Jakob le Esau an intuok
33
1 Jakob chu a hang dăk a, ngai ta, mi zali ruol le hung Esau chu a hmu a, a nauhai chu Lea le Rachel le a siehlawnu pahnihai kuomah a sem dar a. 2 Siehlawnuhai le an nauhai chu a hmatâwngah, a dotah Lea le a nauhai, a nuhnung takah Rachel le Josefa a sie a. 3 Ama chun hma a thruoi a, a u bul a tlung tawm chun hnuoi sikin voi sari chibai a bûk a. 4 Ama tuok dingin Esau chu a tlân phei a, a rînga kuoin a fawp a, an pahni chun an trap a.5 Esau chu a hang ngha a, nuhmei le naupang hai a hmu chun, “I kuoma umhai hi tu hai am an na?” a ta. Jakob chun, “Hi naupanghai hi Pathienin lunginsieta i siehlaw a pekhai chu an ni hi” a ta. 6 Siehlawnu pahni le an nauhai chun an hung hnai a, kûnin chibai an bŭk a. 7 A dotah Lea le a nauhai chu an hung a, kûnin chibai an bûk bok a. A hnuhnung takah Josefa le Rachel khom an hung a, kûnin chibai an bŭk a.
8 Esau chun, “Ran ruol ka’n tuokpui zozai kha ieng i tǐna am an ta le?” a ta. Jakob chun, “Ka lalpa, i mit ka tlung theina dinga ka ti a nih” a ta. 9 Esau chun, “Kei khomin ka hau annawm, ka sangpa, i tahai chu nangin kol lem rawh” a ta. 10 Jakob chun, “Ni lo e, i mit ka tlung a ni phot chun, lunginsiet takin ka thilpêkhai che kha mi pompek lul rawh. Lawm taka mi lo pom a, i hmêl ka hang hmu hi Pathien hmêl hmu tlukah ka’n ngai a nih. 11 Ka chungah Pathien a thra a, ka mamaw po po ka nei a, chuleiin ka thilpêk hi lunginsiet takin pom hrâm rawh” a ta. Jakobin a ngĕnngâwl tlat leiin Esau chun a pom ta a.
12 Esau chun, “Thaw ro, feng ei tiu, intlon ei tih” a ta. 13 Sienkhom Jakob chun, “Ka lalpan a hriet angin, naupanghai hi an la dăwng a, berampuihai le bawngpuihai hi te thruoi lai an ni a, ni khat chauh fe hrâtpui khomin ran ruol hi thi vong thei an nih. 14 Chuleiin, ka lalpa hi a siehlaw hmaah lo fe sien, kei chu Seir tlanga ka lalpa kuom ka tlung hmâ khat chun ka ran som le naupanghai fe thei tawk ang peiin, damten hungpui tawl ka tih” a ta.
15 Esau chun, “Chuong a ni leh ka mihai a thren bêk hi maksanpek ka ti che” a ta. Jakob chun, “Iem a trûl a? Ka lalpa mit ka tlung phot leh a huntawk” a ta.
16 Chu ni chun Esau chu Seir tieng a kir nawk a. 17 Jakob ruok chu Sukot-ah a fe a, chu taka chun ama ta dingin riebûk a bawl a, a ranhai ta dingin bûk a bawl bok a. Chuleiin, chu hmun hminga chun Sukota an ti a nih.