Isak le Abimelek
26
1 Abraham dam laia trăm nasa tak a tlăk hnungin chu rama chun trăm dang a tla nawk a, Isak chu Gerar-a Filistinhai lal Abimelek kuoma chun a fe a. 2 LALPA chu Isak kuomah a hung inlăr a, “Aigupta ramah fe naw rawh; i umna hmun dinga ka tia chun um rawh. 3 Hi rama hin um hri phot la, i kuomah um ka ta, mal sawm ka ti che. Nangma le i thlahai kuomah hi ram po po hi pe’ng ka ta, i pa Abraham kuoma ka’n khàmna chu suknghet ka tih. 4 Vana arasi anga tamin i thlahai chu sukpung ka ta, hi ram po po hi pe’ng ka ta, i chithlaa inthokin hnam tin malsawmin la um an tih; 5 a san chu, Abrahamin ka thu a awi a, ka ti ang ang ka thupêkhai, ka thu ruothai le ka danhai a zawm leiin” a ta.6 Isak chun Gerar-ah umhmun a khuor a. 7 Chu rama mihaiin a nuhmei chanchin an indon chun, “Ka nuhmei a nih” ti sien, a hmêl a thra si a, a ram mihai chun Rebek leiin an that el inlauna a nei a, “Ka nuhmei a nih” ti ngam loin “Ka farnu a nih” a ta.
8 Hun sawt fe chu hmuna a um hnung chun, Isakin a nuhmei Rebek a sai lai chu Filistinhai lal Abimelek chun a tukvera inthokin a zuk hmu a. 9 Abimelek chun Isak chu a’n kotir a, a kuomah, “I nuhmei a ni chieng si a, ieng dinga ‘Ka farnu a nih’ i ti am a na?” a ta. Isak chun, “Ama leia ka hringna chăn palh ka’n lau lei a nih” a ta. 10 Abimelek chun, “Kan chunga i thilthaw hi iem an ta a? Keini laia mi tu el khom hin lo zălpui palh ta sien, kan rênga chungah thiem nawna i hung intlungtir pha ding an son naw!” tiin a suosal a. 11 Abimelek chun, “Tu khom hi mi hi amanih a nuhmei hi amanih poi tawk taphot chu sukhlum ngĕi ngêi ding a nih” tiin mihai po po chu thu a pêk a.
12 Chu rama chun Isakin thlai a ching ve a, Pathienin mal a sawm a, kum khatnaah a lêt zain a hlâwk a. 13 A hung neinung a, a hung inthrang tuol tuol a, mi hausa tak a hung ni ta a. 14 Beram ruol le ran ruol le siehlaw tam tak a hung nei a, Filistinhaiin an hung thǐk ta hle a. 15 A pa Abraham dam laia a siehlawhaiin tuikul an cho po po chu Filistinhai chun pil vur khumin an khărpĕk ta vong a. 16 Abimelek chun Isak kuomah, “Hi hmuna inthok hin inson ta rawh, keini nêkin i che thei lem dai ta si a” a ta.
17 Chutaka inthok chun Isak chu Gerar phaizawlah insonin umhmun a khuor a. 18 A pa Abraham dam laia a tuikul inchotir, a thi hnunga Filistinhaiin an khărpêk tahai chu Isak chun a hong nawk a, kha hmaa a pain a kona hming seng kha a’n puttir nawk a. 19 Ruoma chun Isak siehlawhaiin tuikhur ding an cho a, tui hnăr inthieng an cho suok a. 20 Sienkhom, Gerar khuoa ranpuhai chun, “Tui hi kan tà a nih” tiin Isak ranpuhai chu an hung inchŭpui a; chuonga an hung inchŭpui lei chun a tuikul hmingah ‘Esek’a ti a’n bŭk a. 21 Tuikul dang an cho nawk a, chu khom chu inchŭpui tuma an hung insĕlpui nawk leiin a hmingah ‘Sitna’b a’n bŭk a. 22 Chu taka inthok chun an inson a, tuikul dang an cho nawk a, chu ruok chu an hung inchŭpui ta naw a. Chuongchun, “Tu hin chu LALPAN ei ta dingin hmun a mi pek ta a, hi hmuna hin inthla pung tâng ei tih” a ta, a hmingah ‘Rehobot’c a’n bŭk a.
23 Chu taka inthok chun Beersheba a zuon tung a.
24 Chu zân chun a kuomah LALPA a hung inlàr a,
“Kei hi i pa Abraham Pathien chu ka nih.
Tri naw, i kuomah ka um annawm.
Ka siehlaw Abraham zarin malsawm ka ti che a,
I thlahai sukpung ka tih”
a ta.
25 Chu taka chun maichàm a siem a, LALPA hming a lam a. Chu hmuna chun puon in a kei a, a siehlawhaiin tuikul thar an cho nawk a.
26 Chu lai chun Gerar-a inthokin Abimelek a hung a, a mi râwn tak Ahuzat le a sipai kawmandar Fikol hai chu a hung thruoi a. 27 Isak chun, “In mi tai a, in mi tir suok ka ni si a, ieng leia ka kuomah in hung nawk?” a ta. 28 Anni chun, “I kuomah LALPA a um ti chieng takin kan hmu a. Kan inbiek tlàng a, nang le keini inkàrah intiemna thuthlung nei ngei trûlin kan hriet a. 29 LALPA malsawmna dongtu i ni ta si a, i poi tawk lo a, i chungah thrat inchu a, muong taka kan infetir ang che khan, keini chunga khom sietna ding ieng khom i thaw nawna dingin inkhâm meuin thuthlung siem ei tiu” an ta. 30 Isak chun ruoi a buotsaipek a, fain an dawn a. 31 A tûk zîngkâr inhma takin thu chu inkhâmin an thlung a. Chu zoah Isak chun muong takin an kirtir nawk a.
32 Chu ni chun Isak siehlaw chu an tuikul cho thu hril dingin a hung a, “Tui kan cho suok ie!” a ta. 33 Isak chun tuikul hmingah ‘Siba’d a’n bŭk a, chu khuo chun voisun chen hin Beersheba ti hming a la put zing a nih. 34 Esau chun kum sawmli a niin Hit mi Beri naunu Judit le Hit mi bok Elon naunu Basemot hai chu nuhmeiin a nei a. 35 Anni hi Isak le Rebek lung sukrimtu tak an nih.