5 Isakin a naupa Esau a biek lai chu Rebek chun a lo ngaithlak a. 6 Ramvâka Esau a suok char chun Rebek chun a naupa Jakob kuomah, “I pain i upa kuoma thu a hril ka lo hriet a. 7 ‘Va ramsuok la, sa mi va kappek la, ka hmè ding inhnik deuin suong rawh, ka thi hmâ ngĕia LALPA hmaa mal ka sawmpek theina ding chein’ a ti a nih. 8 Chuleiin, tu hin ka naupa, thu ka pèk ding che hi fimkhur takin ngaithla la, ka ti angin va thaw rawh. 9 I pa du zawng taka inhnika hmè ka siem theina dingin, tu hin ran ruol lai va fe la, kèl tuoi thra tak pahni mi va lapêk rawh” a ta. 10 Chu zoah i pa thi hmaa mal a sawm theina ding chein a fàk dingin a kuomah chawi rawh” a ta.

11 Jakob chun a nu Rebek kuomah, “Nu, ka u Esau chu pa hmul hau a na, kei hlak chu hmul nei lo ka na. 12 Ka pain mi tuoi hlauh sien, iem ni ta’ng a ta? Ka hlèm tum angin ngai a ta, malsawmna nêkin trongsie a mi’n phur lem thei a nih” a ta. 13 A nu chun, “Ka naupa, trongsie chu ka chungah tla raw se. Ka ti ang tak chun thaw rawh; fe la, va la rawh” a ta.

14 Chuongchun a fe a, a va lâk a, a nu kuomah a hung chawi a, a pain a du dan ang taka inhnikin a suongpĕk a. 15 Chu zoah Rebek chun ina a kol, a nau upa lem Esau thuomhnaw laia a thra tak hai chu a hung làk suok a, a naupa naupang lem Jakob chu a’n hàktir a. 16 A bân le a rînga pangti nâmna lai po chu kèl vunin a tuompĕk a. 17 Hmè inhnik tak le bei a siem chu a naupa Jakob kuoma chun a pêk a.

18 Jakob chu a pa kuomah a fe a, “Pa” a ta. Ama chun “Iem a na? Ka naupa a tu lem am i ni leh?” a ta. 19 Jakob chun a pa kuomah, “I nau lutir Esau ka nih. I mi tir ang tak khan ka thaw a; tu hin tho inkâng la, mal i mi sawm theina dingin, ka sa kăp sa hi hang fa ta,” a ta. 20 Sienkhom Isak chun a naupa kuomah, “Ka naupa, iengtizie am an ta a, i va hung thaw inrang ĕm êm ngei de?” a ta. Ama chun, “LALPA i Pathien chun a mi’n hlawtlingtir lei a nih” a ta.

21 Isak chun Jakob kuomah, “Ka naupa, mi hung hnai rawh, lo tuoi ka ti che, chu chun ka naupa Esau i ni ngei le ngei naw hre thei ka tih” a ta. 22 Jakob chun a pa a va hnai a, a lo them a, “A rawl chu Jakob rawl a na, a kut hlak Esau kut a ni si hi!” a ta. 23 A kut chu Esau kut anga an hmul dum si leiin a hriet thei naw a, chuongchun mal a sawm a. 24 “Ka naupa Esau chu i ni chie de maw?” a ta, Jakob chun “Ni e” a ta. 25 Ama chun, “Ka naupa, i sa kap sa a thren chu mi hung pe la, mal khom sawm nghâl ka ti che” a ta. Jakob chun a hung pèk a, a fâk a; uoiin a hung pêk bok a, a dawn a. 26 A pa Isak chun, “Ka naupa, mi hung hnai la, mi fawp rawh” a ta.

30 Isakin mal a sawm zoa Jakobin a pa a maksan chauh ti chun a unaupa Esau ramvak khom chu a hung tlung a. 31 Ama khomin hme inhnik tak a buotsai a, a pa kuoma chun a hung chawi a. “Pa tho kàng la, ka sa hung kappek che hi hang fa ta, mal i mi sawm theina dingin” a ta. 32 A pa Isak chun, “Nang tum i na?” a ta. Ama chun, “I naupa ka nih, i nau lutir Esau” a ta. 33 Isak chu nasa takin a’n thin a, “I hung tlung hmaa a sa kăp sa ka kuomah hung chawia ka fàk le mal ka sawmpek ta kha tu am a na? A nih, ama chu malsawmin um ta tho tho a tih” a ta.

34 Esauin a pa thu hril a hriet chun inring tak le lung na takin a trap a, a pa kuoma chun, “Pa, kei khom hi mal mi sawm ve hrâm rawh” a ta. 35 A pa chun, “I sangpa’n a mi hung hlĕm a, i malsawmna a lăkpêk vong ta che” a ta. 36 Esau chun, “Jakob hin chu a hming a va hang put fûk kher de maw! Trum hni zet a mi dawhàna a ni tah. Ka nau lutir nina a mi làkpek a, tu hin ka malsawmna dong ding a mi hŭipek nawk vong a! Malsawmna ka ta dingin hlà hrim i nei ta naw a ni maw, pa?” a ta.

37 Isak chun, “Ama chu i lalah ka siem ta a, a unau danghai po po khom a siehlaw dingin ka pêk vong ta a; bu le uoiin tieng ka vûr ta bok a. Ka naupa, i ta dingin iem a na ka thawpĕk thei ta ding che chu?” a ta. 38 Esau chun a pa kuomah, “Pa, malsawmna pakhat chau a ni maw i lo nei? Pa, kei khom mal mi sawm ve hram rawh” a ta. Esau chu inring takin a trap a.

41 A pain mal a lo sawmpek leiin Jakob chungah Esau chu a lungsen êm ĕm a, “Ka pa ka sŭn ni chun ka sangpa Jakob hi ka that ngĕi ngêi ding a nih” a ta. 42 Esau thu hril Rebekin a lo hriet chun Jakob chu a ko a, a kuomah, “I u Esau inhnĕmna chu sukhlum ché a nih. 43 Tuhin ka naupa, ka hril ang hin thaw rawh: inrang takin ka trapa Laban kuom tieng Haran-ah tlân hmang rawh. 44 I u lungsen a dam hma po chu taka chun hang um rawh. 45 I chunga i u lungsen a dam a, a chunga i thilthawhai a theinghil pha leh hung hril ka ti che a, chu pha chun hung kîr chauh rawh. Ieng tin am ni khat thilthuah inpafain ka chân ding chĕu a na?” a ta.

46 Rebek chun Isak kuomah, “Hieng Hit nuhmeihai lei hin dam khom ka nghok tah. Jakob khomin hi rama nunghak, Hit nunghakhai laia mi hi nuhmeiah a nei nawk vai lem chun, ka ta dingin dam hin umzie nei nawng a tih” a ta.