6 Juda chun a nau lutir Er chu nuhmei a’n neitir a, a nuhmei hming chu Tamar a nih. 7 Sienkhom Juda nau lutir Er chu LALPA mithmuah mi rilo tak a ni leiin LALPAN a sukhlum a. 8 Juda chun a naupa Onan kuomah, “I u nuhmei hi pawl la, pasalin mani unauhai chunga an thaw ding chu hlen la, i u ta dingin chî thlapêk rawh” a ta. 9 Onan chun a chi thlapek ding chu ama thlâ a ni naw ding ti a hriet leiin, a u nuhmei a pawl zâtin a chi chu hnuoiah a sukthlak hlak a. 10 A thilthaw dan chu LALPA mitah thil rilo a ni leiin ama khom chu LALPAN a sukhlum a.

11 Juda chun a mo Tamar kuomah, “Ka naupa Sela hi a puitling chenin i pa in tieng pasal nei loin lo va um phot rawh” a ta. A naupa chu a unau danghai ang boka a thi ve a’n lau thawng lei a nih. Chuongchun, Tamar chu a pa in tieng chun a va um ta a.

12 Hun sawt fe hnungah Juda nuhmei, Sua naunu chu a thi a. A lusùn a hung rè chun Juda chu a beram hmul vawtuhai kan dingin Timna khuoah a fe a, a ruolpa Adulam mi Hira chun a fèpui a. 13 Mihaiin Tamar kuomah, “I tarpû chu a beram hmul vaw dingin Timna a pan” tiin an va hril a. 14 Ama chun a pasal a sûnna silfen chu a hlîp a, hmai inkhumna puon a khum a, Timna khaw lampuia Enaim kul kotkhar bula chun a lo inthrung a; Sela chu a puitling taa chu a pa chun ama nu chu a naupa nuhmei dingin a pek nawh ti a hriet vong si a.

15 Juda’n amanu a hmu chun hmai a’n khum tlat leiin nawchizor a sawn a. 16 A mo a nih ti hre dêr loin lam sìra nuhmei chu a va pan a, “Hung rawh, zălpui ka ti che” a ta. Ama chun, “I mi zălpui manah iem mi pe’ng i ta?” a ta. 17 Juda chun, “Ka ran ruol laia mi kêl tuoi hung thon ka ti che” a ta. Ama chun, “Chu chu i hung thon hmaa hrèn ding dakham iemani bek i mi pèk naw ding?” a ta. 18 Juda chun, “Dakham iem ka siepek ding che?” a ta. Ama chun, “I hming namna suoi le a khaidiet le i hmol chawi kha” a ta. Chuonghai chu a pêk a, a zălpui a, a laka chun nau a von ta a. 19 Chun, amanu chu a tho a, a hmâi inkhumna puon chu a hlîp a, a hmeithaina silfen chu a’n bel nawk ta a.

20 A dakham sie chu nuhmei kuta inthoka la kîr dingin a ruolpa Adulam mi chu kel tuoi keiin a’n fetir a, sienkhom amanu chu a hmu zo ta nawh. 21 “Enaim-a lampui sìra inthrung, tempul nawchizor kha khaw lai am a um ta a?” tiin chu laia mihai chu a’n don a, anni chun, “Hieng lai hin tempul nawchizor tu khom an um nawh” an ta.

22 Adulam mi chu Juda kuomah a kîr nawk a, “Ka va hmu zo dĕr nawh. A hmuna mihaiin, ‘Hieng lai hin tempul nawchizor tu khom an um nawh’ an ti bok si” a ta. 23 Juda chun, “A hrên po kha kol song el raw se, chuong naw chun mi nuizatbŭr ei hlaw thei ding a nih, kèl tuoi ka thona chu ama i va hmu zo tlat si naw a” a ta.

24 Thla thum vel a liem hnung chun Juda kuomah, “I mo Tamar khan nawchi a zor a, nau a pâi nghé nghè a nih” tiin an hung hril a. Juda chun, “Thruoi suok inla, raw hlum ro” a ta.

25 An thruoi suok lai chun Tamarin, “Hieng thilhai neitu laka nau hi ka păi a nih” tiin a tarpu kuoma chun mi tirin thu a thon a. Ama vekin, “Lunginsiet takin hieng suoi le a paina khaidiet le hmol hi tu ta am a na ti en chieng hrim ro khai” tiin thu a’n châ bok a. 26 Chuong thilhai chu a tâ ngĕi a nih ti Juda chun a hriet nghal a, “Ama chu kei nèkin a fel lem a ni hi; ka naupa Sela hlak ka’n neitir ta si naw a” a ta. Juda chun ama chu a pawl nawk ta hrim hrim nawh.

27 A nau nei a hung hun chun, a sŭlah inphîr an um a. 28 Nau hase an voi lai chun pakhat chun a kut a hung rol suok a, nau domtu chun, “Hi hi a suok hmasa lem a ni hi” tiin a kutin a chel a, patsen a’n buntir a. 29 A kut a kei lut nawk chun a unaupa chu a hung suok a. Nau domtu chun, “Hieng hi maw i hung nĕr thleng dan chu!” a ta, a hmingah Perez^a a sak a. 30 Chu zoah a kut rìnga patsen an inbuntir a unaupa chu a hung suok a, a hmingah Zera^b a sak a.