuah a siem ta a.
44 Faraw chun Josefa kuomah, “Kei hi Faraw ka nia chu nangma thu naw chun Aigupta ram sung po poa hin tu khomin an kut le ke lek thei naw ni hai” a ta. 45 Faraw chun Josefa hmingah Zafenat Panea a’n bŭk a, a nuhmei dingin On (Heliopolis an ti bok) khuoa thiempu Potifar naunu Asenat chu a pêk a. Josefa chun Aigupta ram po po a fang suok a.
46 Aigupta ram lal Faraw hnuoia sin a thaw tran hin Josefa chu kum sawmthum mi a nih. Josefa chu Faraw kuoma inthok chun a suok a, Aigupta ram po po a fang a. 47 Kum thrat kum, kum sari sung chun a ramin bu a thar suok rawn hle a. 48 Kum sari sunga an tharhai po po chu Josefa chun a sêk khawm vong a, khawpuia hai chun a hlu lŭt a. Khawpui tina a sèk khawmhai chu a se vĕla an bu tharsuok a nih. 49 Chuong ang chun, tuifinrieta phaiphin anga tam bu a sung khawm a, a tawp tieng lem chu inchik sêng zozai a ni ta naw leiin an inchik ta nawh.
50 Trăm tlâk hmain a nuhmei Asenat, On khuoa thiempu Potifar naunu chun Josefa chu naupa pahni a neipek a.
51 Josefa chun, “Pathienin ka rimsik tuor po po le ka pa sungkuo chen khom a mi’n theinghiltir ta si a” a ta, a nau lutir hmingah Manasea a sak a. 52 A nau pahnina hminga chun, “Pathienin rinum ka tuorna rama hin chi a mi’n thla pungtir ta si a” a ta, Efraimb a sak a. 53 Aigupta rama kum thrat kum, kum sari chu a hung invoi a, 54 Josefan a hril lawk angin trăm kum, kum sari chu a hung intran a. Ram dang po poa khom trăm a tla vong a, Aiguptaa ruok chu hmun tinah fak ding a la um a. 55 Aigupta ram khom an hung trăm ve ta a, Faraw kuomah fak ding ngĕnin mipui chu an khèk a. Faraw chun Aigupta mi po po hai kuomah, “Josefa kuomah fe unla, a hril chêu taphot chu thaw ro” a ta.