Josefa chu tleirawl kum sawmpasari a ni laiin a pa hmei Bilha le Zilpa nauhai ran chingnaah a thrangpui hlak a, a unauhai um dan thra lo chu a pa kuomah a’n tlun hlak a. 3 Josefa chu a tar tieng nau a ni leiin Israel chun a unau danghai nêkin a hmangai lem a, korfuol mawi taka chei a siempek a. 4 An pain a unau danghai nêkin a duot bik ti an hung hriet chun an theida ta hle a, trong thra hrimin an biek thei ta naw a.

5 Josefa chun mang a nei a, a unauhai kuomah a hril leh an theida zuol sau a. 6 An kuomah hieng hin a hril a, “Ka mang hi hang ngaithla ta u. 7 Loah bu ei lo ăt a, ka buphal tĕl chu a tho thut a, a ngîr chang a, in buphalhai chun an hung inhuol a, kûnin chibai an bŭk a” a ta. 8 A unauhai chun a kuomah, “Nang telul hin kan chungah ro i rèl ding maw? Nang telul hin kan chungah thu nei i ta maw?” an ta. A mang a hril tawl lei chun nasa takin an theida zuol a.

9 Josefa chun mang a nei nawk a, a unauhai kuomah, “Mi ngaithla ro khai. Mang dang ka nei nawk a, tuta trum ruok chu nisa le thla le arasi sawmpakhatin kûnin chibai an mi lo buk chu tie!” a ta.

10 A pa le a unauhai kuoma a mang a hril chun a pain a zil a, “Ieng mang am a na i nei ta hi? I nu le kei le i unauhai hi hungin, hnuoiah bokkhupin chibai kan bŭk telul ding che maw?” a ta. 11 A unauhai chun an thǐk a, a pa ruok chun chu thil chu lungrilah a vong zing a.

12 A unauhai chu Sekem khaw kawlah an pa ran ruol chu intlattir dingin an fe a. 13 Israel chun Josefa kuomah, “I unauhaiin Sekem khaw kawlah ran ruol an ching ti i hriet a. Hung rawh, chu hmuna chun ka tir ding che a nih” a ta. Ama chun, “Mi tir ta la” a ta. 14 A pa chun, “Fe la, i unauhai le ran ruol iem an chang ti va en chieng la, chanchin mi hung hril nawk rawh” a ta. Chuongchun, Hebron ruoma inthok chun a tir suok a, ama chun Sekem khuo a va tlung a.

15 Phŭla a’n vâk a’n vâk lai chu mi tuin amanih a hmu a, “Ieng am i zong leh?” tiin a’n don a. 16 Ama chun, “Ka unauhai ka zong a nih. Ran ruol an intlattirna hmun mi hril thei i tim?” a ta. 17 Mi chun, “Hi taka inthok hin an inson ta a, ‘Dothan-ah fe’ng ei tiu’ an ti ri ka hriet” a ta. Josefa chun a uhai chu a zong pei a, Dothan khaw kawlah a va hmu a.

18 Anni chun hla taka inthokin an lo hmu a, an kawl hnai a tlung hmaa that dingin thu an lo phan rŭk a. 19 “Saw, mang neipa a hung ta saw!” an inti tuo a. 20 “Thaw ro, that ei ta, khurah pei ei ta, sahuoiin a se hlum a nih ti’ng ei ta. Chu chun a mang kha iem a chang hrim ti hre el ei tih” an ta.

21 Reubenin an thu phier rŭk a hriet chun an kuta inthoka san suok a nuom a, “That chu that êm nawng ei tiu” a ta. 22 An kuta inthoka san suok a, an pa kuoma thruoi kir nawk thei dan ding dapin Reuben chun, “Thisen chu insuo naw ro; thlalĕra khura hin thlâk unla, kut êm chu a chungah thlâk naw ro” a ta.

23 Josefa a hung tlung chun a korfuol hăk lai mawi taka chei chu an hlippek a, 24 an thruoi a, tui um ta nawna khura chun an thlăk a.

25 Sunbu an făk lai chun an hang ngha a, Ismael mi sumdawng ruol, sanghawngseia thuomhnaw phur, Gilead tlang tienga inthoka hunghai chu an hmu a. An sanghawngseihai chun mawsola dam, hriek rimtui dam, murrah dam an phur treu a, chuonghai chu Aiguptaa zor dinga fe thla mêk an nih. 26 Juda chun a unauhai kuomah, “Ei unaupa ei that a, a thisen ei insuo thu ei ip chu iem a na ei hlawkpui ding? 27 Thaw ro, a chungah kut thlâk loin, Ismael mihai kuoma hin zor lem ei tiu. Ieng po khom hril inla, ei unaupa, ei taksa le thisen put a ni tlat a” a ta. A unauhai chun an remti a. 28 Midian mi sumdawnghai an hung tlung chun Josefa chu khura inthokin an lak suok a, tangka sekel sawmhniin Ismael mihai kuta chun an zor a, anni chun Aigupta tieng an thruoi a.

29 Reubenin khur a hung en nawk chun Josefa chu a hmu ta naw a, chuongchun a silfenhai chu a pot thler a. 30 A sanghai kuoma chun a hung kǐr a, “Ei sangpa a um ta nawh. Iem ka law ta ding a na?” a ta. 31 Josefa korfuol chu an lâk a, kĕl an that a, a thisena chun an inchie a. 32 Korfuol chei chu an pa kuomah an chawi a, “Hi ringot hi kan hmu a, i naupa korfuol a ni le ni naw en chieng rawh” an ta.

33 Ama chun a hriet nghal a, “Ka naupa korfuol a ni ngei hi; sahuoiin a fâk zo an ta chu! Josefa chu sahuoiin a kei chen chieng a nih” a ta. 34 Jakob chun a silfen a pot thlèr a, saiip silin ni tam tak a sŭn a. 35 A naupahai le naunuhai chu hnèm dingin an hung pung khawm a, sienkhom hnèm ruol a ni nawh. “Lusûn pumin thlan tieng ka naupa kuomah ka liem ding a ni hih” a ta. A pa chun a sŭn takmeu a nih.

36 Chuong chu a ni laiin, Josefa chu Midianhai chun Aigupta lal Faraw vengtu sipai hotu Potifar kuomah an zor sawng a.