4 Jakob chun, “Unauhai, khaw lai khaw mi am in ni a?” tiin beram vêngtuhai a’n don a. Anni chun, “Haran khaw mi kan nih” an ta. 5 Ama chun, “Nahor^a naupa Laban in hriet hlak am?” a ta. Anni chun, “Kan hriet” an ta. 6 Jakob chun, “A dam lai a ni maw?” a ta. Anni chun “Dam e, saw, a naunu Rachel khomin a beram a hung khal saw” an ta. 7 Ama chun, “En ta u, nisa a la’n sâng si a, tu hi ran ruol khal khawm hun khom a la ni le’m. Tui pe unla, an tlatna hmunah va’n tlattir nawk ro” a ta. 8 Anni chun, “A thei nawh. Beram ruol po po an khal khawm vong hnungah tuikul sǐnna lung hi dom son an ta, chu hnungah kan beramhai chu tui kan indawntir thei chauh hlak a nih” an ta.

9 An inbiek lai zing chun Rachel chu a pa beram ruol le chun a hung tlung a, ama chun beram a veng hlak hrim a nih. 10 Jakobin a nu trapa Laban naunu Rachel le a beram ruol a hmu chun a va pan a, tuikul sǐnna lungkhăr chu a tawl son a, a pu Laban beramhai chu tui a’n dawntir a. 11 Chu zoah Jakob chun Rachel chu a fâwp a, inring takin a trap a. 12 Rachel kuoma chun a pa farnu Rebek naupa a ni thu chu Jakob chun a hril a. A hriet charin Rachel chu a tlân a, a pa a va hril a.

13 A farnu naupa chanchin Labanin a hriet charin hmuok dingin a suok nghal a. A kuo a, a fâwp a, inah a thruoi a, Jakob chun a pu chu chanchin iengkim a hril a. 14 Laban chun, “Ka taksa le thisena mi ngei i ni chuh” a ta.

15 Jakob chu Laban kuoma thla khat a um hnungin Laban chun, “Ka tupa i ni lei elin a thlawnin sin ka ta dingin i thaw ding maw? I hlaw zàt dinga i ti chu mi hril rawh” a ta. 16 Laban chun nau nunghak pahni a nei a, a upa lem chu Lea a na, a naupang lem chu Rachel a nih. 17 Lea mit chu a pawl riei a^b, Rachel ruok chu a duongkai a thra a, a hmêl a thra bok a. 18 Jakob chun Rachel chu a ngaizawng a, chuongchun a pu kuomah, “I naunu naupang lem Rachel hi nei dingin kum sari i rong bawlpêk ka ti che” a ta. 19 Laban chun, “Mi dang kuoma ka pĕk nêkin i kuoma ka pĕk chu a thra lem hrim a nih, ka kuomah um zing el rawh” a ta. 20 Chuongchun, Rachel chu hlaw dingin Jakob chun a pu rong chu kum sari a bawl a, sienkhom Rachel chu a ngaizawng ĕm leiin ni sawt naw te ang chauin a hriet.

21 Jakob chun Laban kuomah, “Ka nuhmei chu ka pawl theina dingin mi pe ta raw leh, ka hun tiem chu ka hlen ta si a” a ta. 22 Laban chun ruoi threin a khaw mi po po chu a fiel khawm a. 23 Sienkhom zan a hung ni chun a naunu upa lem Lea chu a thruoi a, Jakob kuomah a pêk a, a lo zàlpui a. 24 Laban chun a naunu thrangpuitu dingin a siehlawnu Zilpa chu a pêk bok a.

25 Zingkhuo a hung var hlak chun, ngai ta, Lea a lo ni lem dai el! Jakob chun, “I mi soisak dan hi iem an ta a? Rachel nei dinga inhlaw ka ni naw maw? Ieng leia i mi dawha am a na?” tiin Laban chu a suosal a. 26 Laban chun, “A upa lemin a nei hmaa a naupang lem inneitir hi kan ram dan a ni nawh. 27 Hi inneina hi kâr khat hang suo phot inla, chu zoah kum sari dang ka rong i bawl ding aiah a sang khom pe’ng ka ti che” a ta.

28 Chuong ang chun Jakob chun a thaw a, ni sari a tlingtla chun Laban chun a naunu Rachel khom chu a nuhmei dingin a pêk a, 29 a siehlawnu Bilha chu Rachel thrangpuitu dingin a pêk sâ bok a. 30 Jakob chun Rachel khom chu a pawl a, Lea nèkin Rachel chu a hmangai lem a. Chuongchun, Laban rong chu kum sari dang a bawl nawk a.

31 Lea chun hmangai a hlaw nawh ti LALPAN a hmu a, a sŭl a hongpek a; Rachel ruok chu a ching thung a. 32 Lea chun nau a pâi a, naupa a nei a, “LALPAN ka rinum tuor a hmu lei a ni hi, tu hin chu ka pasalin mi hmangai ta’ng a tih” a ta, a hmingah Reuben^c a sak a. 33 Chun, nâu a pâi nawk a, naupa a nei nawk a, “LALPA chun hmangai ka hlaw nawh ti a hriet a, hi khom hi a mi pèk a nih” a ta, a naupa hmingah Simeon^d a sak a. 34 Nau a hung pai nawk a, naupa bok a hung nei nawk chun, “Tuhin chu naupa pathum zet ka neipek tah a, ka pasal khomin mi ngaisak ta’ng a tih” a ta, a hmingah Levi^e a sak a. 35 Nau a hung pai nawk chun, naupa bok a nei a, “Tuta trum chu LALPA inpâk ka tih” a ta, a naupa hmingah Juda^f a sak a. Chu hnung chun nau a pâi el ta nawh.