30
1 Rachel chun nau hrim Jakob chu a neipek ve naw leiin a unu chu a thîk a, Jakob kuoma chun, “Nau mi pe rawh, chuong naw chun thing ka tih” a ta.2 Jakob chu Rachel chungah a lungsen a, “Nau nei loa siemtu chè Pathien aiawtua i mi ngai a ni?” a ta.3 Rachel chun, “En ta, ka bawinu Bilha hi, ama hmanga sungkuo ka siem ve theina dinga nau mi neipek dingin ama hi pawl rawh” a ta.4 A bawinu Bilha chu a hmei dingin a pêk a, Jakob chun a lo pawl a,5 nau a hung pài a, naupa a neipek a.6 Rachel chun, “Pathienin ka hnǐna ngaithlain a mi’n thiem a, naupa a mi pĕk tah a ni hi” a ta, a hmingah Dana a sak a.7 Rachel bawinu Bilha chun nau a pâi nawk a, Jakob chu naupa a neipek nawk a.8 Rachel chun, “Ka unu leh nasa takin kan inbuon a, hnèna ka chang an ta hi” a ta, a hmingah Naftalib a sak a.
9 Lea chun nau dang a pâi el ta naw leiin a bawinu Zilpa chu a thruoi a, a hmei dingin Jakob a pêk a. 10 Lea bawinu Zilpa chun Jakob chu naupa a neipĕk a. 11 Lea chun, “A va hang vangneithlak de aw!” a ta, a hmingah Gadc a sak a. 12 Lea bawinu Zilpa chun naupa dang a neipĕk nawk a. 13 Lea chun, “Ka va hang lawm ngei de aw! Nuhai chun hamthra mi ti ngot an tih” a ta, a hmingah Aserd a sak a.
14 Busik hun lai hin Reuben chu loah a fe a, zawlaidi a va hmu a, a nu Lea kuomah a hung chawi a. Rachel chun Lea kuomah, “I naupa zawlaidi kha a thren mi sem ve rawh” a ta. 15 Ama chun, “Ka pasal i mi’n chŭ thlăkpĕk hi i la dittawk naw rop maw? Ka naupa zawlaidi chenin i mi’n chŭ thlăkpĕk nawk pei ding maw?” a ta. Rachel chun, “Chuong an leh i naupa zawlaidi manah voizan chu riekpui a ti che” a ta.
16 Jakob lo fe hung inlawi chu Lea chun a lo va tuok a, “I mi riekpui ding a nih, i naupa zawlaidia ka haw ta sa che i nih” a ta. Chu zan chun a zalpui a. 17 LALPA chun Lea hnǐna chu a ngaithlăk a, nau a pâi a, Jakob chu naupa pangana a neipĕk a. 18 Lea chun, “Ka bawinu ka pasal kuoma ka’n hawtir leiin LALPA chun hlaw a mi pek a ni hi” a ta, a hmingah Isakare a sak a. 19 Lea chun nau a pâi nawk a, Jakob chu naupa parukna a neipĕk a. 20 Lea chun, “Pathien chun thilpêk hlu tak a mi pĕk a, tu hin chu naupa paruk zet ka neipĕk ta leiin ka pasal khomin mi’n zà ta’ng a tih” a ta, a hmingah Zebulunf a sak a. 21 Chu hnunga chun nau nuhmei a nei nawk a, a hmingah Dina a sak a.
22 Pathien chun Rachel chu a hriet zing a, a hnǐna chu a ngaithlak a, a sŭl a hongpek a. 23 Nau a hung pài a, naupa a nei a, “Ka muolphona Pathienin a mi lăk hmangpek tah” a ta. 24 Chun, “LALPAN naupa dang khom mi pe sa raw se” a ta, a naupa hmingah Josefag a sak a.
Jakob ran ruol an pung
25 Rachelin Josefa a nei hnung chun Jakobin Laban kuomah, “Ka in le ramah ka kir nawk theina dingin mi’n fètir ta raw khai. 26 I rong ka bawlna san ka nuhmeihai le ka nauhai mi pe suok la, mi’n fetir ta rawh, I rong ka bawlpek dan che hlak i hriet fai vong a” a ta. 27 Laban chun, “I mit ka tlung a ni chun, mi la umpêk hràm rawh. Ka âisâna inthokin nangma leiin LALPAN mal a mi sawm a nih ti ka hmu suok a. 28 Hlaw i tuk zat hril la, pe’ng ka ti che” a ta.
29 Jakob chun, “Ka sinthaw dan le i ran ka sukpung dan i hriet vong a. 30 Ka hung hma khan ran tlawm te chauh i nei a, tu hin chu an pung rawn ta hle a; sin ka thawna tieng photah LALPAN mal a sawm che a. Anleh, ieng tik am ka sungkuo ta dingin ka thaw suok ve ta ding chu?” a ta. 31 Laban chun, “Ieng am ka pêk ding che?” a ta. Jakob chun, “Ieng khom mi pe naw rawh. Amiruokchu, hi thil hi i thaw chun i ranhai vêngin la enkol zui pei ka tih. 32 Voisun i ran ruol po po tiem ka ta, beram laia mi a rângin a triel taphot, beramte laia mi a rong dum taphot, kèl laia mi a rângin a triel taphot la suok vong ka ta, chu chu ka hlaw ni raw se. 33 Ka hlaw i mi pek hunah ka ringumzie chu hunin hung puong el a tih. Ka kèl lai a rânga triel ve lo amani, ka beram lai a dum ni lo i hmu taphot chu ka’n rŭkah ngai rawh” a ta.
34 Laban chun, “Ka remti, i ti ang tak chun ni raw se” a ta. 35 Chu ni lá là chun kelchal râng taphot le kelpui ràng taphot le beram dum taphot chu Labanin a lâk suok vong a, a naupahai enkolna hnuoiah a sie a, 36 ama le Jakob inkar ni thum lam zeta hlaa chun a’n umtir a, Jakob chun Laban ran ruol chu a enkol zui pei a.
37 Jakob chun hriengzâu thing, ruon thing le inse thing hring tuoi a sât a, a hâwng a khok râng truk a, a răngna po chu a pho lang a. 38 Ranin tui an dawnna taikuong po poa chun tui an hung dawn phaa an hmu ngei dingin thing tuoi, a hâwng khok rănghai chu a sie a. 39 Ran an hur huna tui dawna an hung pha leh an inzawl a, an inrai hlak a. Thing tuoi khek răng zawna inraihai chun te râng amanih triel amanih an nei zie a. 40 Jakob-in Laban beram a venghai lai chun a râng iemani zat an hung um ta a. Laban ran dumhai an inzawl ding pha Jakob chun a râng umna tieng a’n nghattir a. Chuong ang chun ama ran ruol chu a sukpung a, Laban ran ruolhai leh sie kop loin a sie hrang pei a. 41 Ran ruol laia a hrât bikhai chu an inrăi hunah thing tuoi hawng khok ràng hmaa an inrai theina dingin Jakob chun ranin an hmu ngei dingin taikuonga chun thing tuoihai chu a sie hlak a. 42 Ran hrisel lo hmaa ruok chu thing tuoi chu a sie ngai nawh. Chuong ang chun ran chakvak nawhai chu Laban ta an ni pei a, a hrisel po chu Jakob ta an ni pei thung a. 43 Jakob chu nasa takin a hung hausa a, ran ruol tam tak a nei a, bawinu le bawipa le sanghawngsei le sabengtung khom tam tak a hung nei ta a nih.