Josefa le Potifar nuhmei
39
1 Josefa chu Aigupta ramah an thruoi thlàk a, Faraw hnuoia vengtu sipai pawl kapten Potifar chun a hung thruoitu Ismael mihai kuta inthok chun a lo inchăwk a. 2 LALPA chu Josefa kuomah a um a, a hung hmuingil a, a pu Aigupta mi ina chun a um a. 3 Josefa kuomah LALPA a um a, a thilthaw taphot a’n hlawtlingtir a nih ti a pu chun a hung hriet ta a. 4 Josefa chun a pu mit a tlung a, ama thrangpuituah a ruot a, a insung enkoltu tak a hung ni a, a nei po po chu a kutah a sie vong a. 5 A insung le a nei po po enkoltua a siema inthok chun LALPAN Aigupta mi insung chu Josefa leiin mal a sawm a, in tieng le ram tienga Potifar thil nei po po chu malsawmin a um a. 6 Chuongchun, a nei po po chu Josefa enkolna kutah a sie ta vong a, a kuoma thil umhai rêng rĕng chu a hrietpui dĕr naw a, a bu fak ding chauh naw chu thil dang a ngaisak a trûl ta nawh.7 Josefa chu pa duongkai thra tak le hmêl thra tak el a nih. Sawt nâw tè hnungah a pu nuhmei chun a ngaizawng a, “Mi zălpui rawh” tiin a thlêm a. 8 Ama ruok chun a nuom naw a, a pu nuhmei kuoma chun, “Keima enkolna hnuoia um a ni sŭng chun hi insŭnga hin thil iem a um a um nawh ti ka pu chun a lungkham naw a, a nei iengkim ka kutah a sie top a. 9 Hi ina hin keima nêka lien tu khom an um nawh. Ka pu hin a nuhmei nangma ti chauh naw chu ieng khom ka lakah inro a nei nawh. Chuong chu a ni leiin, iengtin am hieng ang thil rilo hi thawin Pathien lakah suol ka thaw ding a na?” a ta. 10 Ni tinin thlêm sien khom Josefa chun a zălpui nuom naw chauh khom ni loin a bul hnaia um khom a nuom nawh.
11 Ni khat chu in sŭngah sin thaw dingin a lût a, in sŭnga chun siehlaw tu khom an um naw a. 12 A pi chun a korfuolah a lo man a, “Mi zălpui rawh” a ta, sienkhom a’n tàl suok a, a korfuol chu a pi kuta chun a maksan a, a suok ta dai a. 13 A kutah a korfuol maksana ina inthoka a tlân suok a hmu chun, 14 a pi chun a siehlawhai chu a ko a, “En ro, hi Hebrai mi an hung thruoi lut hin mi sukmuolpho a tum a nih. Mi zălpui tumin a hung a, sienkhom ka khêk a. 15 Santu ding koa ka khêk charin ka bulah a korfuol maksanin ina inthokin a tlân suok a nih” a ta.
16 A pasal a hung hmâ po chun korfuol chu a bulah a sie zing a. 17 A hung chun a kuomah “Hebrai mi ei siehlaw dinga i hung thruoi khan mi sukmuolpho tumin ka kuomah a hung lŭt a. 18 Sienkhom thrangpuitu koa ka khêk leiin a korfuol maksanin, ina inthokin a tlân suok a nih” tiin a lo hril a. 19 A nuhmeiin, ‘Chuong ang chu i siehlaw mi soisak dan chu a nih’ a ti ri Josefa puin a hriet chun a lung a sen phut a. 20 Josefa chu lalhai an khumna hlak tang ina chun a thruoi a, chu taka chun a khum ta a.
21 Nisienlakhom, tăng ina Josefa an tăng lai chun a kuomah Pathien a um a, a chungah ngil a nei a, tăng in vengtu ditsakna a’n dongtir a. 22 Tăng in vengtu chun tâng po po chunga hotuah a sie a, iengkimah mawphurna a pêk a. 23 A kuomah LALPA um a, a thaw taphotah hlawtlingna a pêk pei leiin, a kuta dandea um hrim hrim thilah tăng in vengtu chu a’n rol ngai nawh.