Lung ina Josefa a’n tàng lai
40
1 Iemani chen hnunga chun Aigupta lal ina lal dawn ding uoiin petu le a bei siemtuhai chun an pu lung an suk-awi naw a. 2 Faraw lungsen chun a sinthawtu pahni, a uoiin petuhai hotu tak le a bei siemtuhai hotu tak chu ama vengtu sipai kapten ina chun a’n tàngtir a, 3 chu intàngna in chu a nih Josefa khom an khumna chu. 4 An pahni chun Josefa enkolna hnuoiah tâng vengtu chun a sie a.5 Iemani chen an intàng hnungin Faraw ina uoin semtuhai hotu le bei siemtuhai hotu chun zànah a ruolin mang, umzie hrang ve ve, an nei a. 6 Zing kar Josefan anni pahni a hmu chun an hmĕl a ngûi ve ve ti a hriet a. 7 Faraw sinthawtuhai, a pu ina ama le an khumhai kuoma chun, “Iem a ta voisun chu in hmèl a va ngûi ngei de?” a ta. 8 Anni chun, “Mang kan nei ve ve a, sienkhom a mi hrilfiepek ding an um si nawh” an ta. Josefa chun, “Mang hrilfie theina chu Pathien ta a ni naw am a ni? In mang chu mi hang hril ta u” a ta.
9 Uoiin semtuhai hotu tak chun a mang chu Josefa kuomah a hril a. “Ka mangin ka hmaah grep hrui a lo um a, 10 chu grep chun kaupêng pathum a nei a. A kùmŭm zo chun a hung pâr nghal a, bâwr tina chun grep hmin a ra tuor el a. 11 Ka kutin Faraw no chu ka lo chawi a, grep chu ka lo a, noa chun ka săwr a, Faraw kutah ka lo pèk a” a ta.
12 Josefa chun, “I mang umzie chu hi hi a nih. Grep kaupêng pathum chu ni thum tǐna a nih. 13 Tuta inthokah ni thumah Faraw chun i lu chawisang a ta, i nǐna ngaiah hlangkâi nawk a ti che a, a hmaa a uoiin petu i ni laia i thaw hlak ang khan a kutah uoiin i pêk nawk ding a nih. 14 Amiruokchu, chan thrat i chang nawk pha leh mi hung hre zing la, lunginsietna ka chungah hung inlangtir la, ka chungthu hi Faraw hril la, hi tàng ina inthok hin mi hung thruoi suok rawh. 15 Hebraihai rama inthokin hi rama hin ka nuom thu ni loa thruoi thlâkin ka um a, hi rip sunga an mi khumna khop ding poi ieng khom ka tawk nawh” a ta.
16 Bei siemtuhai hotu chun a hrilfiena chu thra a ti hle a. Josefa kuoma chun, “Kei khomin mang ka nei a. Ka lu-ah bei bawm thum ka sîpsuon a. 17 A chung taka chun Faraw ta ding bei inhnik tak tak a um a, sienkhom vatehan ka sìpsuon lai zing chun an hung tlàn zo ta vong a” a ta.
18 Josefa chun, “I mang umzie chu hi hi a nih. Bei bawm thum chu ni thum tǐna a nih. 19 Ni thum sungin Faraw-in i lu khai kâng a ta, thing lĕrah khâi hlum a ti che a, vatehaiin i ruong tlàn an tih” a ta.
20 A ni thumna chu Faraw piengcham a ni a, a hnuoia thoktuhai po po ta dingin ruoi ropui tak a thre a. Uoiin semtuhai hotu le bei siemtuhai hotu chungthu chu a thoktuhai hmaah a sukfel a, 21 uoiin semtu chu a nǐna ngaiah a hlangkai a, Faraw kuta uoiin petuah a hung thrang nawk a; 22 bei siemtuhai hotu ruok chu Josefan a mang a hrilfie tah ang khan a hung tlung indik a, a khai hlum tah a nih.
23 Amiruokchu, uoiin semtuhai hotu chun Josefa thu incha chu hre zui loin a theinghil el ta a!