Abraham thi thu
25
1 Abraham chun nuhmei dang a nei nawk a, a hming chu Ketura a nih. 2 Ama chun Zimran hai, Joksan hai, Medan hai, Midian hai, Isbak hai le Suah hai a thla a. 3 Joksan chun naupa Seba le Dedan a nei a. Dedan naupahai chu Asur hai, Letus hai, Leum hai an nih. 4 Midian naupahai chu Efa hai, Efer hai, Hanok hai, Abida le Elda hai an nih. Chuonghai po chu Ketura nauhai chu an nih.5 Abraham chun a nei po po Isak a’n rochungtir a. 6 A hmei naupahai ruok chu a dam lai ngeiin thilpêk a pêk seng a, Isaka inthoka indangtirin, khawsak ram tieng a’n fetir vong a. 7 Abraham dam sung chu kum za le sawmsari le panga a nih. 8 Tar kûna damin a thi a, a chipuihai kuomah thruoiin a um ta a. 9 Hit mi Zohar naupa Efron loa Makpela puk, Mamre bula chun a naupa Isak le Ismael chun an phŭm a, 10 chu hmun chu Abrahamin Hit mihaia inthoka a’n chawk a na, chu taka chun a nuhmei Sari leh an phŭm a nih.
11 Abraham thi hnung chun a naupa Isak chu Pathienin mal a sawm a; chuong lai chun Isak chu Beer Lahai Roi khaw kawla chêng a nih.
Ismael nauhai
12 Hi hi Sari bawinu, Aigupta mi Hagarin Abraham ta dinga naupa a neipek Ismael thlahai chanchin suina chu a nih. 13 An pieng huna an hminghai an inchik dan chun Ismael thlahai chu: Ismael nau lutir chu Nebaiot a na, a dang chu Kedar hai, Adbeel hai, Mibsam hai, 14 Misma hai, Duma hai, Masa hai, 15 Hadad hai, Tema hai, Jetur hai, Nafis hai le Kedema hai an nih. 16 Hienghai hi Ismael naupa sawm le pahnihai chu an ni a, an chĕngna le an ram delh ang peiin anni chi bing umna chitah lalna an chang seng a nih. 17 Ismael chu kum za le sawmthum le pasari a dam hnungin a thi a, a chipuihai kuomah thruoiin a um a. 18 A thlahai chu Aigupta ramri bul Sur-a inthoka Asur pan zawngin Havila chen an inzar a, an unauhai po po leh intai zing zingin an khawsa a.
Jakob le Esau
19 Hi hi Abraham naupa Isak chanchin chu a nih. Isak chu Abraham naupa a nih. 20 Isak chun kum sawmli a niin Laban farnu Rebek chu nuhmeiah a nei a, ama chu Mesopotamia hmar thlang Padan Arama um, Aram mi a hming Bethuel naunu a nih. 21 A nuhmei chu a ching leiin Isak chun a nuhmei aiawin LALPA kuomah a hnipĕk a, LALPAN a trongtraina chu a don a, Rebek chun nau a hung pai ta a. 22 A nau paihai chu a phing sŭnga chun an insuol nasa leiin “Iem an ta a ka chunga thil tlung hi?” a ta, LALPA rawn dingin a fe a.
23 LALPA chun a kuomah,
“I sŭlah hnam hni an insieng a,
I sûngah hnam hni chu inthre’ng an ta,
Hnam pakhat chu hrât lem a ta,
A û chun a sang rong bawl a tih”
tiin a hril a.
24 A nau nei a hung hun chun a sŭla chun nau inphîr an lo um a. 25 A hung suok hmasa lem chu sen tul el, a pang chu puon inhmul anga inhmul dum el a na, a hmingah ‘Esau’a an sak a. 26 Chu zoah, a upa Esau kekhong chu a kuta chelin a sang chu a hung suok a, a hmingah ‘Jakob’b an sak a. Rebekin anni pahni a nei hin Isak chu kum sawmruk mi a ni tah.
27 Naupanghai chu an hung seilien a, Esau chu thal kap thiem le ram suok mi a na; Jakob ruok chu pa ngawichawi, in tieng ngaisak mi a nih. 28 Ram sa du mi Isak chun Esau chu a ngaina a, Rebek ruok chun Jakob a ngaina thung a.
29 Voi khat chu Jakobin thil a lo suong hruoi a, Esau ramvak trămsawl chu a hung tlung a. 30 Jakob kuomah, “I thil sen suong kha mi hang infâktir vat ta, ka trămsawl a ni hih” a ta. Chu lei chun a nih Edom ti hming a put phà chu.
31 Jakob ruok chun, “Nau lutir i ninain inchaw rawh” a ta. 32 Esau chun, “En ta, ka thi trêp an ta hi! Nau lutir nina chu ka ta dingin a hmangna iem a um a?” a ta. 33 Sienkhom Jakob chun, “Inkhâmin thu mi tiem hmasa phot rawh” a ta. Chuongchun, Jakob kuoma chun inkhâmin nau lutir a nina chu a zor ta a. 34 Chu phing leh Jakob chun bei le a be sen suong hruoi chu a pêk a. Chuongchun, a fâk a, a dawn a, a tho a, a fe ta a. Chuong ang chun Esau chun nau lutir a nina chu a ngainĕp a nih.