4 Chuongchun, Jakob chun Rachel le Lea chu a ran ruol tlatna phŭla chun hung dingin a’n cha a. 5 An kuomah, “In pain a mi en dan hi kha hma ang kha a ni ta naw a, sienkhom ka pa Pathien chu ka kuomah a um zing a nih. 6 In pa ta dingin theitawpin sin ka thaw ti in hriet a, 7 sienkhom a mi hlêm a mi hlêm a, ka hlaw khom voi sawm hiel a thlâk danglam ta a; ka poi a tawk ding ruok chu Pathienin a phal nawh. 8 ‘A ze triel le râng trik trekhai hi i hlaw ding a nih’ a ti leh ran po po chun chuong ang chi ngot chu tê an nei a. ‘A ze răng met methai hi i hlaw ding a nih’ a ti leh ran po poin chuong ang ngot chu tê an nei a. 9 Chuong ang chun Pathienin in pa ranhai chu lakpêkin kei a mi pèk a nih.

10 “Voi khat chu ran inzawl tran hun hin mang ka nei a. Ka hang ngha vel a, kelpui zăwltu kelchal po po chu a ze triel amanih a râng amani vong an lo ni a. 11 Ka manga chun Pathien vantirkoin, ‘Jakob’ tiin a mi ko a, kei chun, ‘Iem a na?’ ka ta. 12 Ama chun, ‘Dâk suok la, hei en ta, a chal, a pui zăwltu po po saw a triel amanih a râng vong an ni saw. Labanin a soisak dan che hi ka hmu vong a nih. 13 Bethela lung i phun trum, sahriek năla thu i tiemna, kha Bethel Pathien ngei kha kei hi ka nih. Tu hin hi hmun hi suoksan la, i pieng le murna ram tieng kir ta rawh’ a ta” tiin a hril tawl a.

14 Rachel le Lea chun, “Kan pa ro chungchangah ro inkhawm ding kan la nei rop am a ni? 15 Ama chun mikhuol ang chauin a mi ngai tah an naw am a ni? A mi zor chauh khom ni loin, kan man khom a fâk zo vong tah. 16 Kan paa inthoka Pathienin rosum a lakpek po po hi keini le kan nauhai chanvo hrim a nih. Chuleiin, Pathienin thaw dinga a hril ang che chun thaw rawh” an ta.

17 Jakob chun a nuhmei le nauhai chu sanghawngsei chungah a’n chuongtir a, 18 Kanan rama a pa Isak kuom tieng pan dingin a ran ruol po po le Padan Aram-a rosum a khawl khawm po po chu somin a’n thok suok ta a.

19 Beram hmul vawa Laban a fe laiin Rachelin a pa ina a pathien limhai chu a lo inrŭk a. 20 Chu bâkah Jakobin Aram mi Laban chu hlèmin, a hriet loin a lo inrelsan bok a. 21 A nei po po leh tlânin, Eufretis vadung a kăn a, Gilead tlang tieng a pan tah vang vang a.

22 A ni thum ni-ah Jakob inrel hmang thu chu Laban an hril a. 23 Laban chun a unauhai chu a thruoi a, ni sari a hnot hnungin Gilead tlangramah a hnot phăk a. 24 Aram mi Laban kuoma chun mangah Pathien a hung inlang a, “A sie a thra ieng khom Jakob kuoma hril lo dingin fimkhur rawh” tiin a hril a.

25 Gilead tlangrama Labanin Jakob a hnot phăk chun Jakob chun puon in a lo kei tah a; Laban le a unauhai khomin chu taka chun puon in an kei vé nghăl a. 26 Laban chun Jakob kuomah, “Iem a na i thaw ta hi? I mi hlĕm a, râllâk ang elin ka naunuhai i fen hmang a. 27 Ieng tiziea mi hlĕm a, a rûk a răla i’n rel hmang rêng rêng? Khuong leh dâr leh tringtrang rem a, hlim taka hla saka ka’n thla theina ding chein ieng dinga i mi hril naw? 28 Ka tûhai le ka naunuhai fawpa ka’n thla liem i phal bok nawh. Thil invĕtthlâk tak i thaw a nih. 29 Sukse thei che ka ni a; amiruokchu i pa Pathien chun voizan khan mangah, “A sie a thra ieng khom Jakob kuoma hril lo dingin fimkhur rawh’ tiin a mi hril a. 30 I pa in tieng ngaia kir nawk i nuom a ni khomin, ieng dinga ka pathien limhai i mi’n rŭkpek am a na?” a ta.

31 Jakob chun Laban kuomah, “I naunuhai mi la luipek i tih ti ka’n lau lungril lei a nih. 32 Amiruokchu, i pathien limhai koltu chu i hmu suok phot chun ama chu dam naw nih. Ei unauhai hmu hoia ngei hin nang ngeiin i thil ka kol a um le um naw dap la, a um chun la nghâl rawh” a ta. Pathien limhai chu Rachelin a’n ruk a nih ti Jakob chun a hriet si nawh.

33 Laban chun Jakob puon in, Lea puon in le an siehlawnuhai puon in pahni chu a dap a, ieng khom a hmu nawh. Lea puon ina inthoka a hung suok chun Rachel puon inah a lût a. 34 Rachel chun a thil inrŭkhai chu a sanghawngsei zângdam lai a lo thup hman a, a thrung dê tlat a. 35 Rachel chun a pa kuomah, “Ka tho thei naw leiin ka lalpa chu lungsen naw raw se, thi ka pal lai a ni lei a nih” a ta. A tlok vonga chu a pathien limhai chu a hmu si nawh.

36 Jakob lung chu a sen hle a, Laban chu a hal a. “Iem ka thaw suol a um a? Iem ka thaw suol hrima i mi hung hnot a na? 37 Tu khan ka thuomhnaw po po i tlok kim vong tah a, i ina thil pakhat bêk i hmu hrim hrim a ni? I hmu leh i unauhai hmaa hin hung sie la, nang le ei inkar thu hi rêl raw hai se. 38 I kuomah kum sawmhni tâl top ka um ta a. I beram le kel haiin té an insiet ngai naw a, i beram ruol laia beram chal pakhat khom ka la hmè ngai nawh. 39 Sahuoi kei chen hnung sa ka hung lakpek ngai naw che; a’n hmang ai chu keiin ka tuor pei hlak. Zăn amanih sŭn amania ran an inrŭk hrim hrim i mi’n thungtir vong hlak kha. 40 Hieng hi ka um dan a nih: sŭnah ni intrêngin a mi em chăr a, zănah khaw deiin a mi sawm kon a, imu hrim ka hmu ngai nawh. 41 I ina kum sawmhni ka um sung khan chu chu ka ngirhmun a nih. I naunu pahni hlaw dingin i rong kum sawm le kum li ka bawl a, i ran hlaw dingin kum ruk i rong ka bawl nawk a. Chu sung chun ka hlaw voi sawm zet i thlâk danglam a. 42 Ka pi le puhai Pathien, Abraham Pathien le Isak inzà Pathien chu ka kuomah um naw lem sien chu, kut ruokin mi’n suoktir ngĕi ngêi i tih. LALPA chun ka rinum tuorzie le ka thokrimzie a hmu a, voizan khan a hal che a ni chu” a ta.

43 Laban chun Jakob kuomah, “Nuhmeihai hi ka nauhai an na, an nauhai hi ka nauhai an na, ran ruolhai hi ka ran ruol an na, i hmu po pohai hi keima ta vong a nih. Sienkhom voisun hin ka naunuhai le an nauhai chunga iem keiin thaw thei ka nei ta a? 44 Thaw rawh, keima le nangma hin thu thlung ei ta, chu chu eini pahni inkâra thu hrepuitu sàkhí ni raw se” a ta.

45 Jakob chun lung a lâk a, a phun a. 46 A sunghai kuomah, “Lung thak khawm ro” a ta, an lung lakhai chu an intieng bŭm a, a bula chun bu an fâk a. 47 Laban chun lung intieng khawm chu ‘Jegar Sahadutha’^a tiin a’n bŭk a, Jakob ruok chun ‘Galeed’ tiin a’n bŭk ve thung a. 48 Laban chun, “Hi lung intieng khawm hi voisun hin keima le nangma inkara thu hrepuitu sàkhí a nih” a ta, chu chu Galeed hming a put san a nih. 49 ‘Mizpah’^b ti a ni bok. A san chu Labanin, “LALPA chun ei inthrè hnung khomin mi veng ton raw se. 50 Ka naunuhai i sukrimsi a, ka naunuhai ni lo nuhmei dang i nei chun, tu khom ei kuomah an um naw khom ni sien, nangma le keima inkara thu hrepuitu chu Pathien a nih ti hre zing rawh” a ti leiin.

51 Laban bok chun Jakob kuomah, “Keima le nangma inkara thu hrepuitu dinga ka lung intieng khawm le ka lungphun hai hi en rawh. 52 I poi tawk dingin hi lung intieng le lungphun hai hi hung khêl ngai nawng ka ta, ka poi tawk dingin nang khomin i hung khêl ding a ni bok nawh ti hrepuitu an nih. 53 Abraham Pathien, Nahor Pathien le an thlatuhai Pathien chu eini inkara rorêltu ni raw se” a ta. Jakob chun a pa Isak Inza hming chun thu a’n khàm a. 54 Chu tlânga chun Jakobin hlànbiekna a hmang a, a unauhai chu thlaithlĕng a kǐlpui a. An fak khop chun chu hmuna chun an riek a. 55 Zing inhma takin Laban chun a tuhai le a naunuhai chu a fawp a, mal a sawm a, chu zoah a in tieng panin a kîr nawk ta a.