3 Jakob chun a u Esau umna Seir ram, Edom mihai rama chun a hmaah thucha phurtu mi a tir a. 4 An kuomah, “Ka lalpa Esau kuomah hieng hin in hril ding a nih: I siehlaw Jakobin hieng hin a tih: Laban kuomah mikhuolin tu lai hnai el chen kha ka um a. 5 Bawngchal hai, sabengtung hai, beram le kèl hai, bawinu le bawipa hai ka nei tawl a. I mit tlunga ka um theina dingin ka lalpa hril dingin mi ka hung tir a nih’ a tih” tiin thu a’n cha a.

6 Thuphurtuhai an hung kir chun Jakob kuomah, “I u Esau kuom kan va tlung a, a hmuok ding chein mi zali leh a hung ding a nih” an ta. 7 Nasa taka tri le lungzingin Jakob chun a rawihai chu pawl hniin a thrè dar a, chuong ang bokin beram ruol le bawng ruol le sanghawngsei hai khom chu a thrè a. 8 Esauin pawl khat a hung bei hlauh chun pawl dang chu an tlan suok hmana ding ti lungril neia a thaw a nih.

9 Jakob chu a trongtrai a, “Ka pu Abraham Pathien, ka pa Isak Pathien aw LALPA, ‘I ram tieng le i laichinhai lai kir nawk ta la, sukhmuingil ka ti che’ mi titu, 10 ka phu ruol lo lunginsietna le ringumna chu i siehlaw chunga hin i’n langtir a. Ka hmol le chauh hi Jordan vadung hi ka kân a, tu ruok hin chu hon hnia thrè khop zet kan lo ni tah. 11 Lunginsiettakin ka u Esau kuta inthokin mi san him rawh, nunau chopa a mi hung bei ka trì a nih. 12 Nangin, ‘Siem hmuingil ka ti che a, in thlahai chu tuifinrieta phaiphin tiem seng lo ang khopa tamin la siem ka tih’ i ti si a” tiin.

13 Chu zân chun chu hmuna chun a riek a, a u Esau kuoma a pĕk ding a ran ruol laia mi a thlang suok a. 14 A thlang suok po chu kèlpui zahni le kèlchal sawmhni, berampui zahni le beramchal sawmhni, 15 sanghawngseipui sawmthum le an te thruoi lai seng, bawngpui sawmli le bawngchal sawm, sabengtungpui sawmhni le sabengtungchal sawm a nih. 16 Chuonghai chu a hran sengin a siehlawhai kutah a’n koltir a. A siehlawhai kuoma chun, “Ka hmaah fe unla, kâr nei peiin inzui ro” a ta.

17 A hmatâwng taka thrang kuoma chun, “Ka u Esau leh in intuok pha, ‘Tu mihai am in na? Khaw tieng pan ding am in na? In hmaa in somhai hi tu ta am an na?” tia a’n don che chun, 18 “I siehlaw Jakob ta an nih; pu Esau, i ta dinga thilpêk a thon che a ni hi; ama khom kan hnunga son a hung’ ti rawh” tiin thu a pêk a. 19 A dota mi le a dot nawk le ran ruol khaltu po po kuoma chun, “Esau in hmu pha chuong ang chun ti seng ro; 20 chun, ‘I siehlaw Jakob khom kan hnunga son a hung’ ti ngêi bok ro” tiin thu a pêk seng bok a. Ama chun, “Ka hmaa fe thilpêk ka thon hin tlon lungawi zet ka ta, ka hmu pha leh mi lo lawm a tih” a ti lungril a nih. 21 Chuongchun, a thilpêkhai chu ama hmain a’n fetir a, ama ruok chu, chu zân chun a rawihai lai a riek a.

22 Zanah Jakob chu a tho a, a nuhmei pahnihai le a siehlawnu pahnihai chu a nau sawm le pakhathai leh a thruoi a, Jabok vadung chu a kaipui a. 23 Anni an kaitir hnung chun an thuomhnaw nei po po khom a’n tol kaitir vong bok a. 24 Chun, ama khât chauin a um ta a, mi pakhatin khawfingchat chen a buon ngat ngat a. 25 Ama chun a hnè nawh ti a hrietin a malpui ru inchuktuona lai chu a hmetpek a, an inbuon lai chun Jakob malpui ru inchuktuona lai chu a hung inpelsol a. 26 Ama chun, “Mi’n thlà ta rawh, khawfing khom a chàt ding a ni tah hi” a ta. Jakob chun, “Mal i mi sâwm zèt naw chun inthlà naw ning che” a ta. 27 Ama chun, “I hming iem a na?” a ta, Jakob chun, “Ka hming chu Jakob a nih” a ta. 28 Ama chun, “I hming chu Jakob ni ta loin Israel^b ni lem ta’ng a tih; Pathien le mihriem i buon a, i hnè ta si a” a ta. 29 Jakob chun, “Lunginsiet takin i hming mi hril thei i tim?” a ta. Ama chun, “Ieng leia ka hming i mi’n don?” a ta. Chu taka chun mal a sàwm ta a.

30 Jakob chun, “Hmai intuoin Pathien ka hmu a, ka hringna a hlâ si a” tiin chu hmun hminga chun Peniel^c a’n bŭk a. 31 Peniel a fe pĕl lai chun zing nisa suokin a hung khaw a, a malpui lei chun a’n băi a. 32 Chuleiin, tu chen hin Israel thlahai chun malpui ru inchuktuona a êl thâ lai hi an făk ngai nawh, Jakob malpui inchuktuona laia a êl thâ chu a hmetpek leiin.